Хүй долоон худагт зохиогдож буй “Даншиг наадам-Хүрээ цам” арга хэмжээний хүрээнд цагдаагийн байгууллагын 1200 гаруй алба хаагчид наадамчин олны аюулгүй байдлыг хангах, гэмт хэрэг, зөрчлөөс урьдчилан сэргийлэх чиглэлээр хэв журмын явган, автомашинтай, нохойт, морьт эргүүлүүдийг ажиллуулж байна.
Наадмын үеэр гэмт хэргээс урьдчилан сэргийлэх чиглэлээр Хүй долоон худгийн радио узель ашиглан наадамчин олонд 30 минут тутам 2-3 удаагийн давтамжтайгаар сэрэмжлүүлэг хүргэж, бага насны хүүхдийг төөрөхөөс сэргийлж, эцэг, эхийн утасны дугаартай бугуйвчийг тараасан аж. Мөн наадмын үеэр хоёр хүүхэд төөрснийг цагдаагийн алба хаагчид эцэг, эх асран хамгаалагчид нь хүлээлгэн өгч ажиллажээ.