Category: улс-төр

Дэлхийн Худалдааны байгууллага (ДХБ)-ын Худалдааны бодлогыг хянан хэлэлцэх зөвлөл (ХБХХЗ)-ийн 2014 оны 9 дүгээр сарын 24-26-ны өдрүүдийн хуралдаанаар Монгол Улсын худалдааны бодлогын тухай илтгэлийг 2 дахь удаагаа хэлэлцүүлэв.

ДХБ байгуулах тухай хэлэлцээрт зааснаар гишүүн орнууд нь дэлхийн худалдаанд эзлэх худалдааны нийт хэмжээнээсээ хамааран 2, 4, 6 жил тутам худалдааны бодлогоо ДХБ-ын ХБХХЗ-өөр хэлэлцүүлэх үүрэгтэй байдаг бөгөөд Монгол Улс нь 6 жил тутам хэлэлцүүлдэг. Энэхүү үүргийн дагуу Монгол Улс нь худалдааны бодлогоо ДХБ-аар 2005 онд анхны удаа хэлэлцүүлсэн.

Хуралдааны гол зорилго нь дурдсан хугацаа (2005-2014)-нд Монгол Улсын гадаад худалдааны бодлогод гарсан өөрчлөлтүүдийг ДХБ-ын гишүүн орнуудын анхааралд сонордуулахын зэрэгцээ худалдаа, эдийн засгийн хөгжлийн өнөөгийн байдал, Засгийн газраас авч хэрэгжүүлж буй бодлого, зорилтыг танилцуулахад оршино. Хуралдаанд Эдийн засгийн хөгжлийн дэд сайд О.Чулуунбат тэргүүтэй төлөөлөгчид оролцов.
Хуралдаанаар Эдийн засгийн хөгжлийн дэд сайд О.Чулуунбат манай улсын худалдаа, эдийн засгийн хөгжлийн өнөөгийн байдал, цаашдын чиг хандлага, Засгийн газраас авч хэрэгжүүлж буй бодлого болон олон талт худалдааны хэлэлцээн дэх манай улсын оролцоо зэрэг асуудлаар илтгэл тавив.
Хуралдаанд манай улсын гадаад худалдаа, хөрөнгө оруулалтын гол түнш орнууд болох БНХАУ, ОХУ, АНУ, Европын Холбоо, Канад, Япон, БНСУ, Австрали, Турк зэрэг нийтдээ ДХБ-ын 40 орчим гишүүн улс орны төлөөлөгчид оролцож манай улсын худалдаа, эдийн засгийн бодлого, хөрөнгө оруулалтын орчин зэрэг асуудлуудаар хэлэлцүүлэг хийв.

Энэхүү хуралдааны үеэр Эдийн засгийн хөгжлийн дэд сайд О.Чулуунбат ДХБ-ын Ерөнхий захирал ноён Роберто Азеведо, НҮБ-ын Худалдаа, хөгжлийн Бага хурал (НҮБ-ын ХХБХ)-ын Ерөнхий нарийн бичгийн даргын орлогч ноён Петр Драганов, Олон улсын худалдааны төв (ОУХТ)-ийн Гүйцэтгэх захирал хатагтай Аранча Гонзалес нартай уулзаж, манай улсын худалдаа, эдийн засгийн байдлыг товч танилцуулж, тус байгууллагуудтай хийж буй хамтын ажиллагааны талаар санал солилцов.

Уулзалтаар ДХБ-ын Ерөнхий захирал Р.Азеведо Монгол Улс нь олон талт худалдааны тогтолцоог тууштай дэмжин ажиллаж байгааг сайшаан тэмдэглээд, цаашид Монгол Улсын худалдааны чадавхийг бэхжүүлэхэд тус байгууллагын зүгээс үзүүлж буй техник туслалцааг үргэлжлүүлэн хэрэгжүүлж, дэмжин ажиллахаа илэрхийлэв.
ОУХТ-ийн Ерөнхий захирал хатагтай А.Гонзалес худалдааг хөнгөвчлөх, жижиг, дунд үйлдвэрлэл, экспортыг дэмжих чиглэлээр манай улстай хэрэгжүүлж буй үйл ажиллагаагаа улам өргөжүүлэн, энэ чиглэлээр цаашид хамтран ажиллах, шинэ төсөл, хөтөлбөр хэрэгжүүлэхэд бэлэн буйгаа илэрхийлэв.
Мөн НҮБ-ын ХХБХ-ын Ерөнхий нарийн бичгийн даргын орлогч П.Драганов худалдаа, хөрөнгө оруулалтын чиглэлээр манай улстай хамтран хэрэгжүүлж буй үйл ажиллагааг сайшаан, цаашид өргөжүүлэх боломж байгааг дурьдаж, дэмжлэг үзүүлж ажиллахаа илэрхийлэв.

