АН-ын бүлгээс мэдээлэл хийлээ. Тус бүлэг хуралдаанаараа гурван асуудлыг хэлэлцжээ. Бүлгийн зүгээс Ерөнхий сайдаас мэдээлэл сонсож, цаашид хийх ажлуудад нь чиг үүрэг өгсөн байна. Мөн “Монгол банк”-ны мэдээллийг сонссон байна.
АН-ын бүлгээс Засгийн газарт өгсөн үүрэгт
1. Үндэсний үйлдвэрлэлээ дэмжиж зарим шаардлагагүй импортыг багасгах. Сүүлийн үед хэрэглээний замбараагүй байдал газар авсан. Тэр дундаа тодорхойгүй тансаглал их болсон. Тухайлбал 600 мянган төгрөгийн цалинтай төрийн албан хаагч олон зуун сая төгрөгийн үнэтэй жийп машин унадаг гэх мэт. Энэ нь далд эдийн засаг байгаа гэдгийг илтгэж байгаа. Тиймээс үргүй зардлыг багасгаж, ухаалаг хэрэглээг дэмжих ажлыг үүрэг болгосон гэж тус бүлгийн дарга Д.Эрдэнэбат онцоллоо.
2. Шаардлагагүй төрийн хяналт шалгалтыг багасгах. Энэ заалттай холбогдуулан Хяналтын тухай хуулийг өнгөрсөн долоо хоногт УИХ-аар хэлэлцсэн ч харамсалтай нь МАН-ыэн бүлэг хүч түрж унагасан. Энэ нь нийтийн эрх ашиг гэхээсээ илүүтэй намынхаа явцуу эрх ашгийг бодсон хэрэг гэж АН-ын бүлгийн дарга Д.Эрдэнэбат хэллээ. Мөн Газрын тосны тухай хуулийг ч ийм байдлаар унагасан гэлээ. Эдгээр хуулиуд нь нийгэмд хамгийн хэрэгтэй хуулиуд учраас дахин оруулж ирэхээр бэлтгэж байгаа аж.
3. Газрыг эдийн засгийн эргэлтэнд оруулах ажлыг түргэтгэх.
4. Ашигт малтмалын тухай хуулийг даруй хэлэлцүүлэх. Тэр дундаа алт олборлогчдоо дэмжиж ажиллах.
5. Үйлдвэрлэлийн тоног, төхөөрөмжийг гааль, НӨАТ-аас чөлөөлөх.
6. Хөдөө рүү чиглэх ажлуудаа эрчимжүүлэх. Тэр дундаа сум дундын сүүний үйлдвэрийг даруй ашиглалтанд оруулах.
7. Хөдөөд хэрэгжиж эхэлж буй 1000 айлын орон сууцыг барих ажлыг даруй эхлүүлэх.
8. Байрны зээлийн ипотекийн зээлийг 7 хувь болгох.
9. Хил орчмын худалдааг идэвхжүүлэх. Замын-Үүдийн худалдааг эхний ээлжинд ажлуулах.
10. Концессын гэрээгээр хийгдэх ажлуудыг яаралтай эхлүүлэх зэрэг асуудлууд багтжээ.
Мөн “Монгол банк”-ныхныг байрлуулж мэдээлэл сонссон байна. Өнөөдөр валютын ханшийг тогтвортой байлгах, төрийн мөнгөний бодлогыг зохистой барих нь “Монгол банк”-ны үүрэг. Мөн Монгол банк өөрийн боломж, бололцоог ашиглаж гадны хөрөнгө оруулалтыг татах хэрэгтэй гэж АН-ын бүлгийн дарга Д.Эрдэнэбат онцоллоо. Мөн арилжааны банкуудад олгодог төрийн мөнгө хэр зөв зохистой зарцуулагдаж байна гэдгийг шалгахыг АН-ын бүлгээс Монгол банкинд даалгажээ. Арилжааны банкуудад шалгалт хийх эрх нь Монгол банкинд байгаа учир хяналт, шалгалтаа чангатгахыг үүрэг болгожээ.
НИТХ-ын Тэргүүлэгчдийн ээлжит хурлаар хэлэлцэх эхний асуудал хатаж ширгэхдээ тулаад буй Улиастайн голын эхийг нийслэлийн тусгай хамгаалалтад авах тухай байлаа. 
