Category: амьдралын-өнгө

Баян-Өлгий аймгийн Өлгий сумаас Увс аймгийн Улаангом сумын чиглэлд зорчиж явсан иргэн сураггүй алга болоод байгаа ба түүний автомашиныг онцгой байдлын алба хаагчид олжээ.

Тодруулбал, Увс аймгийн Бөхмөрөн сумын Гурван жигэртэй багийн “Хөх сайр” гэдэг газар Баян-Өлгий аймгийн Өлгий сумаас Увс аймгийн Улаангом сумын чиглэлд автомашинтай зорчиж явсан нэг хүн сураггүй болсон тухай дуудлагыг өчигдөр /11.23/ 23:30 цагт хүлээн авчээ.

Тус аймгийн Онцгой байдлын газар, Увс аймгийн Бөхмөрөн сум дахь Цагдаагийн хэсгийн алба хаагчид, ар гэрийнхэн Баян-Өлгий аймгийн Өлгий сумын харьяат иргэн 33 настай, эрэгтэйг эрэн хайх ажиллагааг зохион байгуулж урьд шөнө 02:00 цагт Увс аймгийн Бөхмөрөн сумын Гурван жигэртэй багийн “Хөх сайр” гэдэг газраас автомашиныг нь олсон байна. Иргэнийг эрэн хайх ажиллагаа үргэлжилж байна.

Эх сурвалж: ОБЕГ

Увс аймгийн Түргэн сумын Баянхайрхан багийн “Түргэн”-ий гол гэдэг газар /сумын төвөөс баруун урд зүгт 38 км-т, өчигдөр буюу энэ сарын 23-ны өдрийн 11:54 цагт 3.8 магнитудын хүчтэй газар хөдлөлт болжээ.

Газар хөдлөлтийн тухай мэдээллийг 12:00 цагт Одон орон геофизикийн хүрээлэнгээс цахим шуудангаар ирүүлсэн. Тус аймгийн Онцгой байдлын газраар дамжуулан тус сумын Засаг даргын Тамгын газрын даргаас тодруулахад иргэдэд чичирхийлэл мэдрэгдээгүй бөгөөд хохирол учраагүй тухай мэдээлэв.

Иргэдээс ирсэн гомдол мэдээллийн дагуу аймгийн Засаг дарга Д.Түвшинжаргал өчигдөр орой /2021-11-23/ Төрөх эмэгтэйчүүдийн эмнэлэгт ажиллалаа.

Тус эмнэлгийн халаалт долоо хоногийн өмнөөс доголдож эхэлсэн бөгөөд эмнэлгийн зүгээс дулаан үйлдвэрлэгч “Оч дөл өлзийт” ХХК-д албан бичиг хүргүүлж, шаардлага тавьсан боловч нөхцөл байдал өөрчлөгдөөгүй байна.

Харин компанийн зүгээс уурын зууханд доголдол гарсан, нүүрсний чанар муу, мөн ажилчдын хариуцлагагүй байдал нөлөөлсөн гэдэг тайлбар хийлээ.

Аймгийн Засаг дарга Төрөх эмэгтэйчүүдийн эмнэлгийг дулаанаар хангаж буй “Оч дөл өлзийт” ХХК-д халаалтыг яаралтай сайжруулах үүрэг даалгавар өгч, галлагаанд аймгийн Нэгдсэн эмнэлэг, Эрчим хүчний зохицуулах зөвлөл, АЗДТГ-аас хамтарсан хяналт тавьж ажиллахаар шийдвэрлэлээ.

Төрөх эмэгтэйчүүдийн тасгийн халаалт өнөөдрөөс хэвийн горимд шилжээд байна.
Мөн зарим төрийн байгууллага, аж ахуйн нэгж, айл өрхүүдийн халаалт муу байгаа тул Улиастай суманд үйл ажиллагаагаа явуулж буй уурын зуухнуудад хяналт шалгалт хийж, халаалтыг сайжруулахыг Эрчим хүчний зөвлөл болон холбогдох албан тушаалтнуудад үүрэг болголоо.

Эх сурвалж: Завхан аймгийн ЗДТГ

Говь-Алтай аймгийн Бугат суманд газар хөдлөлт болжээ.

