Category: утга-зоxиол
ЗХУ-ын дөрвөн удаагийн баатар, БНМАУ-ын баатар, ЗХУ-ын маршал Г.К.Жуковын мэндэлсний 125 жилийн ойн арга хэмжээ өнөөдөр Улаанбаатар дахь Русский домд болов.
ЗХУ-ын цэрэг, улс төрийн нэрт зүтгэлтэн, цэргийн гарамгай жанжин, ЗХУ-ын дөрвөн удаагийн баатар, БНМАУ-ын баатар, ЗХУ-ын маршал Г.К.Жуков нь Бүгд Найрамдах Монгол Ард Улсын Дорнод хязгаар нутагт өрнөсөн Японы түрэмгийлэгчдийн эсрэг Халхын голын байлдаанд Зөвлөлт-Монголын хамтарсан Армийн I бүлгийг командлан ялалт байгуулсан юм. Манай улсын тусгаар тогтнол, газар шорооны бүрэн бүтэн байдлын төлөө байгуулсан гавьяаг нь өнө мөнхөд бахархан, залуу хойч үедээ таниулан сурталчилж, гүнээ хүндэтгэл үзүүлэх ёслолын арга хэмжээ Улаанбаатар дахь Русский дом буюу Оросын шинжлэх ухаан, соёлын төвд болж байна.
Уг арга хэмжээнд БХЯ-ны удирдлага, газрын дарга нар, БХЯ-ын харьяа байгууллагууд, ОХУ-аас Монгол Улсад суугаа ЭСЯ-ны цэргийн аттеше, хэвлэлийн атташе, Бүгд Найрамдах Беларус Улсаас Монгол Улсад суугаа Элчин сайд, Беларус Улсын Өргөмжит Консул, Бүгд Найрамдах Казахстан Улсаас Монгол Улсад суугаа Элчин сайдын I нарийн бичгийн дарга, Соёлын яамны дэд сайд, ЕБС-ийн багш сурагчид /Орос хэлний төвийн/, музейн ажилтан алба хаагчид, “Монгол Хурандаа” нийгэмлэг, ахмад дайчдын төлөөлөл, хэвлэл мэдээллийн ажилтнууд оролцоно.
Өнөөдрөөс эхлэн ОШУСТ-ийн зочид ЗХУ-ын маршал Г.К.Жуковтой холбоотой гэрэл зургийн үзэсгэлэн, “Г.К.Жуков сонины хуудаснаа….”, “ЗХУ-ын маршал Г.К.Жуковын хувийн хэргийн баримт материалаас….” сэдэвт архивын хосгүй эх баримтаар дэглэгдсэн үзэсгэлэнг хүрэлцэн ирж үзэхийн сацуу “ЗХУ-ын маршал Г.К.Жуковт зориулсан хөшөө дурсгалууд”-тай бас танилцаад гарах боломжтой болно.
ОШУСТ-д болох тус үзэсгэлэнгийн нээлтийн ёслол “Зовох цагт нөхрийн чанар танигдана” хүүхдийн үлгэрийн номын танилцуулгаар үргэлжилж, маршал Г.К.Жуковын тухай ”Агуу Азийн ард түмний эсрэг түрэмгийлэгч аричууд” баримтат киногоор өндөрлөх юм.
Монголын зохиолчдын эвлэлийн дэргэдэх Архангай аймгийн “Хантамир” утга зохиолын нэгдэл “Хангайн цом” яруу найргийн наадам боллоо.
Энэ жилийн яруу найргийн наадам халхын анхдугаар Зая бандида, билгүүн номч, соён гэгээрүүлэгч Сунтарын Лувсанпэрэнлэй хутагтын мэндэлсний 380 жилийн ойг угтан түүний нэрэмжит болж байгаагаараа онцлог болов.
“Хангайн цом” яруу найргийн наадам нь 1980-аад оноос үүдэлтэй бөгөөд зөвхөн аймгийнхаа хэмжээнд тэмдэглэдэг байсан бол 2018 оноос улсын хэмжээний болгон өргөжээ.
Энэ жилийн наадамд 21 аймгаас 86 бүтээл ирснээс шилдэг 15 найрагчийг шалгаруулж, МЗЭ-ийн болон Монголын Урчуудын эвлэлийн шагналт, зохиолч М.Амархүү тэргүүлж, өргөмжлөл мөнгөн шагналаар шагнууллаа.
Наадмын шүүгчээр Нацагдоржийн нэрэмжит шагнал хүртээд удаагүй байгаа зохиолч яруу найрагч О.Содномпил, П.Батхуяг болон Архангай аймаг дахь утга зохиолын нэгдлийн дарга, яруу найрагч Ц.Мөнхбаяр, Болор цомын эзэн яруу найрагч О.Цэнд-Аюуш нар шүүн тунгаалаа.
“Болор цом” наадмын бүртгэл эхэллээ
Монголын зохиолчдын эвлэлээс жил бүр уламжлал болгон зохион байгуулж, оны шилдэг яруу найрагчийг тодруулдаг “Болор цом” наадмын бүртгэл эхэллээ.
39 дахь удаагаа зохион байгуулагдах гэж буй эл наадамд “уралдах” шүлгийг энэ сарын 24 хүртэл МЗЭ-ийн 206 тоот өрөөнд хүлээн авах аж.
Түүнчлэн бүртгэлийн хураамж гурван мянган төгрөг бөгөөд э-майл болон факсаар хүлээж авахгүй хэмээн зохион байгуулагчид анхааруулав.
