Эрүүл мэндийн яамнаас коронавируст халдвар (COVID-19)-ын нөхцөл байдлын талаар мэдээлэл хийлээ.
ЭМЯ-ны Тандалт, шуурхай удирдлагын хэлтсийн дарга Д.Нарангэрэл “Коронавирусийн халдвар өвчлөл 201 улс оронд бүртгэгдээд байна. Дэлхий даяар 14 минут тутамд нэг хүн коронавирусийн халдвар авч, 20 минут тутамд нэг хүн үүний улмаас эндэж байна” гэв.
ДЭМБ-ын мэргэжилтэн О.Ариунтуяа “Гуравдугаар сарын 28-ны өдрийн байдлаар дэлхий даяар 575,400 тохиолдол бүртгэгдсэн. АНУ, Итали улс Хятад улсыг давсан бол Испани, Итали улсад нас баралтын тохиолдол нь Хятад улсаас 1-3 дахин их байгаа. БНХАУ-д дотоод халдвар гарахгүй байгаа ч импортлогдох тохиолдлоос сэргийлэх зорилгоор олон улсын нислэгүүдээ багасгаж байгаа юм” гэлээ.
ХӨСҮТ-ийн захирал Д.Нямхүү “Гуравдугаар сарын 27-нд Сэлэнгэ аймагт тусгаарлагдсан таван сэжигтэй тохиолдлын шинжилгээний хариу сөрөг гарсан.
Тусгаарлалтад байгаа ХӨСҮТ-д тав, Увс аймагт хоёр, Дархан-Уул аймагт 19, Сэлэнгэд дөрөв зэрэг нийт 32 хүний шинжилгээнд коронавирус илрээгүй. Өчигдөр сэжигтэй тохиолдол нэмж бүртгэгдээгүй.
Одоогийн байдлаар 220 хүн ХӨСҮТ-д ажиглалт, тусгаарлалтад байна” гэв.
Мөн ХӨСҮТ-д эмчлэгдэж байгаа хүмүүсийн биеийн байдал тогтвортой, сайн байгаа. Эмчилгээний тактик зөв байна гэдэг сайхан мэдээ дуулгая гэлээ.