Амьд хөгжмийн гайхамшиг, эрч хүчийг мэдрүүлдэг “Чоно” хамтлаг уран бүтээлээ завсарлаад хэдэн жилийг үдсэн. Тэгвэл тус хамтлаг өнгөрсөн онд эргэн нэгдэж уран бүтээлээ хийж эхлээд байгаа юм. Энэ удаад “Чоно-2018” тоглолтынхоо талаар хэвлэлийн хурал хийлээ. Энэ нь тус хамтлагийн бие даасан дөрөв дэх албан ёсны тоглолт юм. Дөрөвдүгээр сарын 20-ны өдөр CROCUS EVENT HALL-д 19:00 цагаас болох аж. Мөн тус хамтлаг тоглолтондоо зориулан гаргасан шинэ цомгоо хүлээж аваад байна.
Энэ талаар хамтлагийн ахлагч, дуучин Д.Дэрмээгээс тодрууллаа.
“Сүүлчийн хичээлийн дараа” дууг шинэчилж дуулсан. Клипэнд зориулж шилдэг зураг шалгаруулна гэсэн. Зургуудаа хэрхэн шалгаруулах вэ?
“Сүүлчийн хичээлийн дараа” дууг шинэчилсэн найруулгатайгаар бусад уран бүтээлчидтэйгээ хамтран дуулсан. Үе үеийн төгсөгчид гэрэл зургаа явуулснаар шилдэг 10 зургийг шалгаруулж клипэнд оруулна. Хамгийн их лайк авсан эхний арван зургийг шалгаруулах юм.
Арван жилийн дараа тоглолтоо хийж байна.Бусад тоглолтоос ямар онцлогтой вэ?
Манай хамтлаг 2017 онд эргэн нэгдсэн. Дөрвөн хуучны уран бүтээлээ сэргээж, хамтлаг дуучидтай хамтарч дуулсан. Шинээр дөрвөн клип хийсэн. Хамгийн сүүлд “Сүүлчийн хичээлийн дараа” дуугаа шинэчилж хоёр гавъяат, дуучин Б.Баярцэцэгтэй хамтарч дуулсан. Хөгжмийн зохиолч Б.Чинбаттай хамтарч сонгодог оркестир хэв маягаар гаргасан. Мөн “Залуу нас” дууг Icetop хамтлагийн Боогийтой хамтарч дууллаа. Бид нэгдэн жил гаруй уран бүтээлээ хийсний дараа тоглолтоо үзэгч, фэнүүддээ толилуулах гэж байна.
Тоглолтонд хэдэн дуу дуулагдах вэ?
Нийт 25 дуу дуулагдана.
Шинэ цомог худалдаанд гарсан уу?
CD бол худалдаанд хараахан гараагүй байна. Тоглолтонд ирсэн үзэгчид 20000 төгрөгөөр худалдаж авах боломжтой. Концертны дараа худалдаанд гаргана. Мөн 70000 төгрөгний билет авсан үзэгчиддээ шинэ цомгоо бэлэг болгоно.
Цомогт хэдэн шинэ уран бүтээл орсон бэ?
Цомогт есөн цоо шинэ уран бүтээл орсон. Нэг уран бүтээл нь “Хар сарнай” хамтлагийн “Бүтээнэ сөнөөнө” дууг хамтарч дуулсан.
Хуучин баг бүрэлдэхүүн бүгд байгаа юу?
Ер нь бол бүгд байгаа. Хуучин хамтлагийн нэг гишүүн албан ёсоор өөр хамтлагт орсон. Тэр гишүүн маань ирж, хамт хоёр дуу тоглоно. Гурван туслах хөгжимчин байгаагаас хоёрдаралтат хөгжим, нэг гитар орж байгаа.
Язгуур урлагийг шингээсэн хэдэн дуу байна?
Тоглолтонд маань хоёр дуу орж байгаа. Шууд язгуур урлагийг шингээсэн этник чиглэлрүү орж болохгүй. Энийг маш багаар өөрсдийн стиль руу рок урсгал руу ивсэн чиг хандлагатай явж байна.
Үзэгчид, фэнүүд хэр хүлээлттэй байна вэ?
Хүлээлт их байсныг мэдэрсэн. Үзэгч фенүүд маань яагаад тарчихав, шалтгаан юу байв гэсэн асуултууд удаа дараа тавьж байсан. Нэгдэх болсон шалтгаан бол эстрад рок поп урлагт өөрийн гэсэн хувь нэмрээ оруулж үлдэх. Бидний хийх ёстой цаг үе нь ирчихсэн байна. Манай хамтлаг 10-аад жилийн хугацаанд уран бүтээлийн хувьд зогсонги байсан. Гол зорилго маань энэ цаг үеийн рок попын төлөөлөл альтернатив чиглэлийг улам хөгжүүлэхэд бид байх ёстой гэсэн үүднээс нэгдсэн. Хамгийн гол нь сайн уран бүтээлүүд залуучууддаа хүргэх хэрэгтэй. Үндэснийхээ язгуур урлаг уртын дуу, морин хуураа рок хөгжимтэй хослуулж шинэ зүйлийг эрэлхийлж хайх зорилготой.
Цаашдаа ямар уран бүтээлүүд хийх төлөвлөгөөтэй байна?
Монгол язгуур урлагаа таниулах. Эстрад, рок хөгжимтэй хольж этник чиглэлийн урсгалыг маш сайн таниулах зорилготой байгаа. Концертын дараа шинэ цомгийн бичлэгт орно. Эх орон, хайр, ээж аав гэсэн мөнхийн сэдвүүд шингэсэн дуунууд байх юм. Энэ цомогтоо хоёроос гурван эх орны дуу оруулахаар ажиллаж байна. Мөн хуучны дуунуудаа залуучууддаа зориулж, сэргээн дуулна. Мөн бид “S” энтертайнмэнттай хамтарч ажиллаж байгаа. Бидний ард техникийн маш том баг ажиллаж байна. Бэлтгэл хангагдаад 100 хувь бэлэн болсон.
Б.НОМИН-ЭРДЭНЭ