Category: мэдээ

Энэ сарын 30-ны байдлаар
хүнсний гол нэрийн барааны үнийг өмнөх сарын дундаж үнэтэй харьцуулахад 5.4
хувь, өмнөх 7 хоногийнхтой харьцуулахад 1.6 хувиар өсчээ.

Махны
дундаж үнэ:
 Хонины
ястай махны үнэ өмнөх сарынхаас 11.7 хувь, үхрийн цул мах 7.0 хувь, адууны мах
3.8 хувь, үхрийн ястай мах 2.2 хувь, ямааны мах 1.0 хувиар өссөн байна. Өмнөх 7
хоногийнхоос үхрийн ястай махны үнэ 4.6 хувь, хонины ястай мах 4.0 хувь, ямааны
мах 3.9 хувь,  адууны мах 3.7 хувь, үхрийн цул махны үнэ  1.6 хувиар
өссөн байна. 1 кг хонины /ястай/ мах дунджаар 7865 төгрөг, үхрийн /ястай/ мах
8610 төгрөг, үхрийн цул мах 10670 төгрөг, адууны мах 6795 төгрөг, ямааны мах
5780 төгрөгийн үнэтэй байв.

Гурилын
үнэ:
 Энэ
сарын 30-ны байдлаар дээдийн дээд зэргийн савласан гурилын үнэ өмнөх сарынхаас
3.9 хувь, өмнөх 7 хоногийнхоос 2.4 хувиар буурч, дээд зээргийн савласан гурил
өмнөх сарынхаас өөрчлөлтгүй, өмнөх 7 хоногийнхоос 0.4 хувиар   өссөн
байна. 1-р зэргийн гурилын үнэ өмнөх сарынхаас 11.7 хувь, өмнөх 7 хоногийнхоос
4.2 хувиар өсч, 2-р зэргийн гурилын үнэ өмнөх сарынхаас 5.0 хувь, өмнөх 7
хоногийнхоос 2.5 хувиар өссөн байна.

Будаа,
элсэн чихрийн дундаж үнэ:
 Цагаан
будааны үнэ өмнөх  сарынхаас болон өмнөх 7 хоногийнхоос 0.2 хувиар буурсан
бол элсэн чихэр өмнөх сарынхаас 0.3 хувиар өсч, өмнөх 7 хоногийнхоос
өөрчлөлтгүй байна.

Төмс,
хүнсний ногооны дундаж үнэ:
 Төмс,
хүнсний ногооны үнийг өмнөх сарын дундаж үнэтэй харьцуулахад сонгиноны үнэ 0.4
хувь, луувангийн үнэ 3.7 хувиар буурч, төмсний үнэ 0.5 хувь, байцааны үнэ 3.9
хувь,   манжингийн үнэ 2.5 хувиар өссөн байна.   

Өмнөх 7 хоногийнхоос төмсний үнэ өөрчлөлтгүй,
байцаа, лууван, сонгиноны үнэ 0.4 хувь, манжингийн үнэ 0.3 хувиар буурсан
байна.

Сүү, өндөг, ургамлын
болон цөцгийн тосны дундаж үнэ:
 Энэ сарын 30-ны байдлаар өмнөх сарынхаас савласан /1
литрийн/ сүүний үнэ 9.4 хувь, “Элекстер” /0.5 л/ савласан сүүний үнэ
26.6 хувиар өсч, задгай сүүний үнэ 2.3 хувиар буурсан, өмнөх 7 хоногийнхоос
“Элекстер” /0.5 л/ савласан сүү 0.4 хувиар өсч, савласан /1 литрийн/
сүүний, задгай сүүний үнэ өөрчлөлтгүй байна.

Ургамлын тосны үнэ өмнөх сарынхаас болон өмнөх 7
хоногийнхоос 0.6 хувиар буурч, өндөгний үнэ өмнөх сарынхаас болон өмнөх 7
хоногийнхоос 1.2 хувиар буурч,  харин цөцгийн тосны үнэ өмнөх сарынхаас
болон өмнөх 7 хоногийнхоос өөрчлөлтгүй байна.

ИХШХЕГ-ын дарга
Б.Пүрэвдорж 11-11 төвд ажиллаж,  иргэдийн асуултад онлайнаар хариулт
өглөө.  Энэ үеэр БНСУ руу явахад шаарддаг барьцааны мөнгөний талаар
тайлбар өгсөн юм. ИХШХЕГ-ынхан БНСУ-д айлчлал хийх үеэрээ Монголын иргэд
Солонгос улс руу зорчихдоо өгдөг барьцаа мөнгөний талаар холбогдох албаны
хүмүүстээ ярилцаж, харилцан зорчиж байгаа иргэд адил тэгш эрхтэй байх
тухай зарим асуудлаар тохиролцжээ. Ингэснээр урилгагүй тохиолдолд байршуулдаг
байсан 20 сая төгрөгийг 14 сая, урилгатай хүнээс шаарддаг 10 сая төгрөгийг 7
сая болгон бууруулжээ.  Цаашдаа энэ барьцаа мөнгийг 5, 10 сая төгрөг, бүр
барьцаагүй болгохоор ажиллаж байгаа гэсэн хариултыг ИХШХЕГ-ын дарга өглөө.