Тодруулбал, Өнөөдөр буюу арваннэгдүгээр сарын 24-ны 08:39 цагт Говь-Алтай аймгийн Бугат сумаас Баруун урд зүгт 61 километрын зайнд 4 магнитудын хүчтэй газар хөдлөлт болсон байна.

Энэ жил нийт 15 аймгийн 99 суманд малын шүлхий өвчин бүртгэгдсэн байна. Он гарснаас хойш нийт дөрвөн удаа малын гоц халдварт өвчин гарчээ.

Одоогоор халдварын 97 голомт буюу 10 аймгийн хорио цээр бүрэн цуцлагдсан талаар Хүнс, хөдөө аж ахуй, хөнгөн үйлдвэрийн яамнаас мэдээлэв.

Малын гоц халдварт өвчний улмаас Дорнод, Сүхбаатар, Хэнтий аймгуудад 1700 орчим үхэр устгалд оруулсан байна. Тус гурван аймагт үхрийн арьс товруутах өвчин гарсныг Засгийн газар гоц халдварт өвчний жагсаалтад оруулж, өвчилсөн малыг устгалд оруулжээ.

Баян-Өлгий аймгийн Толбо суманд 26 настай эрэгтэй мал хариулахаар мориор яваад сураггүй болжээ. Тэрбээр аймгийн төвөөс урд зүгт 85 км-т, мал хариулахаар яваад сураггүй болсон тухай дуудлагыг өчигдөр өдрийн 21:20 цагт хүлээн авч, эрэл хайгуулын ажлыг эхлүүлжээ.

Эрлийн явцад өнөө өглөө 06:00 цагт сураггүй болсон малчны гэрээс нь баруун зүгт 3 км-аас унаж явсан морийг нь олсон байна. Одоогоор эрэн хайх ажиллагаа үргэлжилж байна.

Эрэл хайгуулын ажлыг тус аймгийн Онцгой байдлын газрын алба хаагчид зохион байгуулж, тус сумын Засаг даргын Тамгын газрын ажилтнууд, ар гэрийнхний хамт оролцож байна.

ОНЦГОЙ БАЙДЛЫН ЕРӨНХИЙ ГАЗАР

Өвөрхангай аймгийн Арвайхээр сумын “Задгай”-д өндрөөс үсэрч, амиа хорлох гэж байсан хүүг онцгойгийн албан хаагчид аварчээ.

Тодруулбал, Таван давхар орон сууцны барилгын дээврээс хүн үсрэх гээд байна гэсэн дуудлагаар аймгийн Онцгой байдлын газрын алба хаагчид 5 км зам туулан 11:10 цагт очиход, 5 давхрын дээврээс тус байранд оршин суугч иргэн 17 настай эрэгтэй Д үсрэх гэж байсан аж. Албан хаагчид хүүг эсэн мэнд буулгаж, цагдаагийн байгууллагад шилжүүлэн өгчээ.

Сүхбаатар аймгийн Засаг даргын захирамжийн дагуу Энэ сарын 15-ны өдрөөс эхлэн гуравдугаар сарын 15-ныг хүртэл түр хугацаагаар мотоциклийн хөдөлгөөнийг хязгаарлалаа.

Тус захирамжийг зөвхөн Сүхбаатар аймгийн нутаг дэвсгэрт дагаж мөрдөн хэрэгжүүлэх аж.

Тус аймагт сүүлийн нэг жилийн хугацаанд авто осол тэр дундаа мотоциклийн осол буурсан үзүүлэлттэй гарчээ. Энэ нь коронавируст цар тахлын улмаас хөл хөдөлгөөнийг хязгаарласантай холбоотой гэж аймгийн Цагдаагийн газраас мэдээлэв.

Цаг агаарын нөхцөл байдалтай холбоотойгоор зорчих хэсгийн гадаргуу цас мөсөөр хучигдан хальтиргаа гулгаа үүсгэж, авто замын нөхцөл байдал хүндэрсэн үед мотоциклоор замын хөдөлгөөнд оролцогчдыг осол гэмтлээс урьдчилан сэргийлж, иргэдийн эрүүл мэнд, амь нас, эд хөрөнгийг хамгаалж, учирч болох хор хохирол, эрсдлийг багасгах, замын хөдөлгөөний аюулгүй байдлыг хангуулах зорилгоор дээрх захирамжийг жил бүр хэрэгжүүлдэг уламжлалтай аж.