“Даншиг наадам-Хүрээ цам 2019” шашин соёлын наадам есдүгээр сарын 8-нд Төв цэнгэлдэх хүрээлэнд болно. Энэ жилийн даншиг наадмыг Гандантэгчинлэн хийд бие даан зохион байгуулж байна.
Даншиг наадам нь 1639 онд Өндөр гэгээн Занабазарыг Монгол түмний шашны тэргүүн, анхдугаар Богд Жавзандамба хутагтын ширээнд өргөмжлөн залах үеэс эхлэлтэй Монголын шашин соёлын томоохон арга хэмжээ билээ.
Гадаад, дотоодын жуулчдын анхаарлыг татдаг Жахар цам харайх болон монгол түмний их шүтээн Очирваань бурхны тахилгаар “Даншиг наадам-Хүрээ цам 2019” наадмыг нээнэ.
Энэ жилийн наадмаар 256 бөхийн барилдахын зэрэгцээ лам нарын дунд ном хаялцах, мэтгэлцэх, балин тосон урлалын тэмцээн зохиогддог ба цам харайх, маань татах, Соёмбот туг залах, шашны сүлд дуулал эгшиглүүлэх зэрэг олон сонирхолтой үйл ажиллагаа болдог билээ.
Уламжлал ёсоор тав дахь жилдээ зохион байгуулагдаж буй тус наадмыг дотоод, гадаадын жуулчид үнэ төлбөргүй үзэж, сонирхох боломжтой юм.