Category: нийгэм

Аймгийн
удирдлагуудтай сар бүр хийдэг цахим хурал өнөөдөр боллоо. Өнгөрсөн долоо хоногт
болсон Засгийн газрын хуралдаанаар Дорнод аймгийн Дашбалбар, Төв аймгийн
Жаргалант, Архангайн Эрдэнэмандал, Ховдын Үенч сумыг улсын тэргүүний сумдаар
шалгаруулсан гэж Монгол Улсын сайд, Засгийн газрын Хэрэг эрхлэх газрын дарга
Ч.Сайханбилэг хэллээ.

Дорноговь
аймгийн Сайншанд, Замын-Үүд сумын дэд бүтцийн барилгын ажлын хэрэгжилт сайн
байна. Энэ төсөл хэрэгжсэнээр тус аймгийн 60 мянган хүн амын 50 хувь нь оршин
суудаг энэ хоёр сумын цэвэр, бохир ус, дулааны шугам сүлжээ бүрэн шинэчлэгдэж,
иргэдийн ая тухай амьдрах боломж бүрдэнэ. Тус аймаг архи үйлдвэрлэдэггүй аймаг
болсноо зарласан.

Орхон аймагт
“Өлзий хутгийн наран” ХХК асфальт, бетоны үйлдвэр байгуулж, үйл ажиллагаагаа
эхлүүллээ.

Өвөрхангайд
бетон зуурмагийн  “Зул баян ундрах”
үйлдвэр байгуулагдаж, 20 гаруй хүн ажилтай боллоо. Энэчлэн өнгөрсөн сард
аймгуудад зохион байгуулсан сайн ажил олон байна гэж Засгийн газрын ХЭГ-ын
дарга Ч.Сайханбилэг онцоллоо.

Энэ онд 6
аймгийн төвийг Улаанбаатар хоттой хатуу хучилттай автозамаар холбоно, 9 аймагт
дулааны станц барина. Мөн аймгуудад 1000 айлын орон сууц барих ажлыг эхлүүлсэн
зэрэг аймаг бүрийг хот болгох Засгийн газрын зорилтын хүрээнд олон ажил
хийгдэнэ. Эдгээр бүтээн байгуулалтын ажилд 
аймгийн удирдлагууд онцгой анхаарал хандуулж, хяналт тавьж, ажлын явцын
талаар тогтмол мэдээлж байхыг үүрэг болголоо.

11 аймгийн төвд иж бүрэн Оношилгооны төв байгуулсан. Энэ
төвийн үйл ажиллагааг жигдрүүлэх, эмч мэргэжилтнийг сургаж, чадавхижуулах,
иргэдэд хүрэх эрүүл мэндийн үйлчилгээг чанартай, хүртээмжтэй байлгахад анхаарч
ажиллах ёстой гэж тэрээр хэллээ.

Хуралд оролцсон Барилга, хот байгуулалтын сайд
Ц.Баярсайхан,

-Өнгөрсөн онд улсын хэмжээнд гурван суманд “Шинэ сум”
төсөл хэрэгжсэн, энэ онд 16 суманд Засгийн газрын энэ төсөл хэрэгжинэ, мөн НҮБ,
Азийн хөгжлийн банкнаас 12 суманд шинэчлэлийн хөтөлбөр хэрэгжүүлнэ. Эдгээр
сумдын хөгжлийн ерөнхий төлөвлөгөө гарсан гэлээ. Мөн тэрээр “Аймгийн төвүүдэд
1000 айлын орон сууц барих  ажил эхэлсэн.
Энэ хүрээнд аймгийн төвд баригдсан орон сууц болон амины орон сууц худалдаж
авсан иргэдийг 8 хувь, үүнээс бага хүүтэй зээлд хамруулахаар судалгаа ид
хийгдэж байна” гэлээ.

Хурлын төгсгөлд Сангийн яам, Барилга, хот байгуулалт,
Эдийн засгийн хөгжил, Уул уурхай, Боловсрол шинжлэх ухаан, Эрүүл мэнд зэрэг
яам, агентлагийн  удирдлагууд аймгийн
Засаг дарга нарын асуултад хариуллаа гэж Засгийн газрын Хэвлэл мэдээлэл, олон
нийттэй харилцах албанаас мэдээллээ.

Henna Heals /Хенна Хийлс/ хэмээх
байгууллагынхан хорт хавдраар өвчлөн зовж буй хүмүүст зориулан шинэлэг санааг
сэдээг, хэрэгжүүлж байна. Ийм өвчтэй хүмүүст хийдэг химийн эмчилгээний
нөлөөгөөр үс нь гуужиж унадаг бөгөөд өвчтөнүүдийн сэтгэл санаанд хүндээр
тусдаг. Тэгвэл дээрхи шинэ санаа нь эл асуудлыг бүр мөсөн шийдэж, нэг ёсны шинэ
“моод” дэлгэрүүлж буй юм.  Хенна
Хийлсийнхний сэдсэн энэ санаа бол үс нь унаж, халцарсан өвчтнүүдийн толгойд
тусгай хена будаг ашиглан гоёлын шивээс хийх юм. Хена будаг нь нэг удаа түрхсэн
байхад удаан хугацаанд арилдаггүй ч энгийн шивээс шиг арьсанд гүн
суудаггүйгээрээ давуу талтай. Хена шивээс нь 2-3 сарын хугацаанд арилдаггүй ч
хиймэл шивээс шиг ганц угаалтаар л арилгах боломжтой.

Хенна
Хийлсийнхний тайлбарлаж буйгаар уг будгийг 100 хувь байгалийн гаралтай
бүтээгдэхүүнээр найруулан хийдэг тул ямар нэгэн харш нөлөөгүй гэнэ. Өвчтөн
Хенна Хийлсийн мэргэжлийн шивээсчинд захиалга өгч өөрийн хүссэн загварын
шивээсийг хийлгэх боломжтой юм. Өвчтнүүд гэсэн эл үйлчилгээнд сэтгэл хангалуун байгаа
бөгөөд шинэ “моод”-доо “Хена титэм” хэмээх нэр өгөөд амжжээ. 

Хан-Уул
дүүргийн нутаг дэвсгэр, Биокомбинатад өнгөрсөн шөнө онц ноцтой гэмт хэрэг гарчээ. Тодруулбал,
“Цэцэрлэгжилт” компанийн хэсэг ажилтнууд архидаж байгаад хоорондоо муудалцан
нэгнийхээ аминд хүрсэн байна. Хэргийг Дорнод аймгийн харьяат Б гэгч 25 настай
залуу үйлдсэн бөгөөд тухайн үед дадлага хийж байсан 16-17 насны арваад оюутанг барьцаалжээ. Энэ хэргийн талаар мэдээлэл цагдаагийн байгууллагад ирсэн даруйд газар дээр нь очиж шалгахад хутга, хүйтэн мэсээр зэвсэглэсэн этгээд 10 оюутанг барьцаалсан байсан аж. Хэргийн газар нэг хүн амаи алдсан байдалтай бол
бас нэг хүн зодуулсан байдалтай хүнд шархтсан байсан аж. Цагдаагийн ажилтнууд барьцаалагч этгээдтэй ярилцаж,
ойлголцсоны дүнд оюутнуудыг сулласан байна. Харин гэмт этгээдийг баривчилжээ. Хэргийг дүүргийн Цагдаагийн II хэлтэст шалгаж байгаа юм байна.

Д.Сүрэн

Хүний эрхийн үндэсний
комис гурван иргэнийг төлөөлөн Хөвсгөл, Хэнтий аймгийн сум дундын, нийслэлийн
Баянгол дүүргийн шүүхэд нэхэмжлэл гаргажээ. Эдгээр иргэн эрүүгийн хэрэгт хууль
бусаар шалгагдсаны улмаас хохирсон байна. Иймээс иргэдэд учирсан хохирол болон
илүү хугацаагаар ял эдэлсэн хохиролд нийтдээ 358 сая орчим төгрөгийг
нэхэмжилжээ. Шүүх уг нэхэмжлэлийг хэлэлцээд, Засгийн газрын тусгай сангийн
тухай хуульд заасны дагуу Засгийн газрын нөөц сангаас 111 гаруй сая төгрөгийг
гаргаж хохирогчдод олгуулжээ.

АНУ-ын иргэн Жон Мартин Кийнийг
хөнөөсөн хэрэгт буруутгагдан хоёр шатны шүүхээс 23 жилийн ял сонсоод буй 25
настай Ч.Баттуулын хэргийг Улсын дээд шүүх өнгөрсөн долоо хоногт хэлэлцэхээр
товлоод байсан юм.

Гэвч Ч.Баттуулын өмгөөлөгч К.Бауржин
гадаадад томилолттой яваа гэх шалтгаанаар хойшлуулах хүсэлт гаргасан учир
өнөөдрийг болтол хойшлоод байсан юм. Тэгвэл шүүх хуралдаан өнөөдөр болж дөнгөж
сая өндөрлөлөө. Ингээд шүүхийн шийдвэр өмнөх шигээ гарч Ч.Баттуулын ялыг хэвээр
үлдээжээ.

