Нийслэлийн иргэдийн төлөөлөгчдийн тэргүүлэгчдийн энэ сарын 4-ний хуралдаанаар нийслэлийн 2015 оны төсвийн эцсийн хэлэлцүүлгийг хийж баталсан. Нийслэлийн Засаг даргын орлогч Н.Батаа маргааш 11.00 цагт нийслэлийн төсвийн талаар дэлгэрэнгүй мэдээлэл өгөх ажээ.
Төсөв хэлэлцэх үеэр нийслэлийн удирдлагууд “Эдийн засгийн хямралаас шалтгаалан аль болох хассан, танасан хэмнэлттэй төсөв баталсан. Нийт 542 тэрбум төгрөгийг хувиарлахад багагүй хүндрэлтэй байсан” гэдгийг мэдэгдээд байгаа юм.
МАН-ын бүлэг өнөөдөр хуралдаж, дэд сайд болох хүсэлтээ илэрхийлсэн хүмүүст ямар шалгуур, шаардлага тавих талаар намын даргынхаа мэдээллийг сонсчээ. Одоогийн байдлаар МАН-д оногдож буй долоон дэд сайдын суудалд нэлээд олон хүн нэрээ дэвшүүлээд байгаа аж. МАН-ын зүгээс дэд сайдад томилогдох хүнд мэдлэг чадвар, намын төлөө сэтгэл гарган ажилласан байдлыг харгалзан үзэх ажээ. Намаа ялагдсан хүнд хэцүү цагт намынхаа төлөө ажилласан хүмүүсээ томилох талаар ярьжээ. Хэвлэл мэдээллийн хэрэгслээр, МАН-аас дэд сайдад нэр дэвшигчдийн талаар янз бүрийн таамаг явж байгаа. Албан бус эх сурвалжийн мэдээллээр, Бүлгийн ажлын албаны дарга Ш.Раднаасэд, МАН-ын Ерөнхий нарийн бичгийн даргын ахлах зөвлөх Я.Төмөрбаатар, “Бишрэлт”-ийн Б.Ундармаа, МАН-ын орон нутаг, намын байгуулалт хариуцсан нарийн бичгийн дарга Х.Булгантуяа, Гадаад хэргийн дэд сайд асан Г.Тэнгэр, Баянзүрх дүүргийн Засаг дарга асан Б.Батзориг, нийслэлийн Засаг даргын орлогч асан Б.Мөнхбаатар, Хүнс хөдөө аж ахуйн дэд сайд асан, МАН-ын Зөвлөхүүдийн танхимын нарийн бичгийн дарга Ж.Сауле нарын нэр яригдаж байгаа аж.
Монгол Улсын Ерөнхийлөгчийн зарлигийн дагуу шилдэг залуу эрдэм шинжилгээний ажилтан, судлаачдыг өнөөдөр шагнав. Ерөнхийлөгчийн Тамгын газрын дарга П.Цагаан шагнал гардуулж, шилдэг залуу эрдэмтдэд баяр хүргэлээ. Хоролрагчаагийн Алтанзул, Тогоогийн Хонгорзул, Цэрэн-Очирын Соёл-Эрдэнэ нарт шилдэг залуу эрдэм шинжилгээний ажилтан, судлаачдад олгох Монгол Улсын Ерөнхийлөгчийн нэрэмжит 2014 оны шагналыг хүртээлээ.
ШУА-ийн Биологийн хүрээлэнгийн эрдэм шинжилгээний ажилтан, доктор Хоролрагчаагийн Алтанзул нь Монгол орны ховордож, нөөц нь багасч буй эмийн ургамлын төрөл, зүйл, генофондыг хадгалах, тэдгээрийн биологийн нөөцийг нэмэгдүүлэх, эмийн ургамлыг биотехнологийн аргаар богино хугацаанд их хэмжээгээр гаргаж авах боломжтойг туршилтаар баталсан “Монгол орны зарим ховор, нэн ховор эмийн ургамлын биотехнологийн судалгаа” сэдэвт шилдэг бүтээл туурвисан байна.
Анагаахын Шинжлэх ухааны Үндэсний их сургуулийн Дархлаа судлалын тэнхмийн багш, доктор Тогоогийн Хонгорзул шинжлэх ухаанд өмнө нь тодорхойлогдож байгаагүй хүний дархлааны тогтолцоо, эсүүдийг дэмждэг шинэ эсийг олж нээсэн “Альфа-гөлгөр булчингийн актины илрэлээр тунгалагийн булчирхайн шинэ бүтцийн эсийг нээж илрүүлсэн дүн” сэдэвт дархлааны эдийн нөхөн сэргээлтэд чухал ач холбогдолтой судалгаа хийж дархлаа судлалын ухаанд үнэтэй хувь нэмэр оруулжээ.
МУИС-ийн Хэрэглээний шинжлэх ухаан, инженерчлэлийн сургуулийн багш, доктор Цэрэн-Очирын Соёл-Эрдэнэ нь Монгол орны болон дэлхийн байгаль орчны асуудал, хүрээлэн буй орчны бохирдол, уур амьсгалын өөрчлөлтийг судалсан “Антарктид дахь цагаан алтны бүлгийн элементүүдийн тунадасжилт, тэдгээрийн эх үүсвэрийн судалгаа”, “Говийн бүсийн агаарын тоосонцрын ионы болон хортой хүнд элементийн судалгаа” зэрэг байгаль хамгааллын үйлсэд хувь өгөхүйц дорвитой бүтээл туурвисан.
Ерөнхийлөгчийн Тамгын газрын дарга П.Цагаан шилдэг залуу эрдэмтдийн шагналыг гардуулж хэлсэн үгэндээ:
Шилдэг залуу эрдэм шинжилгээний ажилтан, судлаачдад олгодог Монгол Улсын Ерөнхийлөгчийн нэрэмжит 2014 оны шагналыг эрдэм шинжилгээ, судалгааны салбарт итгэл үнэмшлээрээ зүтгэж, эх орондоо төдийгүй эх дэлхийн хүмүүст хэрэг тустай бүтээл туурвиж яваа гурван залуу судлаачид олголоо.
– ШУА-ийн Биологийн хүрээлэнгийн эрдэм шинжилгээний ажилтан, доктор Хоролрагчаагийн Алтанзул,
– Анагаахын Шинжлэх ухааны Үндэсний их сургуулийн Дархлаа судлалын тэнхмийн багш, доктор Тогоогийн Хонгорзул,
– МУИС-ийн Хэрэглээний шинжлэх ухаан, инженерчлэлийн сургуулийн багш, доктор Цэрэн-Очирын Соёл-Эрдэнэ нарт шилдэг залуу эрдэм шинжилгээний ажилтан, судлаачдад олгох Монгол Улсын Ерөнхийлөгчийн нэрэмжит 2014 оны шагналыг тус тус хүртээлээ.
Эрдэм номоор биеэ чимсэн эрхэм залуус Та бүхэнд чин сэтгэлийн баяр хүргэе. Эрдэм шинжилгээний олон сайн ажилтан, судлаачаас бүтээл туурвилаараа онцлойлон шалгарч “шилдэг”-ээр шалгарсан Та бүхэнд Монгол Улсын Ерөнхийлөгчийн нэрэмжит шагналыг дагаж, их хариуцлага очиж байна. Та нар бүтээл туурвилаа гүнзгийрүүлэн чамбайруулж их зорилго өвөрлөн улам чармайж, мэрийж ажиллана гэдэгт итгэж байна.
Та бүхний цаашдын судалгаа шинжилгээний ажилд их амжилт хүсье. Баярыг тань хуваалцаж буй гэр бүл, хамт олон, найз нөхдөд тань бас сайн сайхан, эрүүл энхийн өлзийтэй ерөөл дэвшүүлье.
Эрдэм номын ариун үйлс ашид дэлгэрэх болтугай.
УИХ дахь Ардчилсан намын бүлэг ээлжит хуралдаанаараа зарим асуудлыг хэлэлцэж, шийдсэн байна. УИХ-ын гишүүн, Ардчилсан намын бүлгийн дарга Д.Эрдэнэбат Аж үйлдвэрийн сайдаар томилогдсон. Тиймээс бүлгийн даргын ажлаасаа чөлөөлөгдөж, тус бүлгийг дэд дарга С.Одонтуяа шинэ дарга сонгогдтол удирдахаар болсон байна.
Олонхийн бүлгийн даргад УИХ-ын гишүүн Ц.Баярсайхан, М.Батчимэг, М.Зоригт, Я.Санжмятав, С.Одонтуяа нарын нэр яригдаж байгаа ажээ.
Нийслэлийн ИТХ-ын Тэргүүлэгчдийн ээлжит хуралдаан өнөөдөр НЗДТГ-ын хурлын А танхимд 10 цагаас эхэлнэ. Хуралдаанаар Улаанбаатар хотын замын хөдөлгөөнийг зохицуулах талаар авах зарим арга хэмжээний тухай, Улаанбаатар хотын үерийн хамгаалалтын барилга байгууламжийг 2020 он хүртэл хөгжүүлэх хөгжлийн хөтөлбөр батлах тухай хэлэлцэх аж. Түүнчлэн тусгай зөвшөөрөл олголтын талаар авах зарим арга хэмжээний тухай, Нийтийн эзэмшлийн гудамж, зам, талбай, орон сууц, гэр хорооллын гэрэлтүүлгийг сайжруулах хөтөлбөр батлах тухай зэрэг асуудлуудыг хэлэлцэх юм байна.
Төр, засгийн үйлчилгээний автобаазыг ирэх оноос аж ахуйн тооцоотой ажиллуулахаар болсон байна. Аж ахуйн тооцоонд оруулах асуудлыг судалж, боловсруулаад Засгийн газарт танилцуулах ажлыг Төр засгийн үйлчилгээ эрхлэх газар таван сар орчим хугацаанд хийсэн аж. Мөн үйл ажиллагааныхаа дүрмийг шинэчлэн боловсруулсан байна. Шинэ дүрмээр уг газар бүтэж, орон тоо, төсвөө өөрөө тогтоож ажиллах гэнэ. Өөрөөр хэлбэл, Төр засгийн үйлчилгээ эрхлэх газар нь төрд үзүүлж буй үйлчилгээгээ үнэлж, зохих төлбөр авах юм байна.
“Улаанбаатар төмөр зам” хувь нийлүүлсэн нийгэмлэгийн Ерөнхий хорооны ээлжит хурал хоёр өдөр болж өндөрлөлөө. Энэхүү хурлаар “УБТЗ”-ын 2014 хийсэн үйл ажиллагааны тайланг хэлэлцэхийн зэрэгцээ даргыг томилох асуудлыг хэлэлцсэн байна.
“УБТЗ”-ын даргаар В.Отгондэмбэрэл томилогдож гурван жил ажилласны дараа “УБТЗ”-ын даргын үүрэг гүйцэтгэгчээр Г.Сэрээнэндорж хоёр жил ажилласан бол түүний өмнө Д.Жигжиднямаа үүрэг гүйцэтгэгчээр нэг жил ажилласан юм. Тэгвэл энэ удаагийн даргыг Ерөнхий хороогоор хэлэлцээд Л.Пүрэвбаатарыг томилжээ.
УИХ-ын чуулганы нэгдсэн хуралдаанаар УИХ-ын гишүүн О.Баасанхүүгийн санаачлан өргөн мэдүүлсэн Тамхины хяналтын тухай хуульд өөрчлөлт оруулах тухай хуулийн төслийг хэлэлцэж байгаад завсарлалаа. Уг хуулийн төслийг хэлэлцэх шатанд УИХ-ын гишүүн Г.Уянга нар “Төслийг дэмжих боломжгүй” хэмээн байр сууриа илэрхийлсэн юм.
Үүний дараа УИХ-ын дарга З.Энхболд “Намын бүлэг дээрээ уг хуулийг ярилцаж яахаа шийд” гэсэн сануулга өгснөөр энэ өдрийн чуулганы хуралдааныг өндөрлүүлсэн юм.
Дээрх төсөлд тамхи худалдан борлуулах цэг нь сургууль, цэцэрлэгээс 500 метрийн дотор гэснийг 250 метрийн дотор болгон өөрчлөхөөр заасан юм.
УИХ энэ өдрийн хуралдаанаараа мөн УИХ-ын гишүүн Д.Эрдэнэбатын санаачлан өргөн мэдүүлсэн Тамхины хяналтын тухай хуульд өөрчөлт оруулах тухай хуулийн төслийг хэлэлцээд гишүүд дэмжсэнээр “Төслийг хэлэлцэх нь зүйтэй” хэмээн үзсэн юм.
Тамхины хяналтын тухай хуульд дараах өөрчлөлтийг тусгажээ. Үүнд нэгдүгээрт, утаат тамхи татах зөвшөөрөгдсөн цэгийг тодорхойлж, байгуулах стандарт болон анхааруулах тэмдгийн талаар тусгасан байна. Хоёрдугаарт, нийтийн хоол, худалдаа, баар, цэнгээний газар, аж ахуйн нэгж, байгууллагын ажлын байрны дотоод орчин болон нийтийн эдэлбэр газарт тамхи татах зөвшөөрөгдсөн цэг байгуулж болохоор зохицуулжээ.
Нийтийн эдэлбэр газарт байгуулах зөвшөөрөгдсөн цэгийн байршил, төсвийг сум, дүүргийн Иргэдийн Төлөөлөгчдийн Хурал, хэрэв аж ахуйн нэгж, байгууллага байгуулах бол тухайн этгээд хариуцахаар тусгасан юм байна.
Хууль батлагдсан нөхцөлд хүн амын эрүүл мэндийг тамхины шууд болон шууд бус нөлөөллөөс хамгаалах, тамхинаас үүсэх хог, хаягдлыг нэг цэгт төвлөрүүлэн цэвэрлэх, хадгалах, тээвэрлэхтэй холбогдсон хүндрэл, төсөв, зардлыг хэмнэх, орчны цэвэр цэмцгэр байдалд эергээр нөлөөлөх зэрэг эрх зүйн орчин бүрдэж хуулийн хэрэгжилт сайжирч амьдралд нийцнэ гэж төсөл санаачлагчид тайлбарлаж байгаа юм.
УИХ-ын чуулганы нэгдсэн хуралдаанаар Монгол Улсын 2014 оны төсвийн хуульд өөрчлөлт оруулах тухай болон холбогдох бусад хуулийн төслүүдийн нэгдүгээр хэлэлцүүлгийг хийж дуусган, хоёрдугаар хэлэлцүүлэгт бэлтгүүлэхээр Төсвийн байнгын хороонд шилжүүллээ.
УИХ-аар төсвийн хуулийг хэлэлцэж байхад Засгийн газрын сайд нараас Сангийн сайд Ж.Эрдэнэбат, Боловсрол, соёл шинжлэх ухааны сайд Л.Гантөмөр, Аж үйлдвэрийн сайд Д.Эрдэнэбат нар оролцсон нь гишүүдийн зүгээс шүүмжлэл сонсоход хүрэв. Учир нь улсын төсөв хэлэлцэж байхад Ерөнхий сайд, Шадар сайд нар биечлэн оролцох ёстой юм.
УИХ-ын гишүүн Г.Баярсайхан “Шийдлийн Засгийн газар тараа таниулж байна” гэсэн бол УИХ-ын гишүүн Л.Болд “Засгийн газар УИХ-аар даажигнаж байгаа юм уу, Ерөнхий сайд байхгүй, Шадар сайд байхгүй, би хэнд үгээ хэлэх вэ. Оруулж ирсэн төсвийн хууль нь Монгол Улсын сайдад зургаан хүний орон тоо баталж өгөх, яамдад төсөв хуваарилж өгөх гэсэн жижиг асуудлын хүрээнд эргэлдсэн нь зохисгүй байна. Ад үзсээр байгаад Соёлын яамыг татан буулгасан, байрыг нь эмнэлэг болгоно гэж Засгийн газар шоу хийгээд. Моралийн элэгдэлд орчихсон байшинг эмнэлэг болгож болдоггүй юм” гэж байлаа.
Гэхдээ 2014 оны төсвийн хуульд өөрчлөлт оруулах тухай хуулийн төслийг боловсруулахад шинэ сайд нарын оролцоо байгаагүй аж. Харин Засгийн газар үүрэг гүйцэтгэгч сайдуудтай байсан нь эцсийн дүндээ ийм хариуцлагагүй төсвийн хууль өргөн мэдүүлэхэд хүргэсэн бололтой.
Одоо чуулганы нэгдсэн хуралдаанаар УИХ-ын гишүүн Д.Эрдэнэбатын санаачлан өргөн мэдүүлсэн Тамхины хяналтын тухай хуульд өөрчлөлт оруулах тухай төслийг хэлэлцэж эхлээд байна.
УИХ-ын гишүүн Н.Номтойбаярын хэлснээр УИХ дахь МАН, АН-ын зөвшилцлийн ажлын хэсэг дэд сайдуудын асуудлаар тодорхой тохиролцоонд хүрсэн байна. Тодруулбал, МАН-аас засагт долоон дэд сайд томилох, үндсэн чиг үүргийн яамдад дэд сайдуудыг сөөлжүүлж томилох гэх зэрэг асуудлаар тохиролцсон гэж Н.Номтойбаяр гишүүн хэлэв. Гэвч хэн хэнийг дэд сайдын суудалд томилох вэ гэдэг асуудлыг хэлэлцэж эхлээгүй байгаа аж. МАН-ын зүгээс дэд сайдуудад аль болох мэргэжлийн хүн томилохыг эрмэлзэж байгаа бололтой.