Category: амьдралын-өнгө

ОХУ-ын цахилгаан дамжуулах станцын засвартай холбоотойгоор баруун бүсийн хэрэглэгчид гурван хоног цахилгаангүй байгаа талаарх сэтгүүлчийн асуултад Эрчим хүчний сайд Н.Тавинбэх тайлбар хийлээ.

Тэрбээр “Баруун бүсийн хэрэглэгчид цахилгаан эрчим хүчний нийт хэрэглээнийхээ 70 орчим хувийг импортоор авдаг. Манай улс ОХУ-аас 110 кВт-ын хүчдэлийн шугамаар эрчим хүчээ дамжуулан авдаг.

Уг шугамд ОХУ өөрийн эзэмшлийн талд засвар хийх шаардлагатай болсон учраас гурван өдөр буюу есдүгээр сарын 20-22-ны өдрүүдэд 06:00-22:00 цагийн хугацаанд засвар хийж, цахилгааныг хязгаарлаж байгаа. Өөрөөр хэлбэл, өнөөдрийн 22:00 цагт засвар дуусаж хэвийн системдээ шилжинэ” гэсэн юм

Дорнод аймгийн зарим суманд цагаан зээр олноороо үхэж байгаа тухай нутгийн иргэд ярьж байна.

Тодруулбал, Гурванзагал, Чойбалсан, Сэргэлэн, Чулуунхороот, Дашбалбар сумын нутагт зээрийн сэг зэм олноороо таарах болжээ. Энэ талаар аймгийн Мал эмнэлгийн газар “Зээр доголж байгаад үхэх байдал ихээр ажиглагдаж байгаа. Зээрийн сүрэгт шүлхий өвчин гарсан байх магадлалтай гэж үзсэн учир шинжилгээ авч дээжийг төв лабораторид илгээсэн” гэв. Гурванзагал суманд 270 зээрийн сэг зэмийг устгах ажлыг хийж байгаа аж.

Улсын хэмжээнд коронавируст халдварын нийт 280.540 тохиолдол бүртгэгдсэн. Үүнээс 55.1 хувь нь Улаанбаатар хотод бүртгэгдсэн бол 44.2 хувь нь орон нутагт бүртгэгджээ.

Өнөөдрийн байдлаар орон нутагт халдвар нийтдээ 124.234 болоод байна.

Сүүлийн 24 цагт нийт 2543 хүн шинээр халдвар авснаас 1,201 нь орон нутагт бүртгэгдсэн.

Шинээр илэрсэн халдварын тохиолдлыг аймаг тус бүрээр нь харвал өнгөрсөн хоногт Дундговь аймагт хамгийн олон буюу 297 хүн шинээр халдвар авчээ. Ингэснээр тус аймагт нийт батлагдсан тохиолдол 4065 болов.

Түүнчлэн Булган аймагт 113 тохиолдол шинээр илэрсэн бол Завхан аймагт халдвар нэмэгдээгүй байна. Харин бусад аймагт 100-аас доош тохиолдол бүртгэгджээ.

13 настай хүү тогтоол усанд живж, амиа алдсан харамсалтай хэрэг гарчээ.

Тодруулбал, өчигдөр 13:00 цагийн орчимд Хөвсгөл аймгийн Бүрэнтогтох сумын төвөөс 36 километр зайд орших Нугын тохой гэдэг газар тогтоол усанд хүүхэд живсэн тухай дуудлага Онцгой байдлын газарт иржээ.

Дуудлагын дагуу тус аймгийн Онцгой байдлын газрын Эрэн хайх, аврах салбарын алба хаагчид очиход 13 настай хүү 2-3 метрийн гүнтэй ухсан карьерын тогтоол усанд живсэн байсныг 21 минут ажиллаж, цогцсыг гарган аймгийн Цагдаагийн газрын мөрдөн байцаагчид шилжүүлэн өгсөн гэж Онцгой байдлын ерөнхий газраас мэдээллээ.

Дорноговь аймгийн Сайншанд сумын 6 дугаар баг, Жанчивын гудамж “Газрын тосны үйлдвэрийн хотхон”-оос байлдааны зориулалттай сум илэрсэн тухай дуудлага 11:26 цагт Онцгой байдлын албанд иржээ.

Тус аймгийн Онцгой байдлын газрын Гал түймэр унтраах, аврах 33 дугаар ангийн алба хаагчид 0.5 км замыг туулан 11:28 цагт очиж, 3 минут ажиллан 50 см урттай 120 мм голчтой “Миномётын мин”, нэг ширхэг сумыг аюулгүй болгосон байна.

