Францын эрх баригчид Елисейн ордны харуул хамгаалалтыг чангатгах болжээ. Учир нь тус ордон халдлагад өртөж болзошгүй талаарх мэдээлэл ирснээс үүдэлтэй гэж “RTL” радиостанц онцолжээ. Францын Ерөнхийлөгчийн гол өргөөг өндөржүүлсэн бэлэн байдалд оруулсан байна. Парис хотын Цагдаагийн газрын мэдээлснээр “Тагнуулын албанаас Елисейн ордонд террор болж магадгүй талаарх мэдээлэл ирсэн” гэв. Үүнтэй холбогдуулан тус ордны цагдаа нарыг хоёр, хоёроор нь ээлжлэн харуулд гаргах тухай шийдвэр гаргажээ. Мөн харуул хамгаалалтын тоог ч нэмэгдүүлэх агаад цагдаагийн ажилтан болон цэргүүдийг буу зэвсгээр хангах юм байна.