Хятадын Коммунист Намын 100 жилийн ойг тохиолдуулан “Эх хэлээ аваръя” хөдөлгөөн БНХАУ-ын дарга Си Жиньпинд хандан нээлттэй захидал илгээв.
Эх хэлээ аваръя! хөдөлгөөн нь 2020 оноос Өмнөд Монголд хэрэгжиж эхэлсэн “Хос хэлний бодлого” –ын үндсэн дээр бий болсон дэлхий даяар Монгол хэл, соёл, элэг нэгт ахан дүүсийнхээ төлөө нэгдсэн Монгол үндэстний 16 мянган гишүүд дэмжигчид бүхий нийгмийн хэрэгцээ шаардлагаар үүсэн бий болсон хөдөлгөөн юм.
Өнөөдөр буюу долдугаар сарын 23 ны буюу ХКН-ын жинхэнэ байгуулагдаж анхны үүсгэн байгуулагчдын хурлаа хийсэн энэхүү өдөр тус хөдөлгөөнийхөн “ХКН ба Өмнөд Монгол-Өнгөрсөн, Одоо, Ирээдүй” сэдэвт цахим семинар зохион байгуулж, “Эх хэлээ аваръя!” ТББ, Дэлхийн Монголчуудын Холбоо, Өмнөд Монголын Их Хуралдай болон “Тархсан Монголчуудын Нэгдэл” ТББ-ын гишүүд дэмжигчид хамтран Сүхбаатарын талбайд халдвар хамгааллаа барин тайван цуглаан хийх зэргээр өөрсдийн үзэл бодлоо илэрхийлж ХКН-ын Ерөнхий нарийн бичгийн дарга Си Жиньпинд хандан “ХКН даян дэлхийн хүн төрөлхтний энх тайвны төлөө хүний эрхийг дээдлэн, цөөн тоот үндэстнийхээ эрх ашгийг хүндэтгэж Өмнөд Монголд явуулж буй “Хос хэлний бодлого”-ыг зогсоож сурагчдын цаашид Монгол хэлээрээ сурах боломжийг нь хадгалан, бэлчээр нутгийнхаа төлөө тэмцсэн малчин тэмцэгч нарын эрхийг хамгаалах”-ыг шаардсан утга бүхий захидал илгээв.