 

 

МИАТ АНУ-ын “Боинг” компаниас
“Б737-800” маркийн шинэ онгоцыг түрээсээр авахаар болжээ. Энэхүү онгоцыг ирэх ням гаригт эх орондоо авчрах гэнэ. Одоогоос 11
жилийн өмнө МИАТ компани
“Боинг 737-800” онгоцыг түрээслэн авч нислэгтээ ашигласан түүхтэй аж. Мөн 2008
оны наймдугаар сард МИАТ компани хоёр дахь “Боинг 737-800” онгоцоо “CIT
Aerospace”-aac түрээсээр авсан байдаг. 2009 оны зургадугаар сараас МИАТ компани
орон нутгийн чиглэлд буюу Мөрөн, Ховд руу “Боинг 737-800” онгоцыг ашиглан
нислэг үйлдэж эхэлсэн юм. Манай иргэний агаарын тээврийн үйлчилгээнд явж буй
“Боинг 737-800” онгоц нь бизнес ангилал 12 суудалтай, энгийн ангилал нь 161
суудалтай ажээ. 

МИАТ компани одоогоор “Боинг 737-800”, “Боинг
767-300” гэсэн онгоцоор Улаанбаатараас Бээжин, Хонгконг, Сөүл, Токио, Москва,
Берлин хотуудад тогтмол нислэг, Сингапур, Хайнан, Чежу, Япон улсын Нагоя,
Ояаката, Фүкүока зэрэг олон хотуудад захиалгат нислэг хийж буй. Тус компани ирэх
2015 онд “Боинг 767-300”, “Боинг 737-800” онгоц худалдан авах гэрээ байгуулаад
байгаа юм.

 “Боинг 737-800” онгоцны
үндсэн үзүүлэлт:

Урт (м) 39.5

Онгоцны далавчны дэлгэц (м) 34.3

Өндөр (м) 12.5

Нисэх жин (кг) 78240-79000

Буултын жин (кг) 63320

Хоосон жин (кг) 41140

Түлшгүй жин (кг) 61 690

Даац  (кг) 20 540

Түлшний сав (л) 26020

Нислэгийн мэдээлэл:

Ачаа бүхий нислэгийн үргэлжлэл (км) 5 400

Чиг шулуун нислэгийн хурд (км/ч) 850

Хөдөлгүүр CFMI CFM56-7B24/26, 2 x 10980-11930 кгс

Зорчигчийн салон

Суудлын тоо – 189

Суудлын тоо (бизнес/эдийн засаг)  160

Салоны өргөн (м) 3.54

 

Хувьсгалчдын
гудамж буюу Тасганы овооны уулзвараас, МҮОНТВ хүртлэх 2,52 км  замыг 2007 онд өргөтгөн шинэчилж нийт 14 метр
өргөнтэй, 4 урсгалтай болгосон байна. 
Замын ажлын гүйцэтгэгчээр “ Мон Агаар” ХХК шалгарч 2007 оны 12 сард
ашиглалтад өгчээ.  Энэхүү зам нь
гэрэлтүүлэг, 2 талаараа 2,25 см өргөнтэй явган зорчигчийн замтай байхаар
төлөвлөгдсөн боловч газар чөлөөлөлтийн ажлыг бүрэн хийж чадаагүйгээс зарим
хэсэгт явган зорчигчийн замыг дутуу орхин Улсын комисст хүлээлгэн өгсөн байна.

Энэ хэсгийн
замын зурваст нийтдээ 67 айлын хашаа, үл хөдлөх хөрөнгө байснаас 50 гаруйг нь
чөлөөлжээ.

Замын баруун
хэсэгт 8 айл газраа чөлөөлөөгөөгүйгээс 
явган зорчигчийн зам хийгээгүй бол, замын зүүн хэсгээр 4-5 айл газраа
чөлөөлөөгүйгээс явган хүний замыг гүйцээлгүй ашиглалтад өгчээ. Одоогоор тухайн
хэсгээр зорчиж байгаа иргэд автозамаар явж байгаа нь замын хөдөлгөөний осол
гэмтэлд өртөх эрсдэлтэй байгааг Замын цагдаагийн газраас сануулсаар байгаа юм.

Тиймээс
“Улаанбаатар хотын замын хөдөлгөөний хэт ачааллаас урьдчилан сэргийлэх ажлыг
зохион байгуулах, нэгдсэн удирдлагаар хангах ажлын хэсэг”-ээс тухайн хэсэгт
долоо хоногийн хугацаанд явган хүний зам тавихыг холбогдох албаныханд үүрэг
болголоо. Нийслэлийн Өмчийн харилцааны газраас эдгээр айлуудын хашааг 2 метр
татуулж, “Мон-Агаар” компани нэмэлт хөрөнгө авахгүйгээр явган зорчигчийн замыг
тавих юм гэж Нийслэлийн Хэвлэл мэдээлэл, олон нийттэй харилцах хэлтсээс
мэдээллээ.

