Далай ламын шуугиан тасрахгүй л байна. Тэрбээр саяхан Энэтхэгийн ерөнхийлөгчийн ордонд болсон хүүхдийн арга хэмжээнд оролцсон юм. Энэ үеэр тус улсын ерөнхийлөгч Пранаб Мукержитай уулзсан байна.
Тэгвэл өчигдөр буюу Баасан гарагт Хятадын гадаад явдлын яамнаас эсэргүүцлээ илэрхийлж мэдэгдэл гаргажээ.
Гадаад явдлын яамны хэвлэлийн төлөөлөгч Гэн Шуан “Саяхан Хятадын талын эсэргүүцлийг үл хайхран Энэтхэгийн тал 14 дүгээр Далай Ламыг ерөнхийлөгчийн ордонд болсон арга хэмжээнд оролцуулж, ерөнхийлөгч Мукержитай уулзах боломж олголоо. Хятад улс энэ явдалд харамсаж, хүчтэй эсэргүүцэж байна” хэмээн өгүүлсэн байна.
Өнгөрсөн долоо хоногт Нобелийн шагналт Кайлаш Сатяртигийн хүүхдийн сан уг арга хэмжээг зохион байгуулсан юм.
Энэтхэгийн талаас тус мэдэгдэлд хариу мэдэгдэл илгээжээ.
Мэдэгдэлд “Энэтхэгийн байр суурь тодорхой. Дээрхийн гэгээнтэн Далай Лам бол нэр хүндтэй шашны зүтгэлтэн. Түүний оролцсон арга хэмжээ нь улс төрийн бус, хүүхдийн сайн сайхны төлөө Нобелийн шагналтны зохион байгуулсан үйл явдал байсан” гэсэн байна.
О.ӨНӨР