Азийн хөгжлийн банкны Захирлуудын зөвлөлд Япон улсыг төлөөлсөн Гүйцэтгэх захирал Коичи Хасэгава өнөөдөр Дархан-Уул аймагт айлчлах хүрээндээ “Дархан нэхий” ХХК-ийн үйлдвэрийн үйл ажиллагаатай танилцжээ.
Тус компани нь 2010 онд хоёр тэрбум төгрөгийн хөнгөлөлттэй зээлийг Азийн хөгжлийн банкнаас авч үйл ажиллагаагаа өргөжүүлсэн байна. Тодруулбал, өдөрт 500 хос гутал үйлдвэрлэх хүчин чадал бүхий гутлын үйлдвэрийг байгуулснаас гадна боловсруулах нойтон цехийн тоног төхөөрөмжөө шинэчилсэн байна. Үүний үр дүнд үйлдвэрийнхээ хүчин чадлыг нэг дахин нэмэгдүүлсэн зэрэг бодит үр дүнгүүд гарчээ.
Цаашид Дархан нэхий компани нь шахмал шир боловсруулах, хаягдал ноосыг ашиглах хоёр төсөлд АХБ-тай хамтран ажиллахаар болсон байна. АХБ-ны төлөөллүүд тус үйлдвэрийн үйл ажиллагаатай танилцах үеэр хамтарч ажилласны үр дүн өндөр байгаа тул сэтгэл хангалуун байгаагаа илэрхийлэхийн зэрэгцээ энэ нь Азийн Хөгжлийн Банкны нэг томоохон амжилт юм гэдгийг ч онцлов.