Дархан аварга Х.Баянмөнх бөхчүүдийн допингийн асуудлаар АТГ-ын үүдэнд мэдээлэл хийлээ. Тэрээр “Энэ удаагийн баяр наадамд допингоос болж ямар нэг асуудал дэгдэх шинжтэй болж байна. Бөхийн допингийн асуудал нь сүүлийн 16 жил ямар ч хууль дүрэм, хөндлөнгийн хяналтгүй, ганц хоёр эмч, сувилагчийн мэдэлд явсаар улам бүр даамжирч, бөхчүүдийг дарамталж, шантаажилдаг зэвсэг болсон. Иймээс АТГ-т допингийн комиссыг шалгуулж, гарч буй алдаа дутагдлыг шалгуулах хүсэлтээ өглөө.
Одоогийн байдлаар 14 хүнээс допинг илэрсэн мэдээ гараад байгаа. Гэтэл хуучин бөхийн холбоо таван хүнээс илэрсэн гэв. Тэгэхээр есөн хүн яасан бэ, энэ ямар учиртай вэ гэх сэжиг төрүүлж байна. Мөн “Допингийн комисс”-т ах дүү, садан төрөл, нэг байгууллагын ажилтнууд байдаг нь хардлага төрүүлсээр байгаа юм. Допингийн асуудал нь бөхчүүдийн эрх ашгийг хохироох, сэтгэл санаагаар унагах, наадмын бэлтгэлийг хүчингүй болгох, нэг төрийг гутааж байна. Тиймээс энэ асуудалд онцгой анхаарах хэрэгтэй. Цаашид допинг хэн оруулж,тариад байна гэдгийг олох хэрэгтэй.
Наадмаас өмнө эвлэрэлийн гэрээ байгуулж, бүгд нэг холбоо болж улсын баяр наадмаа зөв зохион байгуулъя хэмээн нийт бөхчүүд болон, “Наадмын комисс”-ыг уриалж байна” гэв.
Наадмын төв комиссийн бөхийн асуудал хариуцсан албаны дарга Д.Баясгалан гэж хүн байдаг. Д.Баясгалан, Б.Бат-Эрдэнэ гэдэг хоёр хүн эвлэрэлийн асуудлыг зөвшөөрөхгүй байна.Энэ хүн “Та нартай та наргүй төр наадмаа хийнэ” гэсэн. Бусад нь бүгд эвлэрэх хүсэлтэй байгаа. Энэ асуудал даамжирсаар байвал үндэсний аюулгүй байдалд нөлөөлж болзошгүй” гэв.
Э.АНУДАРЬ