Нийслэлийн эрүүгийн хэргийн давж заалдах шатны шүүхээс С.Зоригийн амь насыг хөнөөсөн хэргийн шүүгдэгч Ц.Амгаланбаатар, Б.Содномдаржаа, Т.Чимгээ нарт оноосон анхан шатны шийдвэрийг хэвээр үлдээх шийдвэр гаргалаа.
Уг хэргийн гэрчээр оролцсон хоёр иргэн тэднийг таньж, мэдүүлэг өгсөн байна. Мөн тэдний хийсэн хэрэг гэрчүүдийн мэдүүлэг болон нотлох баримтуудаар нотлогдсон учир шүүх ялыг хэвээр үлдээх шийдвэр гаргасан байна.
Анхан шатны шүүхээс Амгаланбаатарт 25, Б.Содномдаржаад 25, Т.Чимгээд 24 жилийн хорих ял оноосон. Ингэхдээ Ц.Амгаланбаатарт оноосон 25 жилийн 20-ыг гянданд, үлдсэнийг нь онцгой дэглэмтэй хорих ангид, Б.Содномдаржаад оноосон 25 жилийн 23-ыг нь гянданд, үлдсэнийг нь онцгой дэглэмтэй хорих ангид, Т.Чимгээгийн 24 жилийн ялыг чанга дэглэмтэй хорих ангид тус тус эдлүүлэхээр шийдвэрлэсэн юм.
Шүүгдэгчид одоо Дээд шүүхэд хандаж эрхтэй. Хэрэв Дээд шүүхэд хандах бол шүүхийн шийдвэрийг хүлээн авснаас хойш 14 хоногийн дотор гомдол гаргах хуультай.
О.ӨНӨР