Үндэсний статистикийн
хорооноос энэ оны нэгдүгээр улирлын дотоодын нийт бүтээгдэхүүний үйлдвэрлэлийн
хэмжээг тооцон гаргажээ. Ингэхдээ эдийн засгийн бодит өсөлтийг харуулахын тулд
суурь үнийг ашигладаг бөгөөд энэ үнийг таван жил тутамд шинэчилдэг билээ.
Монгол Улсын дотоодын нийт бүтээгдэхүүн 2005 оны зэрэгцүүлэх үнээр 1148.1
тэрбум төгрөгт хүрч, өмнөх оны мөн үеийнхээс 7.4 хувиар өслөө. Үүнд хөдөө аж
ахуйн салбарын нэмэгдэл өртгийн хэмжээ 18.4 хувь, аж үйлдвэр, барилгын
салбарынх 15.7 хувиар өссөн нь голлон нөлөөлжээ.  Дотоодын нийт бүтээгдэхүүн оны үнээр энэ оны
нэгдүгээр улирлын урьдчилсан гүйцэтгэл 3439.0 тэрбум төгрөгт хүрч, өмнөх
үеийнхээс 18.3 хувиар өслөө. Энэ нь өмнөх улирлынхаас 2.2 хувиар өссөн дүн аж. 

Нэгдүгээр улиралд дотооддоо үйлдвэрлэсэн
бүтээгдэхүүн, үйлчилгээ нэгдүгээр улиралд 3753.6 тэрбум төгрөгт хүрчээ. Энэ нь
өмнөх оны мөн үеийнхээс оны үнээр 738.2 тэрбум төгрөг буюу 24.5 хувь,
зэрэгцүүлэх үнээр 79.7 тэрбум төгрөг буюу 7.4 хувиар өслөө.
ДНБ-д эцсийн хэрэглээ  72.6 хувь, хөрөнгийн
нийт хуримтлал 35.2 хувь, цэвэр экспорт -7.8 хувийг эзэлж байна. Энэ нь өмнөх
оны мөн үеийнхээс эцсийн хэрэглээ 6.5 пункт, хөрөнгийн нийт хуримтлал 12
пунктээр  тус тус буурсан хэдий ч цэвэр экспорт 18.5 пунктээр өссөн байна.

Дэлхийн банкны Монгол дахь Суурин төлөөлөгч энэ сард тодорно хэмээн ноён Клаус Роланд мэдэгдлээ.

Дэлхийн банк хамтын ажиллагаатай улс бүртээ Суурин төлөөлөгч, Төлөөлөгчийн газраа ажиллуулдаг. Манай оронд өнгөрсөн дөрвөн жил ажилласан хатагтай Корали Геверсын томилолтын хугацаа дуусч, энэ гуравдугаар сард буцсан билээ. Харин дараагийн хүн хэн байх талаар тус банкны Монгол, БНСУ, БНХАУ-ыг хариуцсан дарга ноён Клаус Роланд Ноён “Дэлхийн банкны Суурин төлөөлөгч шалгаруулах явц хэвийн үргэлжилж байгаа. Нийт 30 хүн өрсөлдсөн” гэв.

Суурин төлөөлөгчөөр ажиллах хүсэлт томилогдох улсаас шууд хамаардаг бөгөөд ийм тооны хүмүүс өрсөлдсөн тохиолдол Дэлхийн банкинд ховор байдаг гэнэ. Ямартай ч тэдгээр 30 хүнээс эхний шалгаруулалтаар найм нь үлдэж, сүүлийн шатны ярилцлагад 3 хүн оролцохоор болжээ.

Нийслэлийн Засаг даргын
Санхүү, эдийн засгийн асуудал хариуцсан орлогч Н.Батаа “Татвар төлөгчдийн
өдрүүдийг зохион байгуулах тухай” А/342 дугаар захирамж гаргалаа.
Захирамжийн дагуу нийслэлийн хэмжээнд татвар төлөгчдийн өдрүүдийг энэ сарын
5-9-ний өдрүүдэд зохион байгуулахаар боллоо. Энэ үеэр нийслэл дүүргүүдийн
бүтээн байгуулалтад бодитой хувь нэмэр оруулсан тэргүүний татвар төлөгч, аж
ахуйн нэгж байгууллага, иргэдийг шалгаруулж, сурталчилах юм. Нийслэлийн Засаг
даргын үүргийн дагуу тус өдөрлөгийг зохион байгуулах үйл ажиллагааны болон
тэргүүний татвар төлөгчдийг урамшуулах, сурталчилгааны ажилд шаардагдах зардал
болох 12 523 000 төгрөгийг Засаг даргын нөөц сангаас гаргах юм байна.