Category: амьдралын-өнгө

Баян-Өлгий аймагт өнгөрсөн шөнө коронавирусийн халдвар авч эмчлүүлж байсан 6 эх эсэн мэнд амаржжээ.

Тухайн өдөр аймгийн Төрөх тасагт 12 эх, Ковидын эмнэлэгт 6 эх амаржсан байна. Ковидын эмнэлэгт эмчлүүлж байсан эхчүүдийн 2 нь хагалгаагаар, 4 нь төрөх замаар амаржсан байна.

Аймгийн Нэгдсэн эмнэлгийн Эмчилгээ эрхэлсэн орлогч дарга Д.Данабек “Урд шөнө багийнхан маань маш их ачаалалтай хонолоо. Аймагт “Covid-19″ халдвар маш их нэмэгдэж байна. Харамсалтай нь үүн дотор жирэмсэн ээжүүд болон хүүхдүүд маш их хувь эзэлж байна. Зөвхөн урд шөнө гэхэд Ковидын эмнэлэгт халдвартай 6 эх (4 нь төрөх замаар, 2 нь хагалгаагаар), мөн эрүүл 12 эх Төрөх тасагт эсэн мэнд амаржлаа” гэв.

Завхан аймгийн Идэр сумын ард иргэд 12 хоногийн турш хандивын аян өрнүүлж сумын эрүүл мэндийн төвдөө цоо шинэ Фургон автомашин, мотоцикл бэлэглэлээ.

Дархан-Уул аймагт тарвага нутагшуулахаар арван монгол тарвагыг Хустайн байгалийн цогцолбор газраас барьж Хонгор сумын хоёрдугаар багийн нутагт сэргээн нутагшуулжээ.

Тарвага нүхэнд амьдардаг тул цөлжилтөөс сэргийлэх, газрын хөрсийг сийрэгжүүлэх, ургамлын гарцыг нэмэгдүүлэх зэрэг үр нөлөөтэй. Тиймээс жилээс жилд цөлжиж буй байгалийн доройтлыг багасгах зорилгоор тарвага нутагшуулах ажлыг зохион байгуулж байна.

Дархан-Уул аймгийн БОАЖГ-аас ирэх онд монгол тарвага сэргээн нутагшуулах ажлыг мэргэжлийн байгууллагуудтай хамтран үргэлжлүүлэн зохион байгуулна гэж Экологийн цагдаагийн албанаас мэдээлэв.

Сүүлийн 24 цагийн хугацаанд улсын хэмжээнд 1286 хүнээс халдвар илэрлээ. Ингэснээр Монгол улсад батлагдсан халдварын тохиолдлын тоо 164155 болоод байна. Улаанбаатар хотын хэмжээнд 544 тохиолдол шинээр нэмэгдсэн бол 776 тохиолдол орон нутагт бүртгэгдсэн байна.

Орон нутагт бүртгэгдсэн халдварыг тодруулбал,

-Баянхонгор 17,

-Баян-Өлгий 227,

-Булган 23,

-Говь-Алтай 17,

-Говьсүмбэр 25,

-Дархан 83,

-Дундговь 7,

-Дорноговь 10,

-Завхан 25,

-Орхон 35,

-Өвөрхангай 45,

-Өмнөговь 7,

-Төв 57,

-Увс 79,

-Хэнтий 47 тус тус бүртгэгдээд байна.

ӨмнөговьНомгон суманд Залуучуудын хөгжлийн төвийн нээлт боллоо.