НҮБ-ын Ерөнхий Ассамблейн ээлжит 69 дүгээр чуулганд оролцож буй Гадаад харилцааны сайд Л.Болд 9 дүгээр сарын 25-27-ны өдрүүдэд тус чуулгантай зэрэгцээ зохиогдож буй томоохон арга хэмжээнүүдэд оролцож Монгол Улсын олон талт хамтын ажиллагааны чиглэлээр баримталж буй бодлого, үйл ажиллагааны талаар мэдээлэл хийлээ.

Далайд гарцгүй хөгжиж буй орнуудын сайд нар хуралдав

9 дүгээр сарын 26-ны өдөр Ерөнхий ассамблейн чуулганд оролцож буй далайд гарцгүй, хөгжиж буй орнуудын сайд нарын 13-р хурал хуралдаж нийтлэг асуудал бэрхшээлээ хэлэлцэн тэдгээрийг шийдвэрлэхэд олон улсын зүгээс тэр дундаа НҮБ-ын зүгээс хэрхэн дэмжлэг үзүүлж хамтран ажиллах талаар санал солилцлоо.

Дэлхий дээр далайд шууд гарцгүй бөгөөд эдийн засгийн хувьд хөгжиж буй 31 улс байдаг. Дэлхийн банкнаас хийсэн судалгаагаар эдгээр улсын олон улсын худалдааны эргэлтэд эзлэх хувь бүгд нийлээд 1 орчим хувь байдаг, тэд бараа бүтээгдэхүүний экспортод гаргахад бусад улсаас 2 дахин илүү зардал гаргадаг зэрэг олон сул талууд байдаг ажээ.

Монгол Улс эдгээр улсын нэг болохын хувьд НҮБ, Дэлхий худалдааны байгууллагын хүрээнд далайд гарцгүй, хөгжиж буй орнуудын өрсөлдөх чадварыг нэмэгдүүлэх асуудалд олон улсын анхаарлыг хандуулах цөөнгүй ажлыг санаачлан хийж ирсэн байдаг. Өнгөрсөн онд энэ асуудлыг судалж бодлогын зөвлөмж гаргаж байх тинк-танк институтыг манай улсөөрийн санаачлагаар Улаанбаатар хотод байгуулаад байгаа

бөгөөд цаашид тус төвийг НҮБ-ын албан ёсны бүтцийн байгууллага болгох чиглэлээр ажиллана гэж сайд нарын хуралд оролцсон Гадаад харилцааны сайд Л.Болд мэдээллээ.

Тэрээр мөн Далайд гарцгүй орнуудын асуудал эрхэлсэн НҮБ-ын Дээд төлөөлөгч бөгөөд, ЕНБД-ын дарга Г.Ачаритай албан ёсны уулзалт хийж хамтын ажиллагааны талаар санал солилцсон байна.

Сайд Л.Болд энэ онд Улаанбаатар хотноо болсон ДХБ-ын худалдааг хөнгөвчлөх хэлэлцээр ба далайд гарцгүй орнуудад үзүүлэх нөлөө сэдэвт бага хурлыг зохион байгуулахад ноён Г.Ачари дэмжлэг үзүүлж өөрийн биеэр ирж оролцсон явдалд талархал илэрхийллээ.
Түүнчлэн Дээд төлөөлөгч Г.Ачари 11 дүгээр сард Вена хотноо зохиогдох далайд гарцгүй орнуудын асуудлаарх НҮБ-ын хоёрдугаар бага хуралд Монгол Улсын Ерөнхий сайдыг оролцохыг урьсанаа дахин тодотголоо.

Энхийг сахиулах үйл ажиллагаа нь Монгол Улсын гадаад бодлогын тэргүүлэх чиглэлийн нэг

Монгол Улсын гадаад харилцааны тэргүүлэх чиглэлүүдийн нэг нь энхийг сахиулах үйл ажиллагаа юм. Цаашид манай улс энэ чиглэлээр олон улсын хамтын нийгэмлэгтэй хамтын ажллагаагаа өргөжүүлэхэд бэлэн гэдгийг Гадаад харилцааны сайд Л.Болд олон улсын энхийг сахиулах үйл ажиллагааны сэдвээр зохиогдсон хурал, арга хэмжээнүүдэд үг хэлэхдээ тодотгож байлаа.

