Category: нийгэм

Газрын тосны газрын экс дарга Д.Амарсайхан өчигдөр 17 цагийн орчимд хорих 461 дүгээр ангийн уулзалтын өрөөнд амьсгал хураасан. Д.Амарсайханы биеийн байдал муу байсан учир түүний ар гэр болон, өмгөөлөгчид нь батлан даалтад гаргахаар олон удаагийн хүсэлтийг гаргасан ч  хууль хяналтын байгууллага хүлээж авахгүй байсан талаар түүний өмгөөлөгчид хэлж буй. Тэгвэл дөнгөж сая ШШГЕГ-аас энэ хэргийн талаар мэдээлэл хийлээ. ШШГЕГ-аас хийсэн тайлбарт “Талийгаач Д.Амарсайхан нь өмнө нь нойр булчирхайн үрэвсэлтэй хэмээн оношлогдон эмчлүүлж байсан ч хэвтэрт орохоор хүнд байгаагүй. Мөн дөрөвдүгээр сарын 15-наас хойш саатуулагдан хоригдож байсан. Энэ хугацаанд найман удаа эмчийн үзлэгт орсон. Эмчийн үзлэгээр биеийн байдал хэвийн гарсан байна. Түүнчлэн нас бардаг өдрийнхөө өглөөхөн биеийн байдал нь хэвийн байсан. Хүмүүсийн яриад байгаа шиг “Дээрээс эмчилгээ хийлгэж болохгүй” гэсэн тушаал өгөөгүй”  хэмээлээ.

Одоогоор талийгаачийн биед задлан хийж байгаа бөгөөд нас барсан шалтгааныг албан ёсоор зарлах боломжгүй гэж мэдээллээ.   

Нийслэлийн Засаг дарга бөгөөд Улаанбаатар хотын Захирагч Э.Бат-Үүл өнөөдөр  МУИС-ийн Улаанбаатар сургуулийн үйл ажиллагаатай танилцлаа. Тус сургууль нь 1992 онд технологийн сургууль нэртэйгээр байгуулагдаж 1995 онд Шинжлэх ухаан боловсролын сайд болон нийслэлийн Засаг даргын хамтарсан тушаал, захирамжаар Улаанбаатар хотын Их сургууль болон өргөжсөн байна. Харин 2010 оны Засгийн газрын тогтоолоор Улаанбаатарын их сургуулийг МУИС-ийн харьяанд нэгтгэжээ. Энэ нь нь тус сургуулийн үйл ажиллагааг доголдуулахад хүргэсэн төдийгүй МУИС-ийн Улаанбаатар сургууль хэмээн өөрчлөгджээ.

Мөн МУИС-ийн удирдах зөвлөлийн 2013 оны 12 дугаар сарын 16-ны өдрийн 04 болон 05 тоот тогтоолоор тус сургуулийг бүхэлд нь задлах, удирдлага, санхүүгийн хувьд шууд зогсоож, салбар нэгжүүдийг тараах шийдвэр гаргасан байна. Одоогоор тус сургууль нь Технологи, Нийгмийн ухаан, Хэл зохиолын үндсэн Факультет, мэргэжлийн 11 тэнхимтэй бөгөөд  150 гаруй багш, 50-иад ажилтан ажиллагсад, 2000 гаруй оюутан сурагчтай үйл ажиллагаа явуулдаг  бөгөөд сургуулиа улам өрөгжүүлэн, нийслэлийн нэрэмжит сургууль болох хүсэлтээ сургуулийн хамт олон хотын удирдлагуудад илэрхийлжээ. Тиймээс тэдний хүсэлтийн дагуу энэхүү сургуулийн бааз суурийг түшиглэн нийслэлийн өмчит Улаанбаатар их сургуулийг байгуулахаар судалж, нийслэлийн Засаг даргын захирамжаар ажлын хэсэг байгуулаад байгаа юм.

Өнөөдрийн уулзалтаар тус сургууль нь хотын нэрэмжит сургууль байхаас гадна, нийслэлд шаардлагатай байгаа мэргэжилтнүүдийг бэлтгэдэг, нийслэлээс хэрэгжүүлэх төсөл хөтөлбөрүүдийн туршилт,  судалгааг хийдэг байхаар  санал  солилцоо. Уулзалтын үеэр Улаанбаатар их сургуулийг нийслэлийн өмчит  Их сургууль болгох ажлыг зохих хууль, дүрмийн дагуу шийдвэрлэнэ гэдгээ хотын дарга мэдэгдлээ гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн Засаг дарга “Төгсөлтийн баярын үеэр авах зохион байгуулалтын арга хэмжээний тухай”  А/375 дугаар захирамж  гаргаж, нэгдсэн байдлаар зохицуулалт хийхээр боллоо.

