УИХ-ын Аюулгүй байдал гадаад бодлогын байнгын хорооны 2017 оны 5 дугаар сарын 24-ний хуралдаанаар Монгол Улсаас гадаад улсад суух зарим Онц бөгөөд Бүрэн эрхт Элчин сайд нарыг томилуулах асуудлыг хэлэлцэн дэмжиж, УИХ-ын чуулганы нэгдсэн хуралдаанаар хэлэлцүүлж байна.
Элчин сайд нарыг танилцуулахад:
Лүндэгийн Пүрэвсүрэн: Монгол Улсаас Швейцарийн Холбооны Улсад суух Онц бөгөөд Бүрэн эрхт Элчин сайдаар томилогдож буй. Тэрээр Москвагийн Олон улсын харилцааны дээд сургуулийг төгссөн. ХБНГУ, Шинэ Зеланд, АНУ-д олон улсын харилцааны чиглэлээр мэргэжил дээшлүүлсэн. “Онц бөгөөд Бүрэн эрхт Элчин сайд” дипломат дээд цолтой. Герман, англи, орос хэлний мэдлэгтэй. Тэрбээр 1989 онд ажлын гараагаа Гадаад явдлын яаманд туслах ажилтнаар эхлүүлж, атташе, гурав, хоёр, нэгдүгээр нарийн бичгийн дарга, зөвлөх, Гадаад хэргийн сайд, Монгол Улсын Ерөнхийлөгчийн гадаад бодлогын зөвлөхөөр ажилласан, гадаад харилцааны бүхий л шат дамжлагыг дамжсан, удирдах ажлын дадлага туршлагатай, мэргэшсэн, мэргэжлийн өндөр ур чадвартай дипломат.
Авирмэдийн Баттөр: Монгол Улсаас Франц Улсад суух Онц бөгөөд Бүрэн эрхт Элчин сайдаар томилогдож буй. Тэрээр Москвагийн Олон улсын харилцааны дээд сургууль, Францын Үндэсний удирдлагын их сургуулийг төгссөн. Шинэ Зеландын “Виктория” их сургууль, Бельгийн Вант Улсын Брюссель хот дахь Европын Стратеги, олон улсын харилцааны төвд мэргэжил дээшлүүлсэн. Төрийн захиргааны магистр. “Онц бөгөөд Бүрэн эрхт Элчин сайд” дипломат дээд цолтой. Франц, орос, англи хэлний мэдлэгтэй. Тэрбээр 1989 онд ажлын гараагаа Гадаад явдлын яаманд туслах ажилтнаар эхлүүлж, атташе, газрын захирал, Монгол Улсын Боловсрол, Соёл, шинжлэх ухаан, технологийн сайд, Гадаад хэргийн дэд сайд, Монгол Улсаас Бельгийн Вант Улсад суугаа Онц бөгөөд Бүрэн эрхт Элчин сайд, Батлан хамгаалахын дэд сайд, Монгол Улсын Ерөнхийлөгчийн гадаад бодлого, аюулгүй байдлын зөвлөхөөр ажилласан, удирдах ажлын дадлага туршлагатай, мэргэшсэн, мэргэжлийн ур чадвартай дипломат.
Наваан-Юндэнгийн Чимгүүндарь: Монгол Улсаас Канад Улсад суух Онц бөгөөд Бүрэн эрхт Элчин сайдаар томилогдож буй. Тэрээр Москвагийн Олон улсын харилцааны дээд сургууль, Францын Үндэсний удирдлагын их сургуулийг төгссөн. Нидерландын Клингендалийн их сургуульд олон улсын харилцаа, дипломат албаны чиглэлээр мэргэжил дээшлүүлсэн. Олон улсын харилцааны магистр. “Тэргүүн итгэмжит” дипломат цолтой. Англи, франц, орос хэлний мэдлэгтэй. 2006 онд ажлын гараагаа Гадаад харилцааны яаманд мэргэжилтнээр эхлүүлж, атташе, гурав, хоёр, нэгдүгээр нарийн бичгийн дарга, зөвлөх, газрын дэд захирал, Ерөнхий сайдын гадаад бодлогын зөвлөхөөр ажилласан, гадаад харилцааны бүх шат дамжлагыг дамжсан туршлагатай, мэргэшсэн, мэргэжлийн ур чадвар нь өсч буй залуу, эмэгтэй дипломат.
Ёндонгийн Отгонбаяр: Монгол Улсаас Америкийн Нэгдсэн Улсад суух Онц бөгөөд Бүрэн эрхт Элчин сайдаар томилогдож буй. Тэрээр Москвагийн Олон улсын харилцааны дээд сургууль, Бүгд Найрамдах Энэтхэг Улсын Маркетинг, менежментийн сургууль, ОХУ-ын Дипломатын академийг төгссөн. Олон улсын харилцааны магистр, түүхийн ухааны доктор. “Тэргүүн шадар” дипломат цолтой. Англи, орос, хинди, урду, франц хэлний мэдлэгтэй. Сургуулиа төгсөөд 1989 онд ажлын гараагаа Гадаад харилцааны яаманд атташегаар эхлүүлж, улмаар хоёр, нэгдүгээр нарийн бичгийн дарга, Ерөнхий сайдын гадаад бодлогын зөвлөх, Боловсрол, соёл, шинжлэх ухааны сайд, УИХ-ын гишүүн, Боловсрол, соёл, шинжлэх ухаан, спортын дэд сайдаар ажилласан, мэргэшсэн, мэргэжлийн ур чадвартай дипломат бөгөөд удирдах ажлын дадлага туршлагатай төрийн түшээ.
Дамбын Ганбат: Монгол Улсаас Холбооны Бүгд Найрамдах Герман Улсад суух Онц бөгөөд Бүрэн эрхт Элчин сайдаар томилогдож буй. Тэрээр ЗХУ-ын Уралын Улсын их сургууль, МУИС, ХБНГУ-ын Баден Вюртемберг мужийн Гадаад худалдааны академийг төгссөн. Улс төрийн шинжлэх ухааны доктор. АНУ, ХБНГУ, Итали, ЗХУ-д мэргэжил дээшлүүлсэн. Герман, англи, орос хэлний мэдлэгтэй. Тэрбээр багш, эрдэм шинжилгээний ажилтан, дээд сургуулийн захирал, Үндэсний аюулгүй байдлын зөвлөлийн Стратегийн судалгааны хүрээлэнгийн захирлаар ажилласан, удирдах ажлын дадлага туршлагатай, гадаад хэлний мэдлэгтэй, төрийн албан хаагч.
Гончигзэвэгийн Тэнгэр: Монгол Улсаас Япон Улсад суух Онц бөгөөд Бүрэн эрхт Элчин сайдаар томилогдож буй. Токио хотын Гадаад хэлний дээд сургууль, Япон Улсын Ёкохамагийн Үндэсний дээд сургууль, МУИС-ийн Нийгмийн ухааны сургуулийг төгссөн. Улс төр судлалын магистр. Япон, англи хэлний мэдлэгтэй. МАН- ын Удирдах зөвлөлийн Хэрэг эрхлэх газрын Гадаад харилцаа, хамтын ажиллагааны хэлтсийн дарга, Гадаад харилцааны дэд сайдаар ажилласан. Удирдах ажлын дадлага туршлагатай, япон хэлний өндөр мэдлэгтэй.