Category: мэдээ

Монголын үндэсний их сургуулийн оюутнууд болон “Энигма” компанийн төлөөлөгчид өнөөдөр Байгаль орчин, ногоон хөгжлийн яамны гадна жагсаал зохион байгууллаа. Жагсаалд “Байгаль дэлхийгээ хамгаалъя”, ”Төсвийн мөнгийг үргүй зарахаа больё” гэх уриа лоозон барьсан 100 гаруй  оюутнууд оролцжээ.
Өнгөрсөн жилээс эхлүүлсэн Зайсангийн тусгай хамгаалттай газарт цахилгаан шугам барих нэрээр  зам дагуух  мод, сөөгийг гэмтээж, байгаль орчинд халтай үйл ажиллагаа явуулж байна хэмээн жагсагчид хэлж байв. Тэд уг ажлыг гүйцэтгэж буй “Сөүл” группийн “Мантууш” ХХК-ийг Монгол Улсын хуулийг уландаа гишгэж байна гэх тайлбарыг мөн өгч байлаа.
Байгаль орчин, ногоон хөгжилийн яамны Төрийн тусгай хамгаалалтын газрын ахлах ажилтан А.Долгормаа жагсаалд оролцогчдын тавьж буй асуудлын талаар “Зайсан толгойн орчим цахилгааны шугам тавих ажлыг бид улсын төсвөөр гүйцэтгэж эхлэн, ажлаа явуулж байгаа нь үнэн. Гэхдээ тэр ажлын хүрээнд байгаль орчинд халтай зүйл юу ч хийгээгүй. “Энигма” ХХК болон МҮИС-ийн өмчийн багахан газарт хоёр ширхэг цахилгааны мод татаж оруулсныг энэ хүмүүс эсэргүүцэж байгаа гэж ойлголоо” гэв.

Э.Номин

Төсвийн байнгын хорооны дарга Ц.Даваасүрэн өнөөдөр мянган оюутны байрны үйл ажиллагаатай танилцлаа. Шинэ  ашиглалтад орсон “Оюутны өргөө” дотуур байранд хувийн хэвшлийн болоод төрийн өмчийн нийт 22 их, дээд сургуулийн  960 оюутан амьдарч байгаа юм байна.  Нэг оюутанд дөрвөн мкв талбай оногдож байгаа гэнэ. Давхар бүртээ утасгүй интернеттэй юм байна.  40-60 оюутны багтаамжтай уншлагын танхимтай  аж. Цаашид Дэлхийн эрүүл мэндийн байгууллагын тусламжтайгаар оюутнуудад зориулсан эрүүл мэндийн болон бие бялдаржуулалтын фитнесс төв байгуулахаар төлөвлөж байгаа гэнэ.  “Оюутны өргөө” шинэ дотуур байрыг гавьяат багш Г.Бадам хариуцан ажиллаж байгаа юм байна. Энэ үеэр Ц.Даваасүрэн гишүүн хэлэхдээ, “Их, дээд сургуулийн захирлууд шинэ дотуур байр барьж байгуулах хүсэлтэй байдаг ч газар байхгүй гэдэг хүндрэлээс болоод  гацаанд ордог. Тиймээс хуучин дотуур байруудыг нурааж газар дээр нь шинэ байр босгох санал Монголын оюутны холбоонд цөөнгүй ирсэн байна. Залуу үеэ тав тухтай орчинд сургах, зөв төлөвшил хүмүүжил олгоход шинэ оюутны байраар хангах нь маш чухал. Оюутны дотуур байрыг шинэчлэх ажил хийгдсэнээр цаашлаад залуу гэр бүлд ч ач холбогдолтой. Учир нь цогц “Оюутны хотхон” бүрэн ашиглалтад ормогц  залуу гэр бүлд шинэ баригдсан оюутны байр шилжин очих боломж бүрдэнэ” гэлээ.

М.Ундрам

Өнөөдрийн байдлаар Хангай нуруунаас эхтэй Идэр, Хануй, Богд, Чигэстэй, Буянт, Хожуул, Онги, Таац, Хэнтэй нуруунаас усжих Ерөө, Туул, Алтай нурууны Сагсай, Булган мөн түүнчлэн Сэлэнгэ мөрөн Орхон голын эхээр усны түвшин өмнөх өдрийнхөөс 5-30 см нэмэгдсэн байна. Хангай нурууны өврийн Тээл, Хомын хоолой , Хэнтэй нурууны зүүн хажуугийн Хэрлэн гол Мөнгөнморьт, Их Хянганы нуруунаас эхтэй Халх гол Ялалт баг орчимд үерийн түвшинг 5-25 см давсан байна. Хангай нурууны арын Идэр, Урдтамир, өврийн Чигэстэй, Буянт, Хожуул, Яруу, Завхан, Зүйл, Байдраг, Шаргалжуут, Онги, Зэгстэй, Таац, Хэнтэй нурууны баруун хажуугийн Хүдэр, Шарын гол, Ерөө, Тэрэлж, Улиастай, Туул, зүүн хажуугийн Хурх, Барх, Онон, Хэрлэн, Халх гол болон Алтай нурууны Буянт, Долооннуур, Увс нуурын савын Хархираа, Түргэн, Сэлэнгэ мөрний дунд болон адаг хэсгээр олон жилийн дундаж түвшинг 10-50 см давсан байна. Иймд дээр дурьдсан гол мөрний сав газраар нутаглаж буй малчид, ард иргэдийг үер усны аюулаас сэрэмжтэй байхыг  Цаг уур орчны шинжилгээний газраас онцгойлон анхааруулав.

