Алтай констракшны дэргэдэх Үндэсний авто мото спортын клубын тамирчин ОУХМ Э.Халиунболд “Loretta Lynn” олон улсын тэмцээнд түрүүллээ. Өнгөрөгч амралтын өдрүүдэд буюу гуравдугаар сарын 28-29-нд АНУ-ын Лос-Анжелес хотын Riverside-д Loretta Lynn олон улсын тэмцээн амжилттай зохион байгуулагдлаа. Тус уралдаанд Азийн аварга шалгаруулах тэмцээний аварга, ОУХМ Эрдэнэбилэгийн Халиунболд оролцож нэг алт, хоёр хүрэл медаль хүртэж, мото спорт сонирхогчдыг алмайрууллаа. Тус тэмцээн нь АНУ-д зохиогддог супер кросс уралдааны ДАШТ болон АНУ-ын аварга шалгаруулах тэмцээний дараа ордог уралдаан бөгөөд мэргэжлийн болон сонирхогчдын тамирчид оролцдог дэлхийн хамгийн олон оролцогчтой уралдааны нэг юм. Тэмцээний эхний өдөр буюу гуравдугаар сарын 28-ны өдөр Э.Халиунболд 450 class ангилалд оролцож, хүрэл медаль хүртсэн бол 29-нд 450 pro class ангилалд дахин хүрэл, 25-аас дээш насанд түрүүллээ.