Дэлхий нийтийн нэг хүнд оногдох спиртний хэрэглээг графикаар харуулжээ. Архин далайд сэлүүр үгүй завин дээр байгаа мэтээр яригддаг монголчуудын спиртний хэрэглээ дэлхийн хэмжээнд хүн амд ногдох хувийг сонирхвол харьцангуй бага юм. Бүр сураггүй гээд хэлчихэж болохоор байгааг зургаас харна уу. Африкийн ихэнх орнууд нэмэх нь Хятад, Монголын иргэд тийм ч их спирт хэрэглэдэггүй ажээ.
МИАТ-ийн захирал асан Ч.Хоролсүрэнд Цагдаагийн Ерөнхий газрын Зохион байгуулалттай гэмт хэрэгтэй тэмцэх газрын Эдийн засгийн гэмт хэрэг мөрдөх хэлтсээс дахин эрүү үүсгэн шалгаж эхэлсэн байна.
Түүнийг бусадтай бүлэглэн 2008 оны 08 дугаар сарын 06-ны өдөр электрон тийзийн дэмжлэг төлбөр гэх нэрээр МИАТ ТӨХК-иас 297,000 ам.долларыг Хонг Конгийн нэр бүхий компанийн данс руу удаа дараа шилжүүлж улмаар буцаан авч ашигладаг байсан хэрэгт Эрүүгийн хуулийн тусгай ангийн 150 дугаар зүйлийн 150.3 дахь хэсэгт зааснаар эрүүгийн хэрэг үүсгэн шалгаж байна.
Багануур дүүргийн гуравдугаар хорооны Нарангийн гудамжинд нэгэн айл үерт автсан талаарх мэдээлэл өчигдөр 19.50 цагийн орчимд Онцгой байдлын газарт иржээ. Дуудлагын дагуу Багануур дүүргийн Онцгой байдлын хэлтсээс найман алба хаагч очин эксковатороор үерийн шуудууг сэргээн усыг зайлуулж, гэрийг үерийн уснаас гаргажээ. Түүнчлэн төвийн дүүргүүдэд ч ихээхэн хэмжээний ус тогтож зам талбайгаар иргэд явган бүү хэл машинтай зорчиход хүндрэл үүсээд байсныг шийджээ. Ийн Нийтийн үйлчилгээний “Улаанбаатар нэгтгэл” ОНӨААТҮГ-аас бохир ус соруулах таван машин, хоёр насос, 25 хүний бүрэлдэхүүнтэй бригад ажиллаж Олимпийн гудамж, Гандийн гудамж, Их Монгол улсын гудамж, Нэгдүгээр хорооллын арын замуудад тогтсон 700 м3 усыг соруулжээ. Мөн тавдугаар сарын 09-ний өдрөөс 05 сарын 10-нд шилжих шөнө гурван усны машин, 10 хүний бүрэлдэхүүнтэйгээр Олимпийн гудамж, Нэгдүгээр хорооллын арын зам, Таван шарын байрын дундах замуудад тогтсон усыг шавхаж соруулсан байна.
Үндэсний их баяр наадмыг зохион байгуулах хорооны өргөтгөсөн хуралдаан Шадар сайд Д.Тэрбишдагвын өрөөнд боллоо. Уг хуралдаанаар наадмыг зохион байгуулах төлөвлөгөө, бэлтгэл ажлын талаар салбар хороодын дарга нарын мэдээллийг сонсч, зохион байгуулалтын ажилтай холбоотой асуудлаар санал солилцлоо.
Хүй 7 худагт хийгдэж байгаа бүтээн байгуулалтын ажлын явц болон Их эзэн Чингис хааны талбайд 7 дугаар сарын 11-ны орой “Улаанбаатарын үдэш” 3D шоу зохион байгуулах талаар мэдээлэл сонсч, Баяр наадмын зохион байгуулах хороонд иргэд, олон нийтээс ирсэн албан бичгүүдтэй танилцлаа. Салбар хороодод шаардлагатай бол бүрэлдэхүүнээ шинэчлэх, наадам зохион байгуулах төсвөө гаргаж, бэлтгэл ажлыг ханган ажиллахыг Үндэсний их баяр наадмыг зохион байгуулах хорооны дарга, Шадар сайд Д.Тэрбишдагва үүрэг болголоо.
