Өнөөдөр талбай дээр чопперчид намрын хаалтаа хийж цугларав. Мотороо хүржигнүүлэн элдэв гоёл чимэг зүүсгэлээ гялалзуулан давхилдах сүрлэг чопперчин залуус нийслэлчүүд бидний хувьд харь үзэгдэл байхаа болиод удлаа. Өмнө нь хэсэг бүлгээрээ давхилддаг байсан бол тэд 5 жилийн өмнөөс холбоо болон өргөжиж 2 жилийн өмнөөс дэлхийд данстай MC club болсон гэнэ.
Түүнчлэн замын хөдөлгөөнд соёлтой оролцох, холбогдох дүрэм журмыг хэрэгжүүлэх зорилгоор 5 жилийн өмнөөс Замын цагдаагийн газартай хамтран ажиллах гэрээ байгуулжээ. Гэрээний дагуу чопперчид тусгай үнэмлэхтэй болж, хэн гэдэг ямар мотоциклчин явж байгааг нь энгэртээ өөрийн овог нэр, ар нуруундаа таних тэмдэг лого байрлуулсан хантааз зэргээр таньдаг болсон байна.
“Chinggis MC”мото клубын дэд тэргүүн Алекс хэлэхдээ “Энэ жилийн намрын хаалтанд 7 клубын 300 гаруй чопперчид оролцолоо. Бид үргэлжлүүлээд хотоор парад хийж явна. Хаалтын үйл ажиллагаанд Хятад, Оросоос хүмүүс ирж оролцож байгаагаараа онцлог болж байна.” гэв.
