Эрүүл мэндийн яамнаас “Covid-19” халдварын талаар ээлжит мэдээллээ хийлээ.
ЭМЯ-ны Тандалт, шуурхай удирдлагын хэлтсийн дарга Д.Нарангэрэл: “Covid-19” халдвар дэлхийн 216 орон бүс нутагт тархаж, 7.575 сая хүн өвчилж 422 мянган хүн нас барсан байна. Коронавирусийн халдвар АНУ, Өмнөд Америк, зүүн Азийн орнуудад эрчтэй тархаж байна. ОХУ-д сүүлийн 24 цагт 8779 хүн халдвар авчээ. Тувад 113 хүн шинээр өвчилж нийт өвчлөл 2027 болж дөрвөн хүн нас барсан. Үүнтэй холбоотойгоор хөл хорионы хатуу дэглэмтэй байгаа ч эмнэлгийн ачаалал өндөр байсан. Тиймээс Туватай хил залгаа Увс аймгийн Давст сум онцгой анхааралтай байх шаардлагатай байна.
Токио-Улаанбаатарын чиглэлийн онгоцоор өчигдөр ирсэн 261 хүнээс Цэргийн эмнэлэгт 12, бусад хүмүүсийг зочид буудлуудад тусгаарлалаа. Тусгаарлалтад 1-5 насны 49 хүүхэд, 21 жирэмсэн эх байна. Амны хаалтаа сайн зүүж, гараа ариутгаж, хүн хоорондын зайгаа сайн барих шаардлагатай байна” гэв. ХӨСҮТ-ийн захирал Д.Нямхүү: “VI сарын 11-нд гурван лабораторид нийт 241 хүнд шинжилгээ хийхэд 238 тохиолдлоос халдвар илрээгүй. Нурсултан-Улаанбаатарын онгоцоор ирсэн 181 хүнээс шинжилгээ авахад 3 хүнд коронавирус илэрлээ.
Өнөөдөр зургаан хүн эдгэрч ХӨСҮТ-өөс гарч, дараагийн ажиглалт руу шилжлээ. Эдгэрсэн хүмүүс бүгд оюутан. Дөрөв нь батлан хамгаалахын сургуулийнх бөгөөд хоёр нь эмэгтэй, дөрөв нь эрэгтэй” гэв.