Ховд аймгийн Буянт сумын харьяат, Зэвсэгт хүчний 123 дугаар ангийн хөгжимчин, ахлах ахлагч Э.Даваажамц Ховдоос Улаанбаатар хот хүртэл 1500 км зайд гүйхээр төлөвлөж, зургадугаар сарын 02-нд гараанаасаа гарсан юм.
Энэ удаагийн гүйлтээ Монгол Улсад Зэвсэгт хүчин үүсэн байгуулагдсаны 100 жил, Ховд аймаг байгуулагдсаны 90 жилийн ой, ирэх жил буюу 2022 онд тохиох Ардын Хатанбаатар Магсаржавын нэрэмжит ЗХ-ний 123 дугаар анги байгуулагдсаны 100 жилийн ойд зориулж байгаа аж.
Харин өнөөдөр Ховд аймгийн Дарви сумын нутагт иржээ.
Тэрээр долдугаар сарын 10-ны өдөр буюу Монгол Улсын Төрийн далбааны өдөрт зориулсан цэргийн ёслолын жагсаалын үеэр Улаанбаатар хот, Сүхбаатарын талбайд барианд орохоор тооцоолжээ. Ингэхдээ гурван сарын хугацаанд бэлтгэл хийж өдөрт 40-45 км гүйхээр төлөвлөөд буй.
Э.Даваажамц дунд сургуулийн сурагч байхдаа гүйлтийн спортоор хичээллэдэг байжээ.
Алтан шар зам нь өлзийтэй байг.