УИХ-ын Хууль зүйн байнгын хорооны хуралдаанаар өнөөдөр Гэмт хэргийн тухай хуулийн төслийг хэлэлцлээ. Хуулийн төслийн танилцуулгыг Хууль зүйн сайд Х.Тэмүүжин хийлээ. Монгол Улсын эрүүгийн хариуцлагын тогтолцоонд хорих ял дийлэнх хувийг эзэлдэг аж. Тухайлбал, Шүүхийн 2011 оны шүүн таслах ажиллагааны нэгдсэн мэдээгээр нийт ялын дотор хорих ялын эзлэх хувь 77.4 хувь, нийтэд тустай ажил хийлгэх нь 5.8 хувь, баривчлах ял 12.5 хувь, бусад ял 0.1 хувийг эзэлж байсан бол 2012 оны мэдээгээр нийт ялын дотор хорих ялын эзлэх хувь 77.6 хувь, нийтэд тустай ажил хийлгэх 5.7 хувь, баривчлах ял 11.6 хувь, бусад ял 5.1 хувийг эзэлж байна гэсэн судалгаа гарчээ. Мөн хорих ял эдлээд суллагдсан иргэдийн 47 орчим хувь нь дахин гэмт хэрэг үйлдэж, ял шийтгүүлсэн байна. Тиймээс Гэмт хэргийн тухай хуульд торгох ялыг оруулж, нэг зуугаас дөчин мянган тооцооны нэгжтэй тэнцэх хэмжээний төгрөг ногдуулахаар заажээ Ингэхдээ уг торгох ялаас хохирогчид учирсан хохирлыг төлүүлэх, ялтан торгох ялыг сайн дураараа биелүүлээгүй тохиолдолд албадан биелүүлэх, албадан биелүүлэх ажиллагаанд саад учруулсан, оргон зайлсан тохиолдолд торгох ялыг хорих ялаар солихоор төсөлд тусгажээ. Мөн хуулийн төсөлд зорчих эрхийг хязгаарлах ялыг нэг сараас таван жил хүртэл хугацаагаар оногдуулахаар заасан байна. Түүнчлэн тогтоосон замаар зорчих, хууль сахиулах байгууллагын зөвшөөрлөөр оршин суух газраа өөрчлөх, шүүхээс хүлээлгэсэн үүрэг, хоригийг зөрчвөл уг ялын нэг хоногийг хорих ялын нэг хоногоор дүйцүүлэн тооцох юм байна.Энэ нь шинэ төрлийн ял бөгөөд шүүхээс хорих ялыг оногдуулах явдлыг багасгах зорилгоор электрон гавны тусламжтайгаар цахим хяналт тавих гэнэ. Хорих ял нь хугацаатай ба бүх насаар нь хорино гэсэн ангилалтай байх нь. Тухайлбал, хугацаатай хорих ял нь нэг сараас хорин жил хүртэл байх, бүх насаар хорих ял нь хорин жилээс дээш хугацаагаар байх бөгөөд суллагдах үндэслэл нь хорин жилээс дээш хугацаагаар хорих ялыг биечлэн эдэлсний дараа үүсэх юм байна. Хуулийн төсөлд өсвөр насны иргэнд ял оногдуулах талаар ч тусгасан байна. Ял шийтгэл хүлээлгэх насны хязгаарыг 14 наснаас байхаар зааж өгчээ. 14 наснаас дээш гэмт хэрэг үйлдсэн өсвөр насны хүн бүрт ял оногдуулах зорилгогүй гэсэн тайлбарыг яамнаас хийж байна. Хүүхдийн хүмүүжил нас бие, сэтгэхүйн онцлогт тохирсон ял шийтгэл оногдуулах, хүүхдийг аль болох хорих бус хүүхдийн сургалт хүмүүжлийн тусгай сургалттай байгууллагад хүмүүжүүлэх. Хүүхдийн хууль зүйн хороо нь хүүхдийг гэмт хэрэг үйлдэхээс урьдчилан сэргийлэх, хүүхдийн эрх ашгийг хамгаалах, хүмүүжлийн чанартай албадлагын арга хэмжