Экс Ерөнхийлөгч Ц.Элбэгдоржийн 2008 онд үүсгэн байгуулсан “EBI” бодлогын судалгааны хүрээлэнгээс гадаадын их дээд сургуулийн бакалаврын түвшинд суралцаж буй оюутнуудын анхаарлыг Монгол Улс руу хандуулах санаачилга гаргажээ. Энэ хүрээнд гадаадын их дээд сургуулийн бакалаврын түвшний, Монголыг судлах сонирхолтой оюутнуудын дунд зарласан сонгон шалгаруулалтад долоон улсын есөн залуу шалгарсан байна.
Ирээдүйн Монгол судлаачдыг дэмжих “EBI” хөтөлбөрт тэнцсэн оюутнууд ирэх даваа гаригт буюу 2017 оны 08-р дугаар сарын 07-ны өдөр Монголд зочлох ажээ. Тэд арав хоногийн турш манай улсын түүх, ёс заншил, ардын урлагтай танилцах юм байна. Энэхүү хөтөлбөрийн гол зорилго нь гадаадын их дээд сургуулийн бакалаврын түвшинд суралцаж буй оюутнуудыг цаашид Монгол улсыг сонгон судлах сэдлийг өдөөх ажээ.
Энэхүү арга хэмжээний нээлт ирэх даваа гаригт буюу 2017 оны наймдугаар сарын 07-ны өдрийн 14 цагт Монголын Үндэсний музейд болох юм.