Тэрээр Финланд, Уругвай Улсын Засгийн газар, Олон улсын энх тайвны хүрээлэнтэй хамтран пүрэв гарагт зохион байгуулсан “НҮБ-ын Энхийг сахиулах ажиллагааны талаарх шинэ яриа хэлэлцээ: Түншлэлийг бэхжүүлэх нь” сэдэвт уулзалт, баасан гарагт болсон “Олон улсын энхийг сахиулах үйл ажиллагааг бэхжүүлэх нь” дээд хэмжээний уулзалтуудад оролцов.

Энэхүү дээд хэмжээний уулзалтыг АНУ-ын Дэд Ерөнхийлөгч Ж.Байден санаачлан хуралдуулж даргалсан бөгөөд хурлын үр дүнд оролцогч улсууд хамтарсан тунхаглал гаргалаа.

Мөн энэ үеэр Монгол Улсаас Энхийг сахиулах үйл ажиллагааны дээд удирдлагад Монгол хүн ажиллах болсон тухай шийдвэрийг баталгаажуулсан гэрчилгээг сайд Л.Болд хүлээн авав. Тодруулбал Өмнөд Судан дахь НҮБ-ын Энхийг сахиулах ажиллагааны бүсийн командлагчаар бригадын генерал Д.Баярсайхан ажиллахаар томилогджээ.

ЕАБХАБ-ын Сайд нарын хуралдаанд оролцов

ЕАБХАБ буюу Европын Аюулгүй байдал, Хамтын Ажиллагааны Байгууллагын сайд нарын хурлыг тус байгууллагын энэ оны даргалагч Щвейцарийн Холбооны Улс удирдан зохион байгууллаа. Уг уулзалтад гишүүн 56 орны Гадаад хэргийн сайд нар бүрэн оролцсоны дотор хамгийн отгон гишүүн болох Монгол Улсыг төлөөлөн Гадаад харилцааны сайд Л.Болд оролцов.

40 гаруй жилийн түүхтэй тус байгууллага нь зөвхөн Европ төдийгүй дэлхий дахинд энх тайван, аюулгүй байдлыг хангах итгэлцлийг бэхжүүлж асуудлаар улс төрийн яриа хэлэлцээ өрнүүлж бодит үйл ажиллагааг хамтран хэрэгжүүлдэг голлох механизмуудын нэг юм. Энэ удаагийн уулзалтаар сайд нар Украйн дахь асуудлыг энхийн замаар шийдвэрлэх арга замын талаар төвлөрөн ярилцав.

Цөмийн туршилтыг бүрэн хориглох гэрээний асуудлаар хуралдав

9 дүгээр сарын 27-ны өдөр хуралдсан цөмийн туршилтыг бүрэн хориглох гэрээний асуудлаарх сайд нарын 7 дугаар хуралд Монгол Улсын Засгийн газрын төлөөлөгчдийн тэргүүн Л.Болд оролцов.

Цөмийн зэвсгийн аливаа хэлбэрийн туршилтыг бүрэн хориглох тухай энэхүү гэрээг 1996 онд анх санаачлан дэвшүүлж одоогоор НҮБ-ын гишүүн 183 улс нэгдсэн ч дотоодын хууль тогтоомжоороо бүгд соёрхон батлах үйл явц үргэлжилсээр байгаа бөгөөд үүний дараа гэрээ хүчин төгөлдөр болж мөрдөгдөж ёстой юм. Монгол Улс уг гэрээг анхнаас нь бүрэндэмжиж нэгдэн орсон төдийгүй өөрийн

улсын газар нутгийг цөмийн зэвсэггүй бүс хэмээн зарлаж энэхүү статусаа НҮБ-ын тогтоолоор баталгаажуулаад байна.

Тус хуралд НҮБ-ын ЕНБДарга Бан Ки Мүн, АНУ-ын Төрийн нарийн бичгийн дарга Жон Керри тэргүүтэй хүндэт зочид оролцож үг хэлсний дотор Монгол Улсын Гадаад харилцааны сайд Л.Болд үг хэллээ. Хуралд оролцогчид цөмийн туршилтыг хориглох бүрэн хориглох гэрээний асуудлаар хамтарсан мэдэгдэл гаргасан байна.