 Захирамжаар нийслэлийн хэмжээнд их, дээд болон ерөнхий боловсролын сургуулийн төгсөлтийн баярыг тэмдэглэн өнгөрүүлэхтэй холбогдуулан Боловсрол соёл, шинжлэх ухааны сайдын 2007 оны “Төгсөлтийн арга хэмжээг зохион байгуулах   тухай” 232 дугаар тушаалыг хэрэгжүүлж, хяналт тавьж ажиллахыг нийслэлийн Боловсролын газар, дүүргийн  Засаг дарга нарт үүрэг болголоо.

 Оюутан, сурагчдыг архидан согтуурах, гэмт хэрэг, зөрчлөөс урьдчилан  сэргийлэх чиглэлээр үр дүнтэй ажлыг зохион байгуулж, машинт болон явган  эргүүлийн үйл ажиллагааг идэвхжүүлэхийг нийслэлийн Цагдаагийн газарт даалгалаа.

 Нийслэлийн хэмжээнд төгсөлтийн баярыг их, дээд сургуулиудад “Архигүй”, ерөнхий боловсролын сургуулиудад “Эрдмийн баяр” болгон тэмдэглэх ажлыг зохион байгуулахыг нийслэлийн Боловсролын газар, их, дээд сургууль болон коллеж, ерөнхий боловсролын сургуулийн захирлуудад үүрэг болгосон байна.

Мөн төгсөлтийн баярыг зохион байгуулах нэрийдлээр эцэг эхчүүдээс мөнгө хурааж авсан болон ерөнхий боловсролын сургуулийн сурагчдаас архидан согтуурч,  гэмт хэрэг, зөрчилд холбогдсон тохиолдолд сургуулийн захирал, удирдлагуудад хариуцлага тооцохыг нийслэлийн Боловсролын газарт үүрэг өглөө.

 Харин оюутан, сурагчдыг болзошгүй аюул, осол, гэмтлээс сэргийлэх чиглэлээр нийслэлийн Цагдаагийн газар, Онцгой байдлын газар, “Монголын Оюутны холбоо”, “Монголын  Сурагчдын холбоо”  зэрэг  байгууллагуудтай   хамтран зочид буудал болон  хотын ойролцоох ногоон бүсэд орших амралтын газар, жуулчны баазад шалгалт хийж, хяналт тавьж ажиллахыг нийслэлийн Мэргэжлийн хяналтын газар, нийслэлийн Аялал жуулчлалын газарт үүрэг болголоо.

 Их дээд сургуулийн оюутнуудын төгсөлтийн баярыг архи согтууруулах ундаагүйгээр зөв зохистой тэмдэглэн өнгөрүүлэх зорилгоор Монголын Оюутны  холбоотой хамтран нэгдсэн журмаар зохион байгуулж, хяналт тавьж ажиллахыг  Тамгын газрын Нийгмийн хөгжлийн бодлогын хэлтэс, арга  хэмжээний үеэр хэв журам сахиулж ажиллахыг нийслэлийн Цагдаагийн газар даалгасан байна.

Төгсөлтийн баярын үеэр “Үндэсний цэцэрлэгт хүрээлэн”-д төгсөгчдийн нэрэмжит мод суулгах газрыг тусгайлан гаргаж, ногоон төгөл, эко орчин  бүрдүүлэхийг “Үндэсний цэцэрлэгт хүрээлэн” Нийслэлийн өмчит үйлдвэрийн газрын захиргаа, их, дээд сургууль болон коллеж, ерөнхий боловсролын сургуулийн  захирлуудад үүрэгдлээ.

 Мөн энэ захирамжаар нийслэл хотод үйл ажиллагаа явуулж байгаа зочид буудал болон хотын ойролцоох ногоон бүсэд орших амралтын газар, жуулчны баазын удирдлагуудад  Гэмт хэргээс урьдчилан сэргийлэх тухай хуулийн 9 дүгээр зүйл, Архидан  согтуурахтай тэмцэх тухай хуулийн 7.2.2 дахь заалтыг хэрэгжүүлж ажиллахыг  анхаарууллаа гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

Өнөөдөр баруун зүгийн нутгаар хур тунадас орж, салхи шуургатай байна. Цаашид Монгол орны нийт нутгаар цасан болон шороон шуурга шуурах төлөвтэй байгаа учраас нийт малчид ард иргэд бага насны хүүхдийг малд явуулахгүй байхыг онцгойлон  анхааруулж байна. Хаврын улиралд байгалийн гэнэтийн үзэгдэл гарч цасан болон шороон шуурга шуурах үер хүн эндэж  мал хорогдох аюул өмнө нь гарч байсан тул малчид ард иргэд тогтмол цаг агаарын мэдээг сонсож малаа бэлчээрлүүлэх шаардлагатай байна. 