 

Баянгол дүүргийн дөрөвдүгээр хорооны
нутаг дэвсгэрт Шүүхийн гудамжны 1 км авто замын шинэчлэлтийн ажлыг “Монгол Сата
интернэшнл” ХХК гүйцэтгэж байна. Уг ажлын хүрээнд П. Жасрайн гудамж буюу Төмөр
замын эмнэлгийн уулзварыг энэ сарын 10-ны 08:00 цагаас эхлэн хааж, зам сэтлэх
бөгөөд борооны ус зайлуулах шугамын холболтыг хийж тавдугаар сарын 12-ны 08:00
цагт нээхээр боллоо гэж Нийслэлийн Автозамын газраас мэдээллээ.

 

Монгол Улсаас АНУ-д суугаа ЭСЯ,  АНУ дахь Монголын соёлын төвөөс хамтран
зохиодог Монгол судлалын олон улсын 8 дугаар бага хурал энэ сарын 2-4-нд
Вашингтон хотноо амжилттай болж өндөрлөлөө. Энэ удаагийн хуралд Монгол Улс,
АНУ, ОХУ, БНСУ-ын 20 шахам эрдэмтэн, судлаачид уригдан оролцож, Монголын түүх,
уран зохиол, өнөөгийн Монголын нийгэм дэх тулгамдсан асуудлууд, боловсрол гэсэн
4 салбар хуралдаанд илтгэл тавьж, мэдээлэл хийв.

Элчин сайд Б.Алтангэрэл бага хурлыг нээж хэлсэн үгэндээ,
Монгол Улсын Засгийн газраас гадаад дахь монгол судлалыг хөгжүүлэхэд өндөр ач
холбогдол өгч байгааг тэмдэглэж, үүнд шинээр байгуулагдсан “Монгол судлалыг
дэмжих сан” дорвитой дэмжлэг үзүүлнэ гэж итгэж байгаагаа илэрхийлэв. Тэрбээр
Монгол судлалын бага хуралд оролцож буй эрдмийн цол зэрэгтэй хүмүүс олон болж,
тавьж буй илтгэлийн чанар сайжирч байгааг олзуурхан тэмдэглэж, цаашид олон
улсын Монгол судлалд хувь нэмрээ оруулахуйц арга хэмжээ болгон хөгжүүлэхийн
төлөө ажиллахын чухлыг тэмдэглэв.

Өмнөх жилүүдийн Монгол судлалын бага хурал манай улсын
түүх археологи, утга зохиол, хэл шинжлэлийн асуудлаар зохиогддог байсан бол энэ
удаа Монгол Улсын нийгэм, эдийн засгийн өөрчлөлтүүд, тэдгээрийн нийгэмд үзүүлэх
нөлөө, ололт амжилт, алдааг үнэлж цэгнэх, шинжлэн дүгнэх зэргээр шинэ
сэдвүүдийг хөндөж ярилцав.

Бага хурлын нэг салбар хуралдааныг нэрт эрдэмтэн Хангины
Гомбожавын дурсгалд зориулсан бөгөөд түүний амьдрал, уран бүтээлийн талаар
Монгол-Америкийн соёлын нийгэмлэгийн тэргүүн Санжийн Алтан илтгэл тавьж,
Х.Гомбожавийн шавь, Монголч эрдэмтэн А.Кэмпи, яруу найрагч Ч.Дагвадорж нарын
хүмүүс дурсамжаасаа хуваалцлаа. Х.Гомбожав бол АНУ-д монгол судлалын үндсийг
тавьж бэхжүүлсэн, Монгол Улсыг НҮБ-д элсэх, Монгол-АНУ-ын хооронд дипломат
харилцаа тогтоох зэрэг түүхэн үйл явдалд гар бие оролцсон гавьяатай нэгэн билээ.

Хурал зохион байгуулагчдын зүгээс төлөөлөгчдийг АНУ-ын
Конгрессын номын санд зочлуулж, Монголын судар бичгийн өв соёлтой танилцуулав.
Мөн Монголын соёлын төвийн тэргүүн М.Саруул-Эрдэнэ  өөрийн цуглуулгаасаа 1920-иод оны Монголын
хууль цаазын эх бичвэрүүдийг эх хувиар нь дэлгэн үзүүлж сонирхууллаа. АНУ дахь
Монгол Улсын ЭСЯ дээр зохион байгуулагдсан энэ удаагийн бага хуралд нийт 50
гаруй төлөөлөгч оролцов.