Үүний зэрэгцээ сайд Л.Болд Цөмийн туршилтыг бүрэн хориглох гэрээний байгууллагын Гүйцэтгэх захирал Л.Зерботой уулзалт хийв.

Захирал Л.Зербо Монгол Улсын Цөмийн зэвсэггүй статус, Зүүн Хойд Азийн аюулгүй байдлын асуудлаарх “Улаанбаатарын яриа хэлэлцээ” санаачилгыг НҮБ өндөр үнэлж, улс орнууд сонирхож байгаа хийгээд тус байгууллага Монгол Улстай хамтран бүс нутгийнулсуудыг хамарсан сургалт семинарыг Улаанбаатар хотноо зохион байгуулах сонирхолтой байгааг илэрхийлж, тодорхой зарим асуудлаар санал солилцов

Монгол Улсын Ерөнхий сайд Н.Алтанхуяг өнөөдөр Өмнөговь аймагт ажиллаж байна. Тус аймагт ажиллах үеэрээ ЖДҮС-аас хөнгөлөлттэй зээл авч үйлдвэрлэлээ өргөжүүлсэн мод, модон эдлэлийн үйлдвэрлэлийн “Түшмэл” ХХК, арьсан эдлэл, хатуу оёдлын “Хасуд бат” ХХК-ийн үйл ажиллагаа болон Даланзадгад-Баяндалай-Гурвантэс чиглэлийн хатуу хучилттай автозам, “Галтмөнх” ХХК-ийн 120 айлын орон сууцны барилга угсралтын ажил, шинэ суурьшлын бүсийн бүтээн байгуулалт, “Хачиг хайрхан” ХХК-ийн вакум цонхны үйлдвэрлэл зэрэг орон нутгийн бүтээн байгуулалтын ажлуудтай танилцах юм.

Мөн “Эрдэнэс таван толгой” ХК-ийн уурхайн үйл ажиллагаа, Чингис бондын санхүүжилтээр хийгдэж байгаа төмөр замын бүтээн байгуулалтын ажлын явцтай танилцаж, бизнес эрхлэгчид, ахмадын төлөөлөлтэй уулзалт хийн, телевизийн шууд нэвтрүүлэгт оролцоно. Ерөнхий сайдыг дагалдан Барилга, хот байгуулалтын сайд Ц.Баярсайхан, Батлан хамгаалахын сайд Д.Бат-Эрдэнэ, Зам, тээврийн сайд А.Гансүх нар болон албаны бусад хүмүүс тус аймагт ажиллаж байна гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

МАН-ын ерөнхий нарийн бичгийн дарга асан У.Хүрэлсүхийн удирддаг Зүүний хүчний холбооныхон өнгөрсөн долоо хоногийн баасан, бямба гаригт хуралдлаа. Уг хурлаар Зүүний хүчний холбоо дотоод асуудлаа хэлэлцэж, Удирдах зөвлөлийн бүрэлдэхүүндээ өөрчлөлт оруулсан байна. Монголын хөрөнгийн биржийн захирал асан Х.Алтай, Улсын бүртгэлийн ерөнхий газрын дарга асан Л.Амарсанаа нарыг Удирдах зөвлөлдөө багтаажээ. Мөн холбооны Бага хурлын гишүүдийн тоог 301-д хүргэсэн байна. Зүүний хүчний холбоо үйл ажиллагаагаа идэвхижүүлснийг намын нөхөд нь 2016 оны сонгуульд бэлтгэж байгаагийн нэг хэлбэр хэмээн тайлбарлаж буй ч Ерөнхий сайд асан С.Баяр, Сү.Батболд нарын фракцитай хамтрах шийдлийг гаргасан байж болзошгүй гэнэ. Учир нь Улсын бүртгэлийн ерөнхий газрын дарга асан Л.Амарсанаа нь Ерөнхий сайд асан С.Баярын хүн гэгддэг. Мөн тус холбооныхон хуралдааныхаа дараа хүлээн авалт хийхэд Ерөнхий сайд асан С.Баяр оролцжээ.

