Эрх баригчид ОУВС-гийн хөтөлбөрт хамрагдахаас өөр сонголт байхгүй хэмээн мэдэгдэж байсан. Эдийн засгийн хямралд орсон улс орноо дампууралд хүргэчихгүйн тулд ОУВС-гийн заасан замаар төсвийн сахилга батыг сахихын чухлыг ч сануулцгааж байлаа. Харин одоо эрх баригчдад хонгилын үзүүрт гэрэл харагдсан бололтой. МАН-ын Удирдах зөвлөл өнгөрсөн мягмар гаригт хуралдах үеэрээ УИХ-ын ээлжит бус чуулганыг зарлахгүй байх шийдвэрт хүрчээ. Ингэснээр ирэх дөрөвдүгээр сарын 5-наас нааш УИХ хуралдахгүй юм.
Монгол Улсын Засгийн газар Олон улсын валютын сантай хэлэлцээр хийснээр Өргөтгөсөн санхүүгийн хөтөлбөрт хамрагдах тохиролцоонд хүрсэн. Уг хөтөлбөрт хамрагдахын тулд Засгийн газар долоон төрлийн татвар нэмэгдүүлэх шаардлагатай болж буй. УИХ эцсийн шийдвэр гаргах ёстой. Тодруулж хэлбэл, УИХ-аар Монгол Улсын 2017 оны төсвийн хуульд нэмэлт өөрчлөлт оруулах хуулийн төсөл, мөн татвартай холбогдох төслүүдийг хэлэлцэн баталсны дараа Олон улсын валютын сангийн захирлуудын зөвлөл хуралдаж, өргөтгөсөн хөтөлбөрт хамрагдах эсэхийг шийдэх юм.
УИХ 2017 оны төсвийн төслийг хэлэлцээгүй цагт Олон улсын валютын сангийн хөтөлбөрт хамрагдах асуудал ч хойшлох болж буй.
УИХ энэ гурван сардаа багтаагаад 2017 оны төсвийн хуульд өөрчлөлт оруулаад баталчихвал Олон улсын валютын сангийн захирлуудын зөвлөл хуралдаж, Монголын асуудлыг шийдэх боломжтой талаар мэдээлж байсан.
Харин МАН-ын Удирдах зөвлөл УИХ-ын ээлжит бус чуулган зарлан хуралдуулахгүй байхаар шийдсэн нь Олон улсын валютын сангийн хөтөлбөрт хамрагдахаас зайлсхийж байна гэх ойлголтыг олон нийтэд төрүүлж эхэллээ.