Үндэсний их баяр наадмын зохион байгуулах хороо нь:
•Үндэсний бөхийн салбар хороо
•Хурдан морины салбар хороо
•Үндэсний сурын салбар хороо
•Тохижилт, засвар, худалдаа үйлчилгээний салбар хороо
•Төрийн ёслол, үйлчилгээний салбар хороо
•Хэв журмын салбар хороо
•Урлаг, соёлын салбар хороо
•Хэвлэл мэдээлэл, сурталчилгааны салбар хороо
•Шагайн холбооны зэрэг салбар хороодоос бүрддэг юм гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
Он гарсаар 26488 эх амаржиж, амьд төрсөн хүүхдийн тоо 26669 болжээ. Энэ нь өмнөх оны мөн үеэс амаржсан эхийн тоо 929 буюу 3.6 хувиар, хүүхдийн тоо 984 буюу 3.8 хувиар өссөн байна.
Өнгөрсөн дөрөвдүгээр сард 6744 хүүхэд амьд төрсөн нь өмнөх оны мөн үеэс 11 хүүхэд буюу 0.2 хувиар өсчээ. Харин улсын хэмжээгээр өмнөх оны мөн үеэс амаржсан эхийн тоо 929 буюу 3.6 хувиар, хүүхдийн тоо 984 буюу 3.8 хувиар өссөн байна. Нялхсын эндэгдэл эхний дөрвөн сарын байдлаар 112 болсон нь өмнөх оноос 24 хүүхдээр нэмэгджээ. Харин 5 хүртэлх насны хүүхдийн эндэгдэл 124 болж, өмнөх оны мөн үеэс 7 хүүхдээр нэмэгдсэн байна.
1000 амьд төрөлтөд ногдох нялхсын эндэгдэл оны эхний 4 сард 16, тав хүртэлх насны хүүхдийн эндэгдэл 19 болж, өмнөх оны мөн үетэй ижил түвшинд байна хэмээн Үндэсний статистикийн хорооноос мэдээллээ.
Өмнөговь аймаг дахь Шивээхүрэнгийн шалган нэвтрүүлэх боомтоор тавдугаар сарын 9-нд иргэн Г, Г нар хууль бусаар алт гаргахыг завдаад баригджээ. Тэд БНХАУ-руу хил нэвтрэхээр унаж явсан “Ланд Круйзер-100” маркийн автомашиныхаа жолоочийн суудал дор их хэмжээний алт нуусан байсныг хилчид илрүүлсэн юм байна.
Хэргийг харьяаллын дагуу Өмнөговь аймаг дахь Хилийн 0166 дугаар ангийн Хилийн тагнуулын тасагт шалгаж, аймгийн Прокурорын газарт шилжүүлэн өгчээ.
Онцлоход, дээрх хууль бус хэрэг гарах гэж байгаа талаарх мэдээлэл урьдчилан аймгийн Хилийн тагнуулын газарт ирсэн юм байна.
Сэлэнгэ аймгийн Сайхан сумын Номгон тосгоны гуравдугаар багийн нутаг Орхон голын Хар-Усан тохой гэдэг газар Дархан-Уул аймгийн харъяат иргэн М нь /34 настай, эрэгтэй/ усанд осолджээ. Мэдээллийг авсан даруйдаа тус аймгийн Онцгой байдлын газрын албан хаагч, нэг автомашин, хоёр завь, Аврах тусгай ангийн найман албан хаагчид эрэн хайх ажиллагааг зохион байгуулан ажиллаж байгаа аж. Үйл явдал арав орчим хоногийн өмнө болсон бөгөөд эрэн хайх ажиллагааг өнөө ч үргэлжлүүлж байгаа аж. Тиймээс иргэдийг орон нутагт зорчихдоо, тухайн бүс нутгийн иргэдийг гол гатлахдаа сонор сэрэмжтэй байхыг анхааруулж байна.
Нойтон цас, хүчтэй салхины уршгийн албан мэдээ хараахан гараагүй байгаа ч орон нутгийн эх сурвалжууд мэдээлэл ирүүлээд байна. Сүүлийн хоногт үргэлжилсэн цасан шуурганаар төл мал тэр дундаа унага бээрч, осгох тохиолдол их байжээ. Энэ нь ихэвчлэн хангайн аймгуудад тохиолдож буй бөгөөд говийн аймгуудаар ихэнх хугацаанд хүйтэн хавсрага салхитай байсан байна. Ер нь хур тунадас ихээр орж байгаа нь төл малд ихээхэн харш байгаа аж.