МАН Их хурлаа хийж, удирдлагаа өөрчлөн, бүтэц бүрэлдэхүүнээ шинэчлэх үеэр С.Баяр, У.Хүрэлсүх нарын тэргүүлдэг фракцийнхан хүч түрэгдэж, Бага хурлын гишүүдийнх нь дийлэнх хувийг хотын фракци бүрдүүлсэн гэж намын нөхөд нь үздэг. Харин одоо үйл ажиллагаагаа идэвхижүүлэв бололтой.

Тахарын ерөнхий газар, Иргэний харьяалал, шилжилт хөдөлгөөний ерөнхий газар хамтран ажиллах санамж бичигт гарын үсэг зурах ёслол боллоо.

Ингэснээр Тахарын алба нь улсын хилээр гарах эрхийг түдгэлзүүлэх шүүгчийн захирамж, албан бичгийг шалган нэвтрүүлэх газарт ирүүлснийг үндэслэн тухайн иргэнийг хилээр нэвтрүүлэх иргэдийн жагсаалтад бүртгэх, хасах ажлыг зохион байгуулна.

Мөн эрэн сурвалжлагдаж байгаа иргэн улсын хилээр гарахын завдсан тохиолдолд Шалган нэвтрүүлэх газах тухайн иргэнийг түр саатуулан нэн даруй Тахарын албаны Эрэн сурвалжлах хэлтэст мэдэгдэх ажлыг зохион байгуулах аж.

УИХ-ын намрын чуулганы нэгдсэн хуралдаан ирэх сарын гурванд хуралдана. Энэ хуралдаанд Ерөнхий сайд Н.Алтанхуяг эдийн засгийг эрчимжүүлэх 100 хоногийн хүрээнд хийсэн ажлуудынхаа талаар мэдээлэл хийхээ УИХ-ын даргад албан ёсоор мэдэгджээ.

Ерөнхий сайд мэдээллээ эдийн засаг, бизнес эрхлэлт, уул уурхайн салбарыг дэмжих, хөдөө аж ахуй, барилга, аж үйлдвэрийг нэмэгдүүлэх, дэд бүтэц, эрчим хүчний салбарын бүтээн байгуулалт, төгрөгийн ханшийг тогтворжуулж, үнийн өсөлтийг сааруулах чиглэл, гадаад харилцаа, худалдаа, хөрөнгө оруулалт, дэд бүтэц болон аж үйлдвэрлэл, улсын төсөв, хөнгөлөлттэй зээл гэсэн сэдвүүдэд төрөлжүүлж, 100 ажлын талаар мэдээлэл өгөх юм байна. Үүнээс гадна олон нийтийн дунд хүлээлт үүсгээд буй Засгийн газрын бүтцийн өөрчлөлт, зарим сайдын асуудлыг ч нэгдсэн чуулганд танилцуулах юм.

Олон улсын атомын энергийн агентлаг (ОУАЭА)-ийн Ерөнхий Бага хурлын 58 дугаар чуулган Вена хотноо боллоо. Тус чуулганд оролцож буй Цөмийн энергийн газрын дарга Н.Тэгшбаяр тэргүүтэй төлөөлөгчид Канадын цөмийн аюулгүй байдлын комиссын Ерөнхийлөгч Майкл Биндэртэй уулзаж, “Цөмийн хяналтын асуудлаар хамтран ажиллах, мэдээлэл солилцох тухай Монгол Улсын Засгийн газрын тохируулагч агентлаг Цөмийн энергийн газар, Канад Улсын цөмийн аюулгүй байдлын комисс хоорондын харилцан ойлголцлын санамж бичиг”-т гарын үсэг зуржээ.

Төлөөлөгчдийн тэргүүн, Цөмийн энергийн газрын дарга Н.Тэгшбаяр манай улсын байр суурийг илэрхийлж үг хэллээ. Тэрээр хэлсэн үгэндээ, дэлхий дахинаа цөмийн эрчим хүчийг энхийн зорилгоор ашиглах, цөмийн аюулгүй байдал, хамгаалалтыг хангах, үүнд олон улсын хамтын ажиллагааг бэхжүүлэхэд ОУАЭА-ийн гүйцэтгэж буй үүрэг үлэмж болохыг тэмдэглэсэн байна.

Манай улс Агентлагтай болон бусад гишүүн улс оронтой хамтран энэ чиглэлээр дотоодын, бүсийн цаашлаад олон улсын чадавхийг нэмэгдүүлж, аюулгүй байдал, хамгаалалтын горимыг сайжруулахад идэвхтэй хамтран ажиллах хүсэлтэй байдгаа илэрхийлэв.

