УИХ дахь АН-ын бүлэг мэдээлэл хийлээ. УИХ дахь АН-ын бүлгийн дарга Д.Эрдэнэбат хэлэхдээ “АН-ын бүлэг намрын чуулганы үйл ажиллагаанд улс төр, нийгэм, төсөв санхүүгийн чиглэлээр дүгнэлтээ гаргаж байгаа. Төсвийн тухай, Тендэрийн тухай хуулийн ажлын хэсгийн мэдээллийг сонслоо. Намрын ээлжит чуулганаар АН-ын бүлэг эхэнд тавьж байсан асуудлаараа ажилласан. Эрх баригчдыг сөрөхийн тулд улайрч ажилласангүй. АН-ын бүлэг ямар асуудал оруулах талаар бодлогын шинжтэй асуудал дээр түлхүү ажилласан. Өнгөрсөн намрын чуулганы хугацаанд хууль хэлэлцүүлгийн асуудлаар төлөвлөсөн ажлаа амжилттай хийлээ. Мөнгө хүүлэлтийн эсрэг, Үндсэн хуулийн нэмэлт өөрчлөлт оруулах зэрэг зургаан хуулин дээр олон нийтийн нээлттэй хэлэлцүүлгийг амжилттай хийсэн. АН-ын бүлгээс Ерөнхий сайдад гурван удаагийн шаардлага сануулгыг хүргүүлсэн. Намрын чуулганы хугацаанд эдийн засгийн нөхцөл байдал сайжирч, ард иргэдийн амьдрал сайжирна гэсэн хүлээлт талаар болсон. Эдийн засгийн өсөлтийн үр дүн эрх баригчдад хүрч байгаа ч, ард иргэдэд хүрээгүй. Эрх баригчид дэндүү тансаглаж байна. Намрын чуулганаар эдийн засгийн шинжтэй хуулиуд үнэндээ гараагүй” гэв.
УИХ-ын гишүүн З.Нарантуяа “Өнгөрсөн нэг жилийн хугацаанд эдийн засгаа сэргээх бодлого Засгийн газарт дутагдалтай байна. Ялангуяа УИХ-аас эдийн засгийг сэргээх хөтөлбөрийн хүрээнд тавьсан зорилтоо хангалтгүй хэрэгжүүлсэн. Нөгөө л хэдэн хуулиа баталснаас өөр зүйл хийсэнгүй. Эдийн засгийн өсөлт нэмэгдсэн шалтгаан нь манай экспортын орлого нэмэгдсэнтэй холбоотой. 2017 онд нүүрсний үнэ 81 хувь, цайрын баяжмал 34 хувь, төмрийн хүдэр 23, түүхий нефть 18, алтны үнэ 15 хувь, зэсийн баяжмал 8 хувиар тус тус өссөнтэй холбоотой” гэв.
УИХ-ын гишүүн Б.Пүрэвдорж “Цаашид төрийн байгууллагуудын төсвийг хэрхэн зарцуулж байгааг шалгасан. Хамгийн эхэнд ХЗДХ-ийн сайдын унаж буй 570 машины төсвийг шалгасан. Ер нь бол ХЗДХ-ийн яамны төсөвт суулгаж зарцуулагдах ёстой байтал Ц.Нямдорж сайдад ШШГЕГ-аас сайдын хэрэгцээнд худалдан авч өгсөн байна. Энэ талаар тус яамны Төрийн нарийн бичгийн дарга Г.Баясгалан, ШШГЕГ-ын дарга Ц.Амгаланбаяр нараас албан бичиг ирсэн байгаа. Уг албан бичигтээ “ШШГЕГ-ын давсан орлогоор 570 машин худалдан авч өгсөн” гэсэн байна. Төсөв хүнд, мөнгө хүрэлцэхгүй байна гэж ярьчихаад 347.1 тэрбум төгрөгийн хэрэгцээгүй худалдан авалт хийсний ердөө нэг жишээ нь л энэ машин. Энэ машин бол ажилдаа үлдэх гэсэн пальдига нөхдүүдийн л хийсэн ажил гэж харж байгаа” гэв.
УИХ-ын гишүүн Ж.Батзандан “Намрын чуулганы хугацаанд эрх баригч нам ОУВС-д хөтлөгдсөн намрын чуулган байлаа гэж дүгнэж байгаа. Есөн төрлийн татвар нэмчихээд ганц нэгийг нь л буулгаж эргэж хургасан намрын чуулган байлаа гэж дүгнэж байна. Олон шийдвэрээсээ эргэж буцсан. Бараа таваарын үнэ, бензин шатахууны үнэ нэмэгдсэн намрын чуулган байлаа. Татварын бодлогын зохицуулалтын тал дээр эрүүл саруул, алсыг харсан бодлого дутагдлаа. Намрын чуулганы хугацаанд Засгийн газраа унагасан, талцаж барилцсан намрын чуулган байлаа. Ядуурал эрс нэмэгдэж, дундаж давхарга байхгүй болсон намрын чуулган байлаа. МАН хэлснээсээ буцсан, буцдаг гэдгээ харуулсан намрын чуулган байлаа.