Мэдээллийн технологийн чиглэлээр нарийн мэргэжил эзэмшүүлэх үнэ төлбөргүй сургалтанд суусан залуус БНСУ-д сурсан мэргэжлээрээ ажиллахаар явж байгаа тухай Нийслэлийн Залуучуудын хөгжлийн газар, MKIT Educational Center мэдээллийн технологийн төвийнхөн хамтран мэдээлэл хийлээ.
2017 оны гуравдугаар сараас эхлэн мэргэжлийн анги болох жава, вэб хөгжүүлэгч, вэб дизайны ангид нийт 79 хүн хамрагдсанаас гурван сарын хугацаанд 32 хүн амжилттай төгсчээ. Амжилттай төгссөн залуусаас эхний дөрөв нь маргааш БНСУ-руу нисэх гэж байна. Тодруулбал, програмчлалын ангийн төгсөгч Л.Бадрал, Г.Бат нар “ХҮИЗ” Холдинг компанид, Д.Сайнзаяа, Н.Нямбаяр нар “МИКА” ХК-д мэдээллийн технологийн чиглэлээр дадлагжигчаар гурван сарын хугацаанд мэргэжил дээшлүүлэн ажиллахаар болжээ. Мөн есдүгээр сарын 7,8-ны өдөр БНСУ-аас таван компаний төлөөлөгч ирэх учраас 10-15 залуучуудыг сонгон шалгаруулах юм байна.
Мөн гадаадад очиж хөдөлмөр эрхлэх биш эх орондоо хөдөлмөр эрхлэх бололцоог бүрдүүлэхийн тулд MKIT сургалтын төвд Нийслэлийн Залуучууд хөгжлийн газраас залуучуудыг сурган, өрсөлдөх чадварыг нь сайжруулж, эх орондоо өндөр цалинтай ажил хийх боломжтой болжээ.
С.НАРАНЖАРГАЛ