Эрүүл мэндийн сайд Т.Мөнхсайхан хатуу хөл хорионы үед эмнэлгүүдийн бэлэн байдал болон эмнэлгийн тусламж, үйлчилгээний хүртээмжийг иргэддээ үзүүлж буй нөхцөл байдлыг шалгаж өнөөдөр Сүхбаатар болон Чингэлтэй дүүргийн нэгдсэн эмнэлэгт ажиллалаа.
Тэрбээр дүүргүүдэд ажиллах үеэрээ өгсөн үүрэг чиглэлийн биелэлт, халдварын үед тоног төхөөрөмжийн ашиглалт, эмч, ажилтнуудын аюулгүй байдлыг хангаж ажиллаж байгаа зэрэгтэй танилцсан юм.
Сүхбаатар дүүргийн нэгдсэн эмнэлгийн хувьд Баянзүрх дүүргийн нэгдсэн эмнэлэгт тусламж үйлчилгээг хязгаарласантай холбогдуулан өнгөрсөн хугацаанд 16 хорооны 147 иргэнд тусламж үйлчилгээг нэмэлтээр үзүүлсэн байна. Мөн дүүргийнхээ диализийн аппаратад ордог иргэдээ өдрийн цагаар, оройн цагаар Баянзүрх дүүргийн иргэдийг нэмж халдвар хамгааллыг сахин оруулж байгаа юм. Түүнчлэн Сүхбаатар дүүргийн иргэддээ эмнэлгийн тусламж, үйлчилгээг аюулгүй байдлыг ханган үзүүлж байгаа, мөн эрүүл мэндийн сайдын шийдвэрлэж өгсөн рентген аппаратыг суурилуулан тусламж, үйлчилгээндээ ашиглаж байгаагаа танилцууллаа. Халдвар хамгааллын дэглэмийг сахин үйлчлүүлэгчдэдээ болон эмч, ажилтнууддаа давхар анхаарч ажиллаж байгаагаа тус эмнэлгийн дарга Д.Чимгээ хэллээ.
Энэ үеэр Эрүүл мэндийн сайд нийслэл, дүүргийн эрүүл мэндийн байгууллагуудын удирдлагуудтай цахимаар хуралдаж, цар тахлыг хамтын хүчээр эрсдэл багатай даван туулах, нөгөө талдаа нийт иргэддээ зайлшгүй эмнэлгийн тусламж үйлчилгээгээ аюулгүй байдлаа ханган үзүүлэх тал дээр анхаарч ажиллахыг санууллаа.
Сүхбаатар болон Чингэлтэй дүүргийн нэгдсэн эмнэлгүүдийн хувьд амьсгалын замын өвчтэй иргэдийг тусдаа хаалгаар тусдаа урсгалаар хүлээн авах, нийт эмч ажилтнуудаа болон хэвтэн эмчлүүлж буй иргэдийг PCR шинжилгээнд бүрэн хамруулах үүрэг чиглэлийг биелүүлсэн байв.
Эрүүл мэндийн сайд Чингэлтэй дүүргийн нэгдсэн эмнэлэгт ажиллах үеэрээ тус эмнэлэгт PCR шинжилгээний аппаратыг ирэх долоо хоногт суурилуулан өгч, ЗӨСҮТ-ээс мэргэжилтнүүдийг сургаж, мэргэжил арга зүйгээр хангуулахаар болов. Ингэснээр Чингэлтэй дүүргийн иргэдэд цаг алдалгүй шуурхай шинжилгээ хийх боломжтой болж байгаа юм. Харин тус эмнэлгээс лаборатори байгуулах гурван өрөө, ажиллах хүний нөөцөө бэлдэхийг үүрэг болголоо.