Category: амьдралын-өнгө

Хараа голын усны түвшин өмнөх жилүүдийн дунджаас нэмэгдэж, үерийн түвшинг давж 176 см хүрч үерлэж, зарим налуу хэсгээр ус эргээ хальжээ.

Дундговь аймгийн Онцгой комиссын 16 дугаар хуралдаанаас коронавирусийн халдварын тархалтыг бууруулах зорилгоор өнөөдрийн 15:00 цагаас зургадугаар сарын 13-ны 06:00 хүртэл Сайнцагаан, Дэлгэрхангай, Сайхан-Овоо, Цагаандэлгэр, Өлзийт сумдад “тэг” зогсолт хийх шийдвэр гаргалаа.

Энэ хугацаанд эрүүл мэндийн үйлчилгээ, эмийн худалдаанаас бусад бүх төрлийн худалдаа, үйлчилгээг зогсоохоор болжээ.

Тус аймагт сүүлийн 24 цагт коронавирусийн халдварын 54 тохиолдол батлагдаж, батлагдсан тохиолдлын тоо 166 боллоо.

Халдвар Дэлгэрхангай, Цагаандэлгэр, Сайнцагаан, Сайхан-Овоо, Өлзийт суманд бүртгэгдэж, Дэлгэрхангай, Сайнцагаан суманд тархалт их байгааг аймгийн Онцгой комиссоос онцолсон.

Өнөөдрийн байдлаар ойрын хавьтлын 85 хүн тусгаарлан ажиглах байранд, 286 өрхийн 902 иргэн гэрийн ажиглалтад байгаа ба тусгаарлах эмнэлэгт 86 хүнийг хэвтүүлэн эмнэлгийн тусламж үйлчилгээ үзүүлж байгаа юм.

Өмнөговь аймгийн хэмжээнд коронавируст халдвар тархах эрсдэлийн салбар дундын ес дэх удаагийн үнэлгээг хийлээ.

Шадар сайдын 2017 оны наймдугаар тушаалын дагуу эрсдэлийн үнэлгээг 8 байгууллагын 9 эмч мэргэжилтэн, албан хаагч хамтран зохион байгуулахад маш өндөр эрсдэлтэй гэж үнэлэгдсэн байна.

Эрсдэлийн үнэлгээний дагуу мэргэжлийн байгууллагууд зөвлөмж гарган Аймгийн шуурхай штабд хүргүүлэн, Онцгой Комиссын хуралд танилцууллаа гэж Өмнөд бүсийн төв-Өмнөговь аймгийн Онцгой байдлын газраас мэдээллээ.

Монгол Улсын Ерөнхийлөгчийн найм дахь удаагийн сонгуулийн санал хураалт үргэлжилж байна.

Энэ удаагийн Ерөнхийлөгчийн сонгуулийн сонгогчдын нэрийн жагсаалтад нийслэлд 1,009,755, орон нутагт 1,141,574 иргэн саналаа өгөхөөр бүртгэгдсэн.

18:00 цагийн байдлаар орон даяар сонгуулийн ирц дунджаар 37.6 хувь байгаа ба 21 аймагт ирцийн босгод хүрээгүй буюу саналаа өгсөн сонгогчийн тоо 50 хувийн ирцийг хангаагүй байна.

Одоогоор Хэнтий аймаг саналаа өгсөн сонгогчийн ирцээрээ тэргүүлж байгаа буюу 42 хувьтай байгаа бол хамгийн бага ирцтэй нь Сэлэнгэ аймаг байгаа юм.

Тодруулбал,

1. Архангай – 31.5 хувь
2. Баян-Өлгий – 31.7 хувь
3. Баянхонгор – 34.9 хувь
4. Булган – 33 хувь
5. Говь-Алтай – 42 хувь
6. Говьсүмбэр – 35.9 хувь
7. Дархан-Уул – 37.7 хувь
8. Дорноговь – 39.9 хувь
9. Дорнод- 33.6 хувь
10. Дундговь – 35 хувь
11. Завхан – 38.7 хувь
12. Орхон – 40.5 хувь
13. Өвөрхангай – 36.3 хувь
14. Өмнөговь – 34.2 хувь
15. Сүхбаатар – 42.2 хувь
16. Сэлэнгэ – 27.6 хувь
17. Төв -33.9 хувь
18. Увс – 36.3 хувь
19. Ховд – 38.1 хувь
20. Хөвсгөл -34.3 хувь
21. Хэнтий- 42 хувийн ирцтэйгээр санал хураалт явагдаж байна.

