“Зуун дамнасан наян жилийн түүх” гэрэл зургийн үзэсгэлэн өнөөдөр нээлтээ хийлээ. Өнгөрсөн 80 жилийн хугацаан дахь усны салбарын сэргэлт, уналт, зэрэг устай холбоотой зургуудыг та Монголын Үндэсний музейд энэ сарын 31-ийг хүртэл үзэх боломжтой юм.
Энэхүү үзэсгэлэнгийн нээлтэнд УИХ-ын гишүүн, Байгаль Орчин Аялал Жуучлалын сайд, Монгол Улсын Үндэсний хорооны дарга Н.Цэрэнбат, УИХ-ын гишүүн МАН-ын бүлгийн Дэд дарга Б.Саранчимэг, Барилга, Хот Байгуулалтын Дэд сайд Ш.Лхамсүрэн, Монголын Усны Академийн ерөнхийлөгч С.Чулуунхуяг нар хүрэлцэн ирлээ.
Энэ үеэр Монголын Усны Академийн ерөнхийлөгч С.Чулуунхуяг “Өнөөдөр дэлгэж буй энэхүү үзэсгэлэнд нэгдмэл усны аж ахуйн салбарын үйл ажиллагаа улс орны хөгжилд ямар их үр өгөөж бий болгодог, цөөхөн ардын гар худгаас эхлээд монгол орны нийт бэлчээрийн 50 хувийг буюу 66,6 сая га бэлчээр сумдын 17400 орчим га талбайг услалтын орчин цагийн системээр тус тус усжуулсан Улаанбаатар, Дархан, Эрдэнэт зэрэг олон хот суурин гарын мянга мянган айл өрхийг төвлөрсөн ус хангамж, ариутгах татгуургын системд холбож, амьдралын тавтай орчинг бүрдүүлэх үйл ажиллагааны тухай өгүүлэх гэрэлт зурагнууд тавигдсан.
Мөн Монгол орны гол мөрний судалгаа Тайшир, Дөргөн, Богд зэрэг арав гаруй усан цахилгаан станцын бүтээн байгуулалтын ажил, төрөөс усны талаар авч хэрэгжүүлсэн, тэдгээрийг шинжлэх ухааны үндэслэлтэйгээр шийдвэрлэхэд эрдэм шинжилгээний хүрээлэн, байгууллагуудын үүрэг, ач холбогдлыг итгэсэн дурсамж сэргээсэн олон зураг мөн тавьсан байгаа.
Чулуу байрнаасаа хөдлөхөд гурван жил байраа олох гэж зүдэрдэг гэдэг. Харин харьяа яам нь татан буугдахад 30 жил чиглэлээ олох гэж зовдог бололтой. Сүүлчийн усны аж ахуйн яам татан буугдахад усны салбарт 6000 ажилтан, 1200 гаруй сайтар боловсорсон инженер, техникийн ажилтан өөр өөрийн замаар таран явсан. Усны салбар олон арван жил хөл дээрээ тэнцэх гэж, олон Засгийн газрын нүүр харж яваа ч тоймтой бодлогыг зэхцэлсэн, иргэд бүрд танигдахаар тийм үйл ажиллагаа одоо хүртэл үгүйлэгдэж байгаа билээ. Учир нь Усны салбарыг нэгтгэн босгож, олон жилийн хугацаанд асар их хэмжээний устай холбоотой барилга байгууламж баригдсан боловч зах зээлд шилжсэн ерээд оноос эзэнгүй болж тоногдон эвдэрч, дахин ашиглах боломжгүй болгосон, 1997 оны нэгдүгээр сард Усны хайгуул, төсөл, эрдэм шинжилгээний институт болох Усны бодлогын хүрээлэнг татан буулгаж, ШУА-ийн харьяанд шилжүүлснээр төрийн бодлогыг шинжлэх ухааны үндэслэлтэй хэрэгжүүлэх ажлын цар хүрээ хумигдаж, хүний нөөцийн бодлого задарсан. 2005 онд Байгаль орчны яамны харьяа Усны хэрэг эрхлэх газрыг байгуулж, 2012 онд мөн л татан буулгасан зэрэг гунигтай, түүхийг өгүүлэх зураг ч бас тавигдсан” гэв.
Г.МӨНХЦАЦРАЛ