Наадамд оролцох найрагчид зөвхөн энэ онд бичсэн хоёр шүлгээ бүртгүүлэх юм байна.
“Болор цом-38” наадам Цагдаагийн “Сүлд” чуулгад болж, МҮОНР-ийн сэтгүүлч, МЗЭ-ийн шагналт, яруу найрагч О.Цэнд-Аюуш түрүүлсэн билээ.
Ардын хувьсгалын 100 жилийн ойг тохиолдуулан Соёлын яам, Засгийн газрын хэрэгжүүлэгч агентлаг Соёл урлагийн газар, Шинжлэх ухааны академийн хэл зохиолын хүрээлэн, МЗЭ хамтран “Утга зохиолын шилдэг бүтээл” уралдааныг зохион байгуулав. Үүнд хүүхдийн жүжиг, тууж, роман, утга зохиолын шүүмж судлал гэсэн төрөлд 200 гаруй бүтээл өрсөлджээ.
Уралдааны романы төрөлд Соёлын гавьяат зүтгэлтэн Д.Цэнджав “Босоо жаран” романаараа тэргүүн байр эзэлж, Азийн шилдэг яруу найрагч, зохиолч Д.Урианхай дэд, утга зохиол судлаач Ш.Цэнд-Аюуг гуравдугаар байрт оров.
Ирээдүй хойч үеийнхэнд эх орон, тусгаар тогтнолын үнэ цэнийг мэдрүүлэх, эх оронч үзэл төлөвшүүлэхэд түүхэн ач холбогдолтой “Шивээ хиагт” дуурийг Улс тунхагласны баярын өдөр тайзнаа амилуулах гэж байна.
Уг дуурь анх 1971 оны арванхоёрдугаар сарын 12-ны өдөр Дуурь бүжгийн эрдмийн театрын тайзнаа Хөдөлмөрийн баатар, ардын жүжигчин Ц.Пүрэвдоржийн найруулгаар тоглогдож байсан бөгөөд 50 жилийн дараа шинэчилсэн найруулгаар үзэгчдийн хүртээл болох гэж байгаа юм.
1921 оны Ардын хувьсгалын түүхэн үйл явдлыг илэрхийлэн мөнхөлсөн хөгжмийн энэхүү томоохон бүтээл нь хөдөлмөрийн баатар, ардын жүжигчин хөгжмийн зохиолч Д.Лувсаншарав, ардын уран зохиолч Д.Пүрэвдорж нарын бүтээл юм.
АГЬ НҮДЭЛЖ БАЙЛАА.
Монголын зохиолчдын эвлэл, Соёлын яам, МҮОНРТ хамтран шилдэг богино өгүүллэгийн “Утгын чимэг-2021” наадмыг өчигдөр Монголын хүүхэлдэйн театрт зохион байгууллаа.
Төр нийгмийн нэрт зүтгэлтэн Төрийн шагналт зохиолч Сономын Удвалын 100-н жилийн ойн хүрээнд зохион байгуулагдсан “Утгын чимэг 2021” наадмын тэргүүн байранд П.Батхуяг “Агь нүдэлж байлаа”, дэд байранд Д.Цэнджав “Хийлч”, гутгаар байранд М.Эрдэнэбат “Зүүдэлсэнгүй явлаа”, дөтгөөр байранд Б.Цоожчулуунцэцэг “Ах”, тусгай байранд С.Пүрэвсүрэн “Шаазгай үр” бүтээлээрээ шалгарав.
Мөн Д.Нацагдоржийн нэрэмжит шагналаар МЗЭ-ийн шагналт зохиолч О.Содномпил, Н.Сүхдорж, Р.Батжаргал нарыг шагнасныг “Утгын чимэг – 2021” наадмын үеэр Соёлын яамны Соёл, гэгээрлийн газрын дарга Д.Наранцэцэг болон мэргэжилтэн О.Сундуй нар гардуулсан юм. Түүнчлэн “Сономын Удвал 100” түүхэн зургийн альбом, номын нээлт болж өнгөрлөө.
Соёлын яамнаас зохион байгуулж буй “Соёлын бүтээлч сар”-ын аяны хүрээнд “Яруу үдэш-2021” шинэ шүлгийн уншлага 2021 оны 11 дүгээр сарын 20-ны өдрийн 17:30 цагаас “Novotel”-ийн “Ballroom”-д болно.
Уран зохиолын боловсрол төвөөс санаачлан зохион байгуулж байгаа энэхүү шинэ шүлгийн уншлагад
Агуулга, хэлбэрийн шинэлэг эрэлхийлэл бүхий яруу найргийн бүтээлүүдийг сурталчлан таниулж, түгээн дэлгэрүүлэх “Яруу үдэш-2021” шинэ шүлгийн уншлагаар олон нийтийн урлагийн боловсрол, тэр дундаа уран зохиолын боловсролын түвшинг дээшлүүлэх, урлаг хоорондын уялдаа холбоог сайжруулах, яруу найргийн үнэ цэнийг нэмэгдүүлэхийн сацуу дэлхий нийтийг хамарсан цар тахлын хүнд хэцүү үед нийгмийн сэтгэл зүйг дэмжиж, иргэдийн урам зоригийг сэргээн хөгжүүлэх зорилготой юм байна.
Шинэ шүлгийн уншлагын оролцогч яруу найрагчдын уран бүтээлийн дээж болох шилмэл шүлгийн түүвэр хэвлэгдэж уншигчдын хүртээл болохоос гадна тэдний бүтээл туурвилыг гарын үсгийг нь бичүүлэн авах боломжтой аж.