Санал хураалт 22:00 цаг хүртэл үргэлжилнэ.

Дундговь аймгийн 10 жилийн сургуулийг 1991 онд төгсөгчид “Хүүхдийн төлөө ЗА гэж хэлье” уриан дор Мандалговь хотын хүүхдийн парк, хүүхдийн цэцэрлэгийн хашааг моджууллаа.

Тухайн үед тус аймагт бүрэн дунд боловсрол олгодог гурван сургууль байсан нь Улсын тэргүүний нэгдүгээр сургууль, хоёрдугаар сургууль, Эрдэнэдалай сумын сургууль юм.

Дээрх гурван сургуулийг 1991 онд төгсөгчид нэг талаас аймгийнхаа ногоон хөгжлийг дэмжиж, нөгөө талаас ирээдүйн бяцхан хүүхдүүдийн хөгжих, чөлөөт цагаа өнгөрүүлэх орчныг тохижуулах зорилгоор ийнхүү мод тарих хөдөлгөөнд нэгдсэн байна.

Тус хамт олон ийнхүү Мандалговь хотын хүүхдийн паркад 350, Улсын тэргүүний 3 дугаар цэцэрлэгийн хашаанд 120 мод, жимс жимсгэний бут тарьсан бөгөөд дээрх байгууллагуудад мандлын цэцэг тариалах үр өгч, усалгааны шланк, мотопомп зэргийг хүлээлгэн өгч, усалгааны асуудлыг нь шийдвэрлэжээ.

Архангай аймгийн Эрдэнэмандал суманд 3.8 магнитуд газар хөдөлжээ.

Тодруулбал, Зургадугаар сарын 08-ны өдөр 04:30 цагт Архангай аймгийн Эрдэнэмандал сумаас өмнө зүгт 25 километрын зайд 3.8 магнитут газар хөдлөлт болсон байна.

Газар зүйн байршил (Өргөрөг, Уртраг) : 48.32N 101.26E

Сэлэнгэ аймгийн Ерөө сумын “Халуун рашаан” гэдэг газар хээрийн түймэр гарчээ.

Аймгийн Онцгой байдлын газрын Мандал сум дахь Онцгой байдлын хэлтсийн Гал түймэр унтраах, аврах 19 дүгээр анги, Баянгол сум дахь Гал түймэр унтраах, аврах 40 дүгээр ангийн алба хаагчид зургаадугаар сарын 6-ны 15:18 цагт түймрийн голомтод очсон байна.

Улмаар алба хаагчдыг гурван бүлэгт хуваагдаж галын унтраахаар ажиллаж буй талаар Онцгой байдлын газраас мэдээллээ.

Хөвсгөл аймагт сүүлийн 24 цагийн хугацаанд Нэгдсэн эмнэлгийн Молекул биологийн лабораторид тандалт болон ойрын хавьтлын 513 сорьцод PCR шинжилгээ хийхэд 23 тохиолдол батлагдлаа.

Тодруулбал, Мөрөн суманд 16, Эрдэнэбулган суманд 5, Чандмань-Өндөр суманд 2 батлагдаж, нийт тохиолдлын тоо 205 боллоо. Мөн Мөрөн суманд тандалтын зорилгоор худалдааны төв, үсчин, төрийн албан хаагч нараас шинжилгээ авахад эх үүсвэр тодорхойгүй 2 голомт нэмэгдсэн байна.

Эрүүл мэндийн байгууллагаас эх үүсвэрийг тогтоох тандалт судалгааны ажил хийж байгаа бөгөөд иргэдийг амны хаалтаа зүүж, хүн хоорондын зайгаа барин, гараа тогтмол угааж, вакцины бүрэн тунг хийлгэхийг анхааруулж байна.