Улаанбаатар хотод бүртгэлтэй бүх
төрлийн автотээврийн болон өөрөө явагч хэрэгслээс албан татвар, агаарын
бохирдлын төлбөр, автозам ашигласны төлбөр хураах ажил өнгөрсөн гуравдугаар сарын 20-нд эхэлсэн. Тэгвэл уг ажил энэ сарын 31-нд дуусах юм.
Нийслэлийн хэмжээнд үзлэгт татварт хамрагдвал зохих 430.223 тээврийн хэрэгсэл, механизм байгаагаас өнөөдрийн байдлаар
үзлэгт 44.708 тээврийн хэрэгсэл хамрагджээ. Тээврийн
хэрэгслийн албан татвар, агаарын бохирдлын төлбөр хураах ажлыг  иргэдэд
аль болох хүндрэл учруулахгүйгээр дүүргүүдийн татварын албаны нэг цэгийн
үйлчилгээгээр дамжуулан зохион байгуулж байгаа юм.  Дүүргийн оношилгооны
төв болон татвар хураах нэг цэгийн үйлчилгээ ажлын өдрүүдэд уртасгасан цагаар
ажилалж байгаа бөгөөд амралтын өдрүүдэд 09:00-19:00 цагийн хооронд ажиллаж
байна. 

 

Дүүргийн
татварын хэлтсүүд:
 Ажлын өдрүүдэд 08.00-12.00, 13.00-17.00
БЗ, БГ, СХД-ийн Оношлогооны төвүүд:
 Ажлын өдрүүдэд  08.00-20.00
Амралтын өдрүүдэд  09.00-19.00

Д/д	Дүүргүүд	Байршил	Хугацаа
1	ЗТЯ-ны бүртгэл хяналтын газар	Баянзүрх дүүргийн авто вокзалын ард Таван ган трейд ХХК-ийн байранд	2014.03.20-05.31
2	БГД-ийн хяналтын үзлэг оношлогооны байр	БГД-ийн 20 дугаар хороо Хөсөг трейд ХХК-ийн хашаанд	2014.03.20-05.31
3	БЗД-ийн хяналтын үзлэг оношлогооны байр	БЗД-ийн 8 дугаар хороо Чулуун овоо Авто вокзалийн байранд	2014.03.20-05.31
4	СХД-ийн хяналтын үзлэг оношлогооны байр	СХД-ийн 20 дугаар хороо Автобус-2 ХК-ий хойд талд	2014.03.20-05.31
5	Хан-Уул дүүргийн татварын хэлтэс	ХУД-ийн 3-р хороо ЗДТГ-ын хажууд Татварын хэлтсийн байр	2014.03.20-05.31
6	Баянгол дүүргийн татварын хэлтэс	БГД-ийн  1-р дүгээр хороо, Татварын хэлтсийн байр /Хуучнаар хотын гаалийн байр/	2014.03.20-05.31
7	Баянзүрх дүүргийн татварын хэлтэс	БЗД-ийн 26 дугаар хороо, Дүнжингарав худалдааны төвийн байранд	2014.03.20-05.31
8	Сонгинохайрхан  дүүргийн татварын хэлтэс	СХД-ийн 18 дүгээр хороо Геологийн төв лабораторийн ард Татварын хэлтсийн  байранд	2014.03.20-05.31
9	Чингэлтэй дүүргийн татварын хэлтэс	ЧД-ийн 4 дүгээр хороо Ж.Самбуугийн гудамж ЗДТГ-ын байр “Нэг цонхны үйлчилгээний танхим”	2014.03.20-05.31
10	Сүхбаатар дүүргийн татварын хэлтэс	ЧД-ийн 4-р хороо, Сангийн Яамны баруун талд Тод таур цамхагийн байранд	2014.03.20-05.31
11	цирк Зтя-ны хяналт бүртгэлийн газар	СБД-н   циркийн баруун талд	2014,03,24-2014.12.31
12	Налайх дүүргийн татварын хэлтэс	Налайх дүүргийн Татварын хэлтсийн нэг цэгийн үйлчилгээний байранд	2014.03.20-05.31
13	Багануур дүүргийн татварын хэлтэс	Багануур дүүргийн Татварын хэлтсийн нэг цэгийн үйлчилгээний байранд	2014.03.20-05.31
14	Багахангай дүүргийн татварын хэлтэс	Багахангай дүүргийн Засаг даргын Тамгын газрын байранд	2014.03.20-05.31