Ташрамд мэдээлэхэд өнгөрөгч 2020 онд Төв аймгийн Сэргэлэн суманд байрлах Зэвсэгт хүчний 016-р ангийн сургалтын талбайд миномётын сум дэлбэрч, хоёр алба хаагч гэмтэж байв.

Эрдэнэт үйлдвэрийн Ил уурхайн олборлолтын зардлын 45 хувийг технологийн тээвэр эзэлдэг. Уурхай гүнзгийрэх тусам тээвэрлэлтийн дундаж зай уртасч, тэр хэрээр зардал байнга өсөн нэмэгддэг. Иймээс үйлдвэрийн газрын удирдлагууд уулын цул тээвэрлэлтэд мөчлөгт урсгалт тээврийн технологи буюу хосолмол тээврийн систем нэвтрүүлэхээр өнгөрсөн хавар ХБНГУ-ын “3В TEC AUFBEREITUNGSSYSTEME” компанитай “түлхүүр гардуулах” нөхцөлтэйгээр гэрээ байгуулснаар эхэлсэн юм.

Уулын цул тээвэрлэлтийн зардлыг 37 хувиар, хүдэр олборлолтын өөрийн өртгийг 20 хувиар бууруулах энэхүү ажлын техник, эдийн засгийн үндэслэл боловсруулах, тоног төхөөрөмжийн нарийвчилсан зураг гаргах ажил өнөөдрийн байдлаар бүрэн дуусч, үйлдвэрлэлийн шатандаа шилжээд байна. Удахгүй барилга угсралтын ажил эхлэх бөгөөд ирэх оны долдугаар сард ашиглалтад хүлээн авна гэж тус үйлдвэрийн ХМОНХА-аас мэдээллээ.

Хөвсгөл аймгийн Мөрөн сум хоногт 3000м3 бохир ус цэвэрлэх хүчин чадалтай орчин үеийн биологи цэвэрлэгээний цэвэрлэх байгууламжтай боллоо.

Өнөөдөр УИХ-ын гишүүн Л. Энх-Амгалан, Л. Мөнхбаатар, Барилга, хот байгуулалтын сайд Б. Мөнхбаатар, Барилгын хөгжлийн төвийн захирал Ц. Амарсанаа, аймгийн ИТХ-ын дарга Г. Мөнгөнхуяг, Мөрөн сумын Засаг дарга Ш. Идэрбаясгалан, Төслийн удирдагч Б. Оюун нар тууз хайчилж албан ёсоор нээлт хийлээ. Энэхүү Цэвэрлэх байгууламж нь Азийн хөгжлийн банкны хөнгөлөлттэй зээлээр хэрэгжиж буй “Зүүн өмнөд говийн хот байгуулалт, хилийн ойролцоо суурин газруудын хөгжлийн нэмэлт санхүүжилтийн MOН-3713 төсөл”-ийн хүрээнд баригдсан. Цэвэрлэгдсэн усаа ногоон байгууламж, зам талбай услахад дахин ашиглах, цэвэрлэх байгууламжаас гарч буй лагийг боловсруулж шахмал түлш гарган авах боломжтой дэвшилтэт технологи бүхий Цэвэрлэх байгууламж юм.

Аймгуудад анх удаа монгол инженерүүд Монгол орны цаг уурын нөхцөлд тохирохуйц цэвэрлэх байгууламжийн шийдэл гарган, нэг маягийн зураг төсөл болгон батлуулж, тус төслөөр хэрэгжүүлж байгаа нь онцлог юм. Шинээр барьсан Цэвэрлэх байгууламжийн үйл ажиллагааг цаашид үргэлжлүүлэн авч явах ашиглагч байгууллага болох “Хөвсгөл ус суваг” ХХК-ийн 22 ажилтныг онолын болон танилцуулах сургалтад хамруулж, ажиллуулж байна. Барилга, байгууламжийг ашиглалтад хүлээж авсан өдрөөс эхлэн цэвэрлэх байгууламжийн туршилт тохируулга, зүгшрүүлэлтийн ажил 1 жилийн хугацаанд үргэлжлэх юм байна.

Цэвэрлэх байгууламжийн барилгын гүйцэтгэгч “Набсан” ХХК болон “Эс Энд Эй Трейд” ХХК төлөвлөсөн хугацаанд нь ашиглалтад орууллаа гэж Барилга, хот байгуулалтын яамнаас мэдээллээ.