Өнгөрсөн хоногт Улаанбаатар хот болон Архангай, Булган, Өвөрхангай, Дархан-Уул, Сэлэнгэ, Орхон, Төв зэрэг долоон аймгийн нутгаар хур тунадас орсон. Бусад нутгаар цаг агаар тогтуун хоножээ. Харин өнөөдөрНутгийн баруун болон зүүн хэсгээр үүлэрхэг. Алтайн уулархаг нутаг болон зүүн зүгийн нутгийн зарим газраар хур тунадас, нойтон цас орно. Бусад нутгаар багавтар үүлтэй. Хур тунадас орохгүй. Салхи баруун хойноос секундэд 5-10 метр, нутгийн зүүн хэсгээр түр зуур секундэд 16-18 метр хүрч цасан болон шороон шуурга шуурна. Хангай, Хөвсгөл, Хэнтийн уулархаг нутгаар 0-5 градус, Их нууруудын хотгор болон говийн нутгийн өмнөд хэсэг, Дорнод Монголын тал нутгаар 10-15 градус, бусад нутгаар 5-10 градус дулаан байх юм байна.
Ихэнх нутгаар сэрүүсч, цасан болон шороон шуурга шуурах тул иргэд, малчид шуурганд төөрөх, малтайгаа уруудах, осгох эрсдэлээс урьдчилан сэргийлэх, бага насны хүүхдийг малд явуулахгүй байх, зам давааны нөхцөл байдлыг үнэлэх, салхи шуургатай үед замд гарахгүй байх, автозамын зорчих хэсэгт халтиргаа, гулгаа үүссэн үед замын хөдөлгөөнд оролцохгүй байхыг Онцгой байдлын ерөнхий газраас анхааруулаад байна.
Зайлшгүй тохиолдолд замд гарах тохиолдолд дулаан хувцаслах, шатахууны нөөцтэй явах, техникийн бүрэн бүтэн байдлыг ханган зорчихыг анхааруулж байна.
Шүүхийн Ерөнхий зөвлөлийн даргын тушаалаар Давж заалдах шатны шүүхийн шүүгч, анхан болон давж заалдах шатны шүүхийн Ерөнхий шүүгчийн сул орон тоонд сонгон шалгаруулалт зарласан билээ. Шалгаруулалтад тэнцсэн шүүгчид өчигдөр тангараг өргөлөө.
Шалгаруулалтад 400 гаруй хуульч өрсөлдсөнөөс 91 шүүгч тэнцсэн аж. Тодруулбал, давж заалдах шатны шүүхийн 10 шүүгч, анхан болон давж заалдахын шатны 61 шүүгч, шинээр томилогдсон Нийслэл болон Төв аймагт байрлах анхан болон давж заалдах шатны шүүхийн 20 шүүгч тангараг өргөсөн юм.
Шүүгчийн сонгон шалгаруулалтыг энэ жил шинэ журмаар зохион байгуулсан. Өмнө нь зөвхөн мэдлэг чадварын цөөн тооны шалгууртай байсан бол энэ жил эрхзүйн, ёсзүйн, зан төлөвийн тохиолдол шийдвэрлэх, мэргэшлийн чиглэлээр сэдэв сонгож эссэ бичих, мэдээллийн технологийн хэрэглээний ур чадвар шалгах, удирдан зохион байгуулах авьяас, манлайлах ур чадварын зэргээр нэмэлт үзүүлэлтээр шалгалт авсан аж.
Замын уулзвар дээр хөдөлгөөн зохицуулж байсан цагдаагийн алба хаагчийг дайрчээ. Тодруулбал, Баянзүрх дүүргийн 14 дүгээр хорооны нутаг дэвсгэр Халдварт өвчин судлалын үндэсний төвийн зүүн талын уулзар дээр өчигдөр 17.30 цагийн орчимд хөдөлгөөн зохицуулж байсан цагдааг дайрсан хэрэг гарсан байна. Энэ талаар Замын цагдаагийн газрын Олон нийттэй харилцах хэлтээс тодруулахад “Баянзүрх дүүргийн цагдаагийн хэлтсийн цагдаа ажлаа хийж байхад дайрч, гэмтээсэн тухай дуудлагыг дөнгөж сая авлаа. Хэргийн газарт цагдаагийн бүрэлдэхүүн ажиллаж байна. Ослын шалтгааныг тогтоогоогүй учраас үүнээс илүү мэдээлэл өгөх боломжгүй” гэсэн юм.
Ц.Өрнөх