Category: спорт

Израилын Тель Авив хотноо өнөөдөр IJF-ийн дэлхийн цуврал тэмцээн Гранд слам ангиллаар зохион байгуулагдана. Тэмцээний эхний өдөр уламжлал ёсоор -60, -66, эмэгтэй -48, -52, -57 кг-ын жингийн аваргууд тодорно. Тель Авив хотноо 34 улсын эрэгтэй 165, эмэгтэй 133, нийт 298 жүдоч хуран цуглажээ. Эхний өдөр манай улсаас зургаан жүдоч хүч үзнэ.

-60 кг: Нийт 23 жүдоч хүч үзэх энэ жинд Өвөрхангай аймгийн Баянгол сумын харъяат, “Женко” клубын тамирчин Энхтайваны Сумъяабазар, Увс аймгийн Тэс сумын харъяат, “Эрдэнэт үйлдвэр” ТӨҮГ-ын “Хангарьд” спорт клубын тамирчин Бямбажавын Цогт-Очир нар барилдана. Э.Сумъяабазар тэмцээний чансааны 8-д эрэмбэлэгдсэнээр сугалаанд А хэсэгт бичигдэн, эхний тойрогтоо гоц мөргөөд, хоёрын даваандаа Европын залуучуудын аварга, Украины Дилшот Халматов, Израилын Ям Вользак нарын ялсантай шигшээ наймд шалгарахын төлөө хүч үзнэ.

Ялсан тохиолдолд хэсгийн аваргын төлөө ДАШТ-ий хүрэл медальт, тэмцээний чансааг тэргүүлж буй Азербайжаны Карамат Хусейновтой оноолт таарах магадлал өндөр байна. Харин энэ оны Португалийн Гран Пригийн хүрэл медальт Б.Цогт-Очир эхний тойрогтоо өсвөр үеийн ДАШТ-ий мөнгөн медальт Италийн Д Анжело Биажотой учраа таарсан. Өрсөлдөгчөө ялсан тохиолдолд С хэсгийг тэргүүлэгч өнгөрсөн оны Антальягийн Гранд Сламын аварга Бельгийн Жорре Верстраетентэй учраа таарна. Улмаар ялбал шилдэг наймд шалгарч, залуучуудын ДАШТ-ий мөнгө, өнгөрсөн оны Парисын Их дуулгын аварга Азербайжаны Агаев Балабайтай барилдах боломжтой.

-66 кг: Нийт 26 жүдоч хүч үзэх энэ жинд “World Masters”-ийн алт, мөнгөн медальт, “Сүлд” спорт хорооны тамирчин ОУХМ Ганболдын Хэрлэн, Хэнтий аймгийн тамирчин -66 кг-ын жингийн улсын аварга Гүнжинлхамын Сод-Эрдэнэ нар барилдана. 2021 оны ДАШТ-ээс хойш олон улсын тэмцээнд оролцоогүй байсан Г.Хэрлэн тэмцээний чансааны 4-т эрэмбэлэгдэж, В хэсгийг тэргүүлэн барилдахаар болсон. Тэрбээр эхний тойрогт гоц мөргөөд, хоёрын даваандаа эзэн орны Ярин Менагед, Узбекистаны Бобур Яджиев нарын ялсантай барилдана. Ялсан тохиолдолд Украины Богдан Ядовтой барилдах магадлал өндөр байна.

Домогт жүдоч Георгий Зантарая зодог тайлснаар Украины -66 кг-ын жингийн гол төлөөлөл болсон энэ залуу өнгөрсөн оны төгсгөлд Абу Дабигийн Их дуулга, энэ оны Португалийн Гран Пригээс хүрэл медаль хүртээд байгаа юм. Харин манай залуу мастер Г.Сод-Эрдэнэ эхний тойрогтоо 2021 оны залуучуудын ДАШТ-ий мөнгөн медальтай Германы Сламбергер Леннарттай учраа таарлаа. Энэ бөхийг ялбал хэсгийг тэргүүлэгч эзэн орны Барух Шмайловтой барилдана. Сонирхуулахад, энэ жинд -60 кг-ын олимпийн мөнгө, хүрэл, ДАШТ-ий алт, хүрэл медальт Казахстаны Елдос Сметов, Гусман Кыргызбаевийн хамт жин өгсөн барилдах гэж байна.