Мөн өдөр төлөөлөгчид ОУАЭА-ийн Техникийн хамтын ажиллагааны газартай уулзаж, манай оронд хэрэгжиж буй төсөл, хөтөлбөрийн явц байдлыг дүгнэн ярилцав.

2013-2014 онд манай улс 10 төсөл, үүнд цацрагийн хамгаалалт, дозиметрийн лабораторийн хүчин чадлыг нэмэгдүүлэх, цөмийн салбарт техникийн болон эрдэм шинжилгээний ажилтан сургаж бэлтгэх малын гоц халдварт өвчнийг оношлох, урьдчилан сэргийлэх тоног төхөөрөмж, хүний нөөцийг чадваржуулахаас гадна цацраг туяажуулсан вакцин үйлдвэрлэх, хавдрын эсрэг эмчилгээнийн тоног төхөөрөмжийг сайжруулах зэрэг чиглэлээр хэрэгжүүлж буй төслийн хэрэгжилт 80 гаруй хувьтай байгааг сайшааж байв.

Энэ үеэр манай улс 2015-2020 онд Агентлагтай хамтран хэрэгжүүлэх орны хамтын ажиллагааны хөтөлбөр (Country Program Framework)-ийн төслөө гардуулсан байна.

УИХ-ын намрын чуулганы нээлт ирэх сарын 3-нд болно. Чуулганы нээлтийн үеэр Ерөнхий сайд Н.Алтанхуяг дараах мэдээллийг хийхээр болжээ.

НҮБ-ын Ерөнхий Ассамблейн 69 дүгээр чуулганы хуралд оролцож буй Монгол Улсын Ерөнхийлөгч Цахиагийн Элбэгдорж пүрэв гаригт Цаазаар авах ялыг  хориглох асуудлаарх өндөр түвшний хэлэлцүүлэгт оролцож, илтгэл тавилаа.  Энэ хэлэлцүүлэгт Ерөнхийлөгч Ц.Элбэгдорж үндсэн илтгэгчээр оролцсон юм.

НҮБ-ын Ерөнхий нарийн бичгийн даргын орлогч Жан Элиассон уг хэлэлцүүлгийг нээж хэлсэн үгэндээ “Цаазаар авах ялыг дэлхийн хэмжээнд үгүй болгохын тулд тогтвортой үйл ажиллагаа явуулах хэрэгтэй” хэмээн онцоллоо. Цаазаар авах ялыг үгүй болгохын тулд үндэсний манлайлал чухал болох талаарх танилцуулгыг НҮБ-ын Хүний эрхийн комиссын тэргүүн Зэйд Радал ал-Хусейн, Италийн Ерөнхий сайд Маттео Рензи нар хийж үндсэн илтгэгчээр гурван улсын Ерөнхийлөгч ажилласны нэг нь Ерөнхийлөгч Ц.Элбэгдорж байв.

Тус хэлэлцүүлэгт Швейцарийн Ерөнхийлөгч Дидер Бурхалтер, Сингапурын Гадаад хэрэг, хууль зүйн сайд К.Шанмугам, Португалийн Гадаад хэргийн сайд Руй Мачетэ, Норвегийн Төрийн нарийн бичгийн дарга Ханс Братцкар, Францын Гадаад хэрэг, олон улсын хөгжлийн сайд Лаурент Фабиус зэрэг албаны хүмүүс оролцож, санал бодлоо солилцов.

НҮБ-ын Хүний эрхийн комиссын тэргүүн Зэйд Радал ал-Хусейн цаазаар авах ялыг ХХI зуунд байж боломгүй хоцрогдсон ял шийтгэл хэмээгээд үүнийг халж алга болгох, зогсоож царцаах арга хэмжээ авахыг дэлхийн лидерүүдэд уриалж байв. Бас хууль тогтоомждоо өөрчлөлт хийж, шийдвэртэй алхам хийхийн тулд улс төрийн манлайлал чухал байдгийг ярилцсан юм.

Одоогийн байдлаар дэлхийн 160 оронд ялын дээд хэмжээг зогсоосон болон устгасан бөгөөд сүүлийн үед Эквадорын Гвиней, Пакистан, АНУ-ын зарим мужууд, Эль Сальвадор, Габон, Польш улсууд нааштай алхмуудыг хийснийг энэ үеэр онцолж байлаа.