Category: соёл-урлаг

“Хурд”, “Харанга” хамтлагууд өнөөдөр 14:00 цагаас Д.Сүхбаатарын талбайд тоглолт хийнэ. Хоёр хамтлагийн уран бүтээлчид нийт 10 гаруй уран бүтээлээ хүргэх ба тоглолт үнэ төлбөргүй, хүссэн хүн болгон Төв талбайд ирж үзэх боломжтойг зохион байгуулагчид онцоллоо. 1989 оны арванхоёрдугаар сарын 10-нд буюу яг энэ өдөр ардчиллын төлөөх хөдөлгөөн оргилдоо хүрч байжээ.

Энэ өдөр Монголын Ардчилсан Холбоо анхны цуглаанаа хийж олон намын систем тогтоох, хүний эрхийг дээдлэх, бүх нийтийн сонгуулийг хугацаанаас нь өмнө 1990 оны эхний хагаст багтаан явуулах, хэлмэгдэгсдийг цагаатгах, хэвлэлийн эрх чөлөөг баталгаатай болгох зэрэг 13 зүйлийн шаардлага тавьснаар Монголд ардчилсан хувьсгал эхэлснийг зарлан тунхагласан түүхтэй.

Монгол Улсын 6 удаагийн “Латин формейшн” бүжгийн аварга “Moon dance” хамтлагийн бүжигчид Германд болох ДАШТ-д оролцохоор тус улсыг зорив.

Тэд дэлхийн цэнгээнт бүжгийн шилдгүүдтэй 6 дахь удаагаа өрсөлдөх гэж байгаа бөгөөд “Мөсөн хатан” бүжгээр Дэлхийн аваргын цомыг хоёр удаа хүртжээ. Мөн ДАШТ-ий шагналт тав, зургадугаар байрт шалгарч байсан юм. Маргааш буюу 12 дугаар сарын 7-нд эхлэх ДАШТ-д “Moon dance” хамтлагийнхан “Шонхор” бүжгээрээ өрсөлдөх юм байна.

Нийслэл Улаанбаатар хотыг Зүүн Азийн бизнес, аялал жуулчлал, соёл, санхүүгийн төв болох зорилтын хүрээнд олон улсын чанартай соёл, урлагийн томоохон наадам, үйл ажиллагаануудыг зохион байгуулж байгаагийн нэг нь “UB DANCE” орчин үеийн бүжгийн наадам юм. Энэхүү наадмыг дөрөв дэх жилдээ Нийслэлийн Соёл, урлагийн газар болон “Экстрим крейв студио” хамтран зохион байгуулагдах гэж байна.

Орчин үеийн чөлөөт бүжгийн бүх төрлүүдийг хамарсан наадам болохоос гадна хамтлаг бүжгийн төрлөөс гадна Hiphop, Electro, Breakdance гэсэн соло төрлүүдээр орох аж. Тус наадмын анхан шатны шалгаруулалт арваннэгдүгээр сарын 24-нд болсон бөгөөд нийт 400 гаруй хүүхэд залуус өрсөлджээ. Тус наадмаар дамжуулан их хотын соёлыг танин мэдүүлж, гадны нэр хүндтэй зочидтой туршлага солилцож, суралцан чөлөөт цагаа зөв боловсон өнгөрүүлэх боломжийг олгодгоороо онцлогтой юм. Наадмын шилдгүүдийг тодруулах тэмцээн арваннэгдүгээр сарын 30-ны өдөр Хас банкны бүжгийн /хуучнаар Ард театр/ зааланд болох юм байна.

Италийн Флоренц хотод болсон 41 дэх удаагийн Олон улсын эмэгтэй кино уран бүтээлчдийн наадмаас Монголын залуу жүжигчин, мисс А.Баярцэцэг “Шилдэг жүжигчин” шагнал хүртлээ.

Тэрбээр Төрийн шагналт, зохиолч Д.Норовын “Хөх тавилан” туужаас сэдэвлэн бүтээсэн уран сайхны киноны гол дүрд тогложээ. Энэ нь түүний кинонд бүтээсэн анхны дүр юм.