Нийслэлийн удирдах ажилтнуудын ээлжит шуурхай зөвлөгөөн өнөөдөр болж, өнгөрсөн 14 хоногийн нөхцөл байдлын талаар Нийслэлийн Цагдаагийн газар, Онцгой байдлын газар, Замын цагдаагийн газраас мэдээлэл өглөө.
Нийслэлийн Цагдаагийн газар энэ сарын 02-16-ний өдрүүдэд иргэд, аж ахуйн нэгж, байгууллагаас гэмт хэрэг, зөрчлийн шинжтэй 22676 мэдээ, мэдээлэл хүлээн авчээ.
 Амиа хорлосон болон золгүй явдлын улмаас 76 хүний амь нас хохирчээ. Шалтгаан нөхцөлийг авч үзвэл 45 буюу 59.2 хувь нь өвчний улмаас, 10 буюу 13.1 хувь нь боомилж, хоёр хүн мотоциклээс унаж, осгож 16 буюу 21.0 хувь нь ил харагдах шарх сорвигүй нас барсан байна.
Нийслэлийн Онцгой байдлын газар гамшиг ослын 98 удаагийн  дуудлага хүлээн авснаас, объектын гал түймрийн 81 дуудлага, техникийн болон ахуйн холбогдолтой ослын  17  дуудлага байна. Зам тээврийн болон ахуйн осолд бэртэж гэмтсэн гурван хүнд эмнэлгийн анхан шатны тусламж үзүүлэн, болзошгүй гамшгийн аюулаас 30 хүний амь биеийг авран хамгаалжээ. Тавдугаар сарын 10-ны өдөр Баянгол дүүргийн 20 дугаар хорооны нутаг дэвсгэрт байршилтай  “Барс-2” худалдааны төвийн Цайны газарт хийн түлшнээс гарсан галыг НОБГ-ын Аврах гал унтраах 18, 26, 10, 30 дугаар ангиуд худалдааны төвийн урд хэсэгт байрлах өргөтгөлийн зэргэлдээх повьлионы дээвэр, хана шатаж байсныг  нийт 68 алба хаагч, гал унтраах зориулалтын 13 автомашинтай 2 цаг 30 минут ажиллан бүрэн унтраасан байна. Мөн уржигдар Чингэлтэй дүүргийн гуравдугаар хороо, Хуучнаар Улсын их дэлгүүрийн баруун жигүүрийн 3-5 дугаар давхаруудын агааржуулалт, техникийн өрөөний 380 вольтын цахилгаан дамжуулах босоо цахилгааны утас шатаж байсныг онцгой байдлын албаныхан амжилттай унтраажээ. Аж ахуйн нэгжүүд цахилгааны аюулгүй байдлыг хангаагүйгээс гал гарч их хэмжээний хохирол учрах тохиолдол нэмэгдэж байгаа тул анхаарал хандуулж, холбогдох журмыг баримтлан ажиллахыг Нийслэлийн Онцгой байдлын газраас анхааруулсан.
Харин Нийслэлийн Цагдаагийн газрын харъяа Замын цагдаагийн газрын Шуурхай удирдлага зохицуулалтын хэлтэст  зам тээврийн ослын нийт 372 дуудлага  бүртгэгджээ. Үүнээс хүн гэмтсэн хэргийн  шинжтэй 161, осол, зөрчлийн шинжтэй 211 дуудлаганд очиж хойшлуулшгүй ажиллагаа явуулсан байна. Зам тээврийн хэргийн улмаас хүний амь нас хохирсон хэрэг 6 бүртгэгдсэн байна. Өнгөрсөн 14 хоногийн хугацаанд хүүхэд өртсөн осол 40  бүртгэгдсэн байгааг урьд оны мөн үеийн үзүүлэлттэй харьцуулахад  29.8 хувиар буурчээ гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.
 

Гал команд, цагдаа, түргэн тусламж шиг л хүүхдийн тусламжийн 108 дугаар бий болох нь. Үндэсний хэмжээний үнэ төлбөргүй энэ утас тавдугаар сарын 30-наас нээлтээ хийх юм. Хүүхдийн тусламжийн утас бий болгоход Мобиком, Дэлхийн зөн Монгол олон улсын байгууллага, Хүүхдийн төлөө үндэсний газар  хамтран ажиллахаар болжээ.  18 хүртэлх бүх л насны хүүхдэд шаардлага гарсан, эрсдэл учирсан тохиолдолд  тусламж дэмжлэгийг орон даяар тархсан салаа мөчрөөрөө дамжуулан үзүүлэх юм байна.  Хүүхэд 108 дугаар руу залгахад 24 цагийн турш  тусламж,  зөвлөгөө өгөх  аж.
Дэлхийн зөн Монгол байгууллага мэдээллийн технологийн дэвшилтэт тоног төхөөрөмж болон программыг нийлүүлж, хүмүүсээ сургахад тусалжээ.  Өнөөдрөөс эхлэн Хүүхдийн төлөө үндэсний газарт утасны үйлчилгээ үзүүлэх зөвлөхүүдийг сургаж  эхэлсэн аж.  Зөвлөхүүд нь сэтгэл зүйч мэргэжилтэй, хүүхэдтэй хоёроос доошгүй жил ажилласан хүн байх гэнэ.   Хүүхдийн утас нь хүүхдийн дуудлагыг хүлээн авч, оновчтой арга хэмжээг зохион байгуулж, цагдаа эмч, сэтгэл зүйч, нийгмийн ажилтантай холбож өгнө. 108 утасны гол үүрэг нь  хүүхдийг хэрэгцээтэй мэдээллээр хангах, эрсдэлд учирсан хүүхдэд туслах юм.