ЭЕШ өнөөдөр улс орон даяар эхлээд байгаа билээ. 23 дугаар сургууль дээр очиж шалгалтын үйл явц хэрхэн өрнөж байгааг сонирхлоо.
ЭЕШ-ын материалыг шууд засаж буй шилэн технологи бүхий машин нь цагт 2800 хуудас засах хүчин чадалтай аж. Нэг заалны шалгуулагчдын материалыг хоёроос гурван минутад засаж байна. Энэхүү технологийг өмнө жил Ховд болон Орхон аймагт туршиж байсаг бол энэ жил орон даяар нэвтрүүлжээ. УБ хотод шалгалтын 10 төв байгаа бөгөөд улсын хэмжээнд 18130 сурагч ЭЕШ өгч байна.
Боловсролын үнэлгээний төвийн захиргааны хэлтсийн дарга Ш.Шижир-Эрдэнэ: “Энэ жилийн шалгуулагчид цагийн менежмент муутай байна. Мөн бичиг баримт дутуу, гар утас болон бусад ухаалаг хэрэгслийг авч ирж байна. Энэ нь шалгуулагчид ЭЕШ-ын журамтай танилцаагүй байгааг харуулж байгаа юм. Бид дутуу бичиг баримтыг нь бүртгэлийн дугаар, нууц үгээр нь энд гаргаж өгч аль болох шалгалтад оруулах талаас нь анхаарч ажиллаж байна. Хонх дуугараад шалгалт эхэлсэн тохиолдолд орох боломжгүй” гэв.
Б.ОЮУНГЭРЭЛ