-48 кг: Парисын “Их дуулга”-аас мөнгөн медаль хүртэж, чансаагаа үлэмж нэмэгдүүлсэн Бавуудоржийн Баасанхүү эхний тойрогтоо 2021 оны залуучуудын дэлхийн аварга, 2021 оны Абу Дабигийн Их дуулгын аварга Италийн Скутто Ассунтатай шилдэг наймд шалгарахын төлөө хүч үзнэ. Ялбал хэсгийн аваргын төлөө эзэн орны бөх Шира Ришонитой барилдах өндөр магадлалтай. Энэ жинд нийт 20 жүдоч хүч үзэх бөгөөд Францын Ширинли Боукли тэргүүлэн барилдаж байна. Хэрвээ манай бөх хэсгээ тэргүүлбэл хагас шигшээд Ш.Боуклитэй учраа таарна.

-57 кг: Өсвөрийн Ази, номхон далайн орнуудын аварга Оюунгэрэлийн Оюунчимэг эхний даваандаа өөрөөсөө 10 насаар эгч Казахстаны Севара Нишанбаеватай учраа таарсан. Энэ бөхийг ялбал тэмцээний чансааг тэргүүлэгч эзэн орны Тимна Нельсон Левайтай учраа таарна.

Тэмцээний хэсгийн барилдаанууд Улаанбаатарын цагаар өнөөдөр 17:00 цагаас эхлэх бол медалийн барилдаанууд 23:00 цагт эхэлнэ.

Арабын Нэгдсэн Эмират улсад зохиогдсон хөлбөмбөгийн багуудын ДАШТ-д Европ тивийг төлөөлөн оролцож буй (Аваргуудын лигийн аварга учир) Лондонгийн “Челси” баг нэмэлт цагт Бразилийн “Палмейрас”-ыг 2:1-ээр буулган авч анх удаагаа уг цомыг хүртэж үзлээ. Тэд 2012 онд уг тэмцээнд анхлан оролцохдоо финаль хүртэл тоглоод аваргын төлөө Бразилийн “Коринтианс”-т нухуулан хоосон үлдэж байсан юм. “Челси” багийн ахлах дасгалжуулагч Томас Тухель, багийн эзнийхээ талаар “Би түүнтэй ялалтын дараа талбай дээр таарсан. Тэгээд энэ ялалт бол таных, таны багийн төлөө юм шүү. Таны хичээнгүй зүтгэлт, хөрөнгө оруулалтын үр дүн гэдгийг нь хэлсэн” гэв. Учир нь “Челси” багийн эзэн Оросын тэрбумтан Роман Абрамовичийн үед тус баг 21 дэх цомоо хүртсэн, уг хүн өөрөө тухайн тоглолтыг хүрэлцэн ирж үзээд тоглолтын дараа багийнхантайгаа хамт байж баяраа хуваалцсан бөгөөд ийм үедээ Тухельтай удаан хугацаагаар ярилцаж байсан нь сэтгүүлчдийн анхаарлыг татжээ. Тухель сүүлийн үед багийнхантайгаа ам мурийж тааламжгүй байгаа, суудлаасаа ховхорч магадгүй гэж таамаглах болсонд энэ ялалтаараа хариу барилаа.

Д.БАТ-ЭРДЭНЭ

МҮОХ-ны тэргүүн дэд ерөнхийлөгч, ОУОХ-ны гишүүн Б.Баттүшиг ОУОХ-ны ерөнхийлөгч Томас Бахтай уулзлаа.