 2014 оны 5 дугаар сарын 15-наас 2014 оны 5 дугаар сарын 19-нийг хүртэлх

цаг агаарын урьдчилсан төлөвөөс хархад  15-нд баруун болон төвийн нутгаар,16-нд нутгийн хойд хэсгээр, 17-нд зарим газраар, 18-нд баруун зүгийн нутгийн хойд хэсэг, говийн нутгийн зарим газраар хур тунадас, нойтон цас орно. Салхи 15,16-нд говийн нутгаар секундэд 12-14 метр, 18-нд баруун зүгийн нутгаар секундэд түр зуур 16-18 метр хүрч шороон шуурга шуурна. Хангай, Хөвсгөлийн уулархаг нутгаар шөнөдөө 2-7 градус хүйтэн, өдөртөө 6-11 градус, говийн бүс нутгийн өмнөд хэсгээр шөнөдөө 5-10 градус, өдөртөө 20-25 градус дулаан, бусад нутгаар шөнөдөө 2 градус хүйтнээс 3 градус дулаан, өдөртөө 12-17 градус дулаан байна.

Эрүүл мэндийн яам өсвөр насны охидын жирэмслэлттэй холбоотойгоор мэдээлэл хийлээ. НҮБ-ын Хүн амын сангийн тайланд хөгжиж байгаа орнуудад жил бүр 7 саяас дээш тооны охид 18 нас хүрэхээсээ өмнө хүүхэд төрүүлж байгаа талаар дурджээ. Хүүхэд насандаа ээж болж байгаа энэхүү үзэгдэл нь өсвөр үеийнхний жирэмслэлтийн асуудлыг гэр бүл, хамт олон, төр засгийн үйл ажиллагаатай холбон үзэх цаг болсныг илтгэж байгаа.

Манай орны хувьд 1997 оны байдлаар 1000 амьд төрөлтийн 38 нь өсвөр насны ээж байсан бол 2000 он гэхэд энэ тоо 14 болтлоо буурч байжээ. Гэсэн ч 2006 оноос өсч 1000 амьд төрөлт тутмын 33 нь өсвөр насны ээж байна.

Энэ мэдээллийн дагуу Эрүүл мэндийн дэд сайд Ж.Амарсанаагаас өсвөр насны охидыг жирэмслэлтээс хэрхэн хамгаалах, яамнаас ямар бодлого барьж байгаа тухай тодрууллаа.

Ж.Амарсанаа: Хууль бусаар үр хөндөлт хийсэн эмчид захиргааны арга хэмжээ авна

  -Өсвөр насны охидын жирэмслэлт сүүлийн жилүүдэд байнга өсч байгааг мэдээллээ. Нэг хэсэг нь хүүхдээ төрүүлж байхад нөгөө хэсэг нь үр хөндөлтийг сонгодог. Яамнаас энэ чиглэлд ямар байдлаар анхаарч ажиллаж байгаа вэ?

-Бид анхаарч ажиллаж байгаа. Гэртээ үр хөндөлт хийхийг бид эсэргүүцдэг. Эмчийн хяналтгүй үр хөндөлт хийх нь хувь хүнд төдийгүй, эмнэлгийн салбарт ч маш их бэрхшээл авчирдаг. Энэ нь Монголын эрүүл мэндийн салбарт төдийгүй хүн амын бодлогод муугаар нөлөөлж байна.

  -Монгол улсын хэмжээнд хувийн эмнэлэг хичнээн байна. Ихэвчлэн хувийн эмнэлгээр үр хөндөлт хийлгэдэг шүү дээ? 

-Маш их шүү дээ. Нарийн тоог Нийслэлийн эрүүл мэндийн газраас авч болно.

  -Хууль зөрчин өсвөр насны охидод үр хөндөлт хийсэн тохиолдолд эмчид ямар хариуцлага тооцдог вэ?