Энэ киноны зураг авалтын өмнөхөн хамгийн дотно, хайртай хүмүүсээ ар араас нь алдсан, амьдралын маань хамгийн гунигтай үеийн нэг байсан. Гэвч аав, ээж, эмээ, өвөөгийн маань нутаг Говь-Алтайн “Ээж хайрхан” гэж сайхан уулын ар өвөрт үйлд явдал нь өрнөсөн уран бүтээл намайг хүн болгосон, бас жүжигчин болгосон. Олон улсын кино наадамд анх удаа оролцож, Монголын минь тэнгэр хангай ивээж, надаас хавь илүү, туршлагатай, мэдрэмжтэй, мэргэжлийн олон уран бүтээлч, жүжигчдийнхээ тус дэмээр бүтсэн дүр маань Монголынхоо нэрийг гаргалаа. Монголын кино урлаг мандтугай” гэж шагнал авахдаа Б.Баярцэцэг хэлсэн байна.

Энэ киног Т.Алтантуяа найруулан 2019 онд дэлгэцэнд гаргасан юм. Гол дүрд А.Баярцэцэг МУСТА жүжигчин С.Болд-Эрдэнийн хамт тоглосон байна.

ОХУ-ын “Ленфильм” студи Халх голын дайны тухай баримтат кино хийж байна. Киног найруулагч Андрей Егоров, зураглаач Максим Шварцкопф, жүжигчин Владимир Ярош нар бүтээж байгаа аж.

Энэ тухай “Ленфильм”-ийн Ерөнхий захирал Эдуард Пичугин ярихдаа “Бид Халх гол дээрх баатарлаг үйл явдлын тухай кино хийж байна. Кинонд энэ дайны тухай маш ховор материал ашиглаж байгаа. Урьд өмнө олны хүртээл болж байгаагүй ховор зураг, бичлэг, баримтыг Оросын түүхийн нийгэмлэг болон ОХУ дахь Монголын Элчин сайд асан Б.Дэлгэрмаа нар бидэнд өгсөн. Зураг авалт, монтаж арванхоёрдугаар сарын 20-н гэхэд дуусна” хэмээн тус киноны найруулагч Андрей Егоров сэтгүүлчдэд ярьжээ.

Токио хотод жил бүр болдог “Цүрүкава” богино хэмжээний кино наадамд Монголын залуу уран бүтээлч, найруулагч Ц.Дэнсмаагийн “Аргал” кино тусгай шагнал хүртжээ. Уралдаанд нийт 92 бүтээл ирснээс 24 бүтээлийг шилдгээр сонгосон байна. Сонгосон бүтээлүүдийг арваннэгдүгээр сарын 22-ны баасан гаригт олны хүртээл болгож, шагнал гардуулах ёслол 11-р сарын 23-ны бямба гаригт болж өндөрлөжээ. Найруулагч Ц.Дэнсмаагийн “Аргал” кино долоон минут үргэлжлэх бөгөөд монголчуудын өвөрмөц ахуй, зан заншлыг харуулснаараа онцлог бүтээл болжээ.

БНСУ-ын Сөүл хотод болсон хоёр хүний жүжгийн олон улсын фестивальд УДЭТ-ын залуу жүжигчин Г.Алтангэрэл, Г.Номуун нар оролцож тусгай шагнал хүртсэн байна. Энэ сарын 6-10-ны өдөр 19 дэх удаагаа болсон тус фестивальд Грек, Украин, Солонгос, Монгол, Румын улсын уран бүтээлчид өрсөлджээ. Монгол Улс анх удаа В.Красногоровын “Хувь заяаны хүлээс” хэмээх хоёр хүний төрлийн жүжгээр олон улсын фестивальд оролцлоо. Улсын драмын эрдмийн театрын залуу найруулагч О.Итгэл уг жүжгийг найруулан тавьжээ.

Өнгөрсөн баасан гаригт Буянт-Ухаа цогцолборт болсон Монгол улсын гавьяат жүжигчин Төмөрийн Ариунаагийн “Тэнгэр шиг бай” тоглолт үнэхээр олны нүд, чихийг баясгасан сайн тоглолт болсныг үзэгчид ч, сошиал орчинд, хэвлэл мэдээллүүд ч шуугин бичиж байна.

Арван жилийн дараа тайзнаа бүрэн хэмжээний тоглолтоо хийхдээ тэр ямархан авьяастай, ямархан хөдөлмөрч уран бүтээлч гэдгээ дахин баталж харуулж чадсан. Мэргэжлийн дуулалт, бүжиглэлт, тайз, хамтрагчид, үзэгчдээ хүндэтгэсэн гайхалтай хувцаслалт, донжлог малгай, үсний зүүсгэл, нүд гялбам гутал. Ерөөсөө Т.Ариунаа толгойн оройноос, хөлийн үзүүр хүртлээ бүх зүйл нь өв тэгш, төгс төгөлдөр байж тайзнаа 30 жил дуулж байгаа уран бүтээлч ямар чансаа, зэрэг зиндааг харуулах ёстой хичээлийг заалаа гэж болно. Түүний өмссөн гуталнууд гэхэд донж маяг нь хэтэрхий гэмээр бүх зүйлтэй төгс зохицож чаджээ.