Тус аймагт хэрэгжиж байгаа эмэгтэйчүүд, хүүхдийн эрүүл мэндийг дэмжих нэгдсэн хөтөлбөрийн хүрээнд уг төвийг байгуулж байгаа юм. Номгон сумын нийт хүн амын 34.0 хувь нь 14-34 насны залуучууд байна. Уг төвөөр дамжуулан төрөөс залуучуудын чиглэлээр баримтлах бодлого, Залуучуудын хөгжлийг дэмжих монгол улсын хуулийг хэрэгжүүлэх, залуучуудын хөгжил оролцоог нэмэгдүүлэх, амьдрах ухаан, зөв хандлагад уриалах ажлыг зохион байгуулж ажиллана. Нээлтийн ажиллагаанд Аймгийн ЗДТГазрын НБХэлтсийн дарга Ц.Бадамцэрэн, ГБХЗХГазрын дарга Б.Эрдэнэцэцэг, НҮБ-ын Хүн амын сангийн орон нутгийн харилцааны ажилтан Н.Шижиртуяа, сумын удирдлага, залуучуудын төлөөлөл оролцлоо.

Баян-Өлгий аймагт өнөөдрөөс бензиний үнэ литр тутамдаа 300 төгрөгөөр нэмэгдлээ.

Тодруулж хэлбэл, АИ92 бензин 1930 төгрөгөөс 2230, А80 бензин 1930 төгрөгөөс 2200 төгрөг, дизель түлш 2200 төгрөгөөр тус тус худалдаалагдаж эхлээд байна.

Энэ нь өнгөрсөн сартай харьцуулахад бензин дунджаар 600 төгрөгөөр, өмнөх оны мөн үеийнхтэй харьцуулахад 690-740 төгрөгөөр, дизель түлш 330-360 төгрөгөөр тус тус өссөн үзүүлэлт юм.

Шатахууны үнийн өсөлтийг импортлогчид ОХУ-д энэ төрлийн бүтээгдэхүүний үнэ нэмэгдсэнтэй холбон тайлбарлаж байна.

Хүнс хөдөө аж ахуй хөнгөн үйлдвэрийн яам энэ сарын 23, 24-нд Хөдөө аж ахуйн бирж, Хөдөө аж ахуйг дэмжих сангийн төлөөлөл Архангай аймгийн Төвшрүүлэх, Өвөрхангай аймгийн Хархорин суманд ажиллаж тариаланчдын төлөөлөлтэй уулзлаа. Архангай аймгийн Төвшрүүлэх суманд болсон уулзалтад 10 аж ахуйн нэгжийн төлөөлөл, аймгийн Хөдөө аж ахуйн тасгийн дарга, мэргэжилтэн оролцсон. Тариаланчид улаан буудайг биржээр арилжихыг дэмжсэн хандлагатай байсан бөгөөд

• Брокерын шимтгэлийн 0.1 хувийг цаашид өсгөхгүй байх
• Буудайны стандартыг дахин тодорхойлох
• Буудайны цавуулгийг тодорхойлох сайн лаборатори, багажтай байх
• Урамшуулал өгөхгүй байснаар бодит үнэ тогтох боломжтой зэрэг саналыг хэллээ

Энэ жил Төвшрүүлэх суманд 27 аж ахуйн нэгж, иргэн 5819 га талбайд тариалалт хийжээ. Үүнээс 5294 га-д улаан буудай, 420 га-д ногоон тэжээл, 65 га-д овьёос, 40 га-д арвай тариалсан байна. Энэ сарын 11-нд 500 орчим га талбай мөндөрт цохиулж хорогдол үүсгэсэн гэсэн мэдээллийг тэд өгсөн юм.

Харин Өвөрхангай аймгийн Хархорин суманд болсон уулзалтад 15 аж ахуйн нэгжийн төлөөлөл, тус сумын Хөдөө аж ахуйн тасгийн мэргэжилтэн оролцлоо. Тариаланчид биржээр улаан буудай арилжихыг дэмжиж байгаа бөгөөд 3-4 жилийн дараах үнийг урьдчилан мэдэх боломжтой болж, мэдээллийн сан үүсэх нь тэдэнд амар байх тул оролцохоо илэрхийлсэн.

Энэ онд Хархорин суманд 49 аж ахуйн нэгж, иргэд 8.300 га-д улаан буудай, 3230 га-д ногоон тэжээл, 102 га-д овьёос, 12 га-д арвай, нэг га-д эрдэнэ шиш, 100 га-д хүнсний ногоо, 130 га-д төмс тариалсан байна.