-Хууль зөрчиж үр хөндөлт хийгээд, түүнээс шалтгаалж ямар нэгэн хүндрэл, эндэгдэл гарсан тохиолдолд хуулийн дагуу арга хэмжээ авна. Манай яамны зүгээс захиргааны арга хэмжээ авдаг. Эмчийн эмчлэх эрхийг нь цуцлах, цалингийн тодорхой хэмжээгээр торгох, цаашлаад ажлаас нь халах хүртэл арга хэмжээ авна. Гэхдээ эрүүгийн шинжтэй бол Хуульзүйн яамтай холбогдоно л доо.

  -Яамнаас өсвөр насны охидод чиглэсэн сургалт сурталчилгааны ямар ажил хийж байна. Ялангуяа жирэмслэлтээс сэргийлэх тал дээр?

-Олон арга хэмжээ авч байгаа. Хамгийн гол нь жирэмслэлтээс сэргийлэх, гэр бүл төлөвлөх асуудал чухал. Сэргийлэх тал дээр олон улсын байгууллагуудтай хамтраад арьсан доорх суулгацыг нэвтрүүлсэн. Энэ нь 2-3 жил жирэмслэлтээс аюулгүйгээр хамгаалах боломжтой суулгац. Ард түмэнд хангалттай мэдээлэл хүрээгүй байгаа учраас хэрэглээ маш бага байна. Цаашлаад жирэмслэлтээс хамгаалах маш олон арга  байгаа.

Дэлхийн 20 гаруй орны төлөөлөгчид ирж оролцох “ICE Mongolia-2014”  Олон улсын барилгын үзэсгэлэн худалдаа өнөө өглөө “Буянт-Ухаа” спорт цогцолборт нээгдлээ.  Тус үзэсгэлэнд  барилгын материал зардаг, орон сууц барьдаг бүхий л байгууллага, компаниуд оролцохоос гадна, Япон, Хятад, Солонгос, Гана зэрэг 20 гаруй орны барилгын материал, орон сууцны компаниудаас төлөөлөл ирж оролцож байгаа юм байна. Энэ үеэр байгууллагууд барилгын материал болон, орон сууцны 3-10 хүртэлх хямдралтай худалдаа явуулах ажээ. Үзэсгэлэн энэ сарын 14-18-ны хооронд дөрөв хоног үргэлжилэх юм. Монголд жилдээ барилгын чиглэлээр 5-6 олон улсын болон дотоодын үзэсгэлэн худалдаа зохион байгуулагддаг аж. Энэ удаагийн үзэсгэлэн яармагийн онцлог нь Монголын барилгын салбарт гадаадын хөрөнгө оруулалтыг татах явдал гэнэ. Үзэсгэлэнг очиж үзэх сонирхолтой хүмүүст эдгээр өдрүүдэд драмын театрын урдаас цаг тутам автобусаар үйлчилх гэнэ.

Монгол Улсад цусны донорын тоо маш бага, байнгын донорын дутагдалтай байдаг ажээ. Ялангуяа оюутан, залуусын хичээл амарсан зуны цагт донорын тоо эрс багасдаг байна. Энэ нь манайд донор болж буй хүмүүсийн дийлэнх нь залуус байдагтай холбоотой аж. Тиймээс оюутан залуусыг тарахаас өмнө удаан хадгалдаг цус,  цусан бүтээгдэхүүнийхээ нөөцийг бэлдэх үүднээс “Амьдрал бэлэглэе” нэг сарын аяныг Цус сэлбэлт судлалын үндэсний төв бол Монгол дахь олон улсын JCI төрийн бус байгууллагаас хамтран зохион байгуулах гэж байна. Аяны нээлт өнөөдрөөс эхэллээ. Түүнчлэн жил бүрийн зургадугаар сарын 14-нд тохиодог дэлхийн цусны өдрийг угтан аяныг явуулж байгаа аж. 

Одоогоор манайд 2800 гаруй байнгын донор жилдээ хоёроос доошгүй удаа цусаа өгдөг байна. Цусны нөөцийн хувьд хадгалах байдлаасаа хамаараад 7-10 хоногийн нөөц байгаа гэнэ. Нэг хүний цуснаас гурван төрлийн бүтээгдэхүүн /ялтсан эсийн бүтээгдэхүүн, сийвэнгийн бүтээгдэхүүн, улаан эсийн бүтээгдэхүүн/ гарган авдаг тул дор хаяж гурван хүний амийг аврах боломжтой байдаг байна. 

Цус сэлбэлт судлалтын үндэсний төв болон JCI байгууллагынхан бүх ард иргэдийг “Амьдрал бэлэглэе” аянд идэвхитэй  оролцохыг уриаллаа. 

Э.Номин