Дуулианы эзэн дуучин Т.Дэлгэрмөрөнтэй алдарт жүжгийн дуугаа дуулахдаа өмссөн донжлог хар малгай, яв ягаахан даашинз, битүү шигтгээт өндөр өсгийт нь түүнийг тайзнаа тэр чигт нь гялалзуулж чадсан. Үнэхээр өөрөө хэлсэн шиг гүнж мэт харагдаж байв.

Т.Ариунаагийн өмссөн шигтгээтэй өсгийт нь Италийн алдарт брэнд “Loriblu”-гийн лимитэд эдишн буюу цөөн загвараар гардаг онцлох загварын гутал байлаа. Битүү сваровски шигтгээг гар аргаар нэгбүрчлэн суулгасан энэ загвар дэлхий даяар гарын арван хуруунд хүрэхтэй үгүй тоотой үйлдвэрлэгдэж, түүнийг нь дэлхийд алдартай бүсгүйчүүд хэрэглэдэг гэхээр манай дуучин үзэгчдээ, тайзаа хэр хүндэтгэсэн нь харагдана. Угаасаа цэнхэр ултай “Loriblu”-г Холливудын одод онцгойлон сонгодогоороо алдартай. Т.Ариунаагийн гоолиг шулуун хөлөнд гойд зохисон энэ загвар бол “Loriblu”-гийн үнэтэй гуталнуудын нэгт тооцогддог бөгөөд 2400 евро буюу манайхаар 7.2 сая төгрөгийн үнэтэй. “Тэнгэр шиг бай” тоглолтын тухай сурвалжлага дээрх олон фото зураг дунд дуучны энэхүү алдарт гутал бүхий хөлний зураг тавигдсан нь уг тоглолтын бүх зүйл төгс байсныг баталсан хэрэг юм.

Ер нь дуучин Т.Ариунаа “Loriblu” брэндийг онцгойлон сонгодог нь энэхүү гайхалтай тоглолтынхоо ихэнх гутлыг тус брэндээс сонгосноос нь анзаарагдаж байгаа юм. Түрийтэй цахилгаантай байкер гутал, од мэт шигтгээ шигтгэсэн илгэн гутал, том, том шар сваровски шигтгээтэй өсгийт гээд тус брэндийн олон гутлыг тэр өмсчээ. Магадгүй дуулангаа эрч хүчтэй бүжиглэлтийг үзүүлж чаддаг түүн шиг уран бүтээлчид гурав дөрвөн цагийн турш тасралтгүй хөдлөхөд хөлийн нумд тааруулж, гар ажиллагаа орсон чанартай гутал хамгийн том түшиг болдог биз ээ. Т.Ариунаагийн “Тэнгэр шиг бай” тоглолт бүх зүйлээрээ тэнгэрлэг уран бүтээлчийн чансаа, чадварыг дахин дахин харуулж чадлаа.

Монгол Улсын филармонийн “Баян Монгол” чуулгын 50 жилийн ой энэ жил тохиож байна. Тэгвэл тус ойн баярын концерт энэ сарын 30-нд 16:00 цагт “Корпорейт” центрийн концертын танхимд болох аж.

Түүнчлэн уг тоглолтод “Баян Монгол” чуулга, урлагийн гавьяат зүтгэлтэн, удирдаач Б.Ганбат, урлагийн гавьяат зүтгэлтэн Б.Нямдорж, соёлын тэргүүний ажилтан С.Саруул-Од, дуучин, соёлын тэргүүний ажилтан Н.Наранбаатар, Ц.Хулан, Л.Насанбуян, Б.Дэлгэрбаяр, дуучин Б.Солонго оролцох аж.

Түүнчлэн “Баян Монгол” чуулгын ойн баярт урилгаар “Харанга”, “Никитон” хамтлаг, гавьяат жүжигчин Х.Төмөрбаатар, соёлын тэргүүний ажилтан Н.Оюунчимэг, Б.Хонгор болон дуучин Ж.Ариунжаргал нар оролцоно.