Уулзалтын үеэр Б.Баттүшиг “Бээжин-2022” өвлийн олимпын наадам өндөр түвшинд зохион байгуулагдаж байгааг онцлон талархал илэрхийлэв.

Мөн энэ удаагийн олимпод Монгол Улс гүйлтийн цанын төрлөөр хоёр тамирчинтай оролцож байгааг дурдан цаашид Монгол Улсад өвлийн спортын төрлүүдийг онцгой анхааран хөгжүүлэх, өвлийн спортын төрлүүдийг нэмэхэд шаардлагатай ажлуудын төлөвлөгөөг танилцуулж, санал солилцлоо.

Монгол Улсын Ерөнхийлөгчийн ивээл дор зохион байгуулагдах МХБХ-ны 21 аймгийн Футзалын аварга шалгаруулах тэмцээн цар тахлын улмаас хоёр жилийн дараа эргэн ирэхээр болжээ.

Тэмцээн энэ сарын 27-ноос ирэх гуравдугаар сарын 6-ны хооронд Баянхонгор аймгийн Эрдэнэмандал цогцолбор сургуулийн зааланд явагдах аж.

Энэхүү тэмцээн 2017 оноос хойш зохион байгуулагдахад “Дархан-Уул” аймгийн шигшээ баг гурван жил дараалан түрүүлсэн билээ.

“Монгол Майкл Фелпс” гэх Баянгол дүүргийн тамирчин, ОБЕГ-ын аврагч Ш.Даваадоржтой өвлийн усанд сэлэлтийн дэлхийн цомын тэмцээнээс дөрвөн медаль хүртсэн байна. Тэрбээр өвлийн болон мөстэй усанд сэлэлтээр хичээллэдэг монголын цорын ганц тамирчин юм. Түүний хувьд 2018-2019 онд ахмадын ДАШТ, дэлхийн цом, олон улсын тэмцээнээс 32 алт, 29 мөнгө, 14 хүрэл медаль хүртсэн амжилтаар дэлхийн чансааг тэргүүлж, цом эзэмшиж байсан бол өдгөө түүний амжилт ийнхүү нэмэгдсээр байна.

Шведэд зохион байгуулж буй Өвлийн усанд сэлэлтийн дэлхийн цомын аварга шалгаруулах тэмцээнээс Ш. Даваадорж хоёр мөнгө, хоёр хүрэл медаль хүртжээ. Ингэснээр мөстэй усанд сэлэлтийн дэлхийн аваргаас нэг мөнгө нэг хүрэл, өвлийнхөөс хоёр мөнгө, хоёр хүрэл медаль хүртээд байна.

Усанд сэлэлтээр 38 жил хичээллэж буй тэрбээр одоогоор найман жилийн өмнө 45 наснаасаа эхэлж мөстэй усанд сэлэлтийн төрлөөр хичээллэж эхэлсэн аж. Усанд сэлэлтийн спорт ердийн, мөстэй усанд сэлэлт, өвлийн усанд сэлэлт гэсэн гурван төрөл байдаг. Ердийн усанд сэлэлт нь бассейн дотор нэмэх 28 градуст уралддаг. Харин мөстэй усанд сэлэлт болон өвлийн усанд сэлэлтийн зэрэг бол хасах хоёроос хоёр градуст байдаг юм байна.

Швед улсад болсон энэ удаагийн тэмцээн бол Скандиновын улс орнуудын өвлийн усанд сэлэлтийн дэлхийн цомын аварга шалгаруулах тэмцээн бөгөөд нийт 25-100 метрийн зайд тамирчид уралджээ.

Ш.Даваадорж мөн өвлийн олимпийн нээлт болсон хоёрдугаар сарын 4-ний өдөр мөстэй усан сэлэлтийн дөрөв дэх удаагийн дэлхийн аваргаас мөнгө, хүрэл медаль хүртсэн. Хоёр жил тутам зохион байгуулдаг энэ тэмцээн өнгөрсөн жил цуцлагдаж, энэ жил Польш улсын Глоков хотод болсон юм.