ЭМЯ-ны газрын дарга Д.Нарангэрэл: “Дэлхийн 216 улс, бүс нутагт коронавирусийн халдвар бүртгэгдсэн бөгөөд нийт 20,226,094 хүн өвчилж, 13,313,723 хүн эдгэрэн, 741,113 хүн нас бараад байна.
Сүүлийн 24 цагийн дотор 216 мянган хүн шинээр халдвар авч дөрвөн мянга гаруй хүн нас баржээ.
Хөрш ОХУ-д 24 цагийн хугацаанд 4,945 хүн өвчилж, 130 хүн эндсэн бол БНХАУ-д 61 тохиолдол шинээр бүртгэгдсэн. Япон улсад өвчлөл өдрөөс өдөрт нэмэгдэж байгаа бөгөөд өчигдөр 700 хүн шинээр өвдөж, 5 хүн нас барсан.
Шинэ Зеландад 102 хоногийн дараа дотоодод дамжсан коронавирусийн эхний халдварын тохиолдол бүртгэгдлээ. Хүн амын дунд халдвар тараагүй гээд тайвширч болохгүйг дэлхийн бусад улсын жишээнүүд харуулж байна” хэмээв.
Түүнчлэн халуун бүлээн ам зайлах уусмал тогтмол хэрэглэж байх нь вирусийг устгах чадвартайг Германы эрдэмтэд нотолжээ. Францын ерөнхийлөгч гудамж талбай, олон нийтийн талбайд амны хаалт заавал зүүхийг уриалжээ. Мөн Финландад гадны орноос ирсэн бол 14 хоног өөрийгөө тусгаарлах, зөрчвөл 3 сар хорих шийдвэр гаргажээ.
Б.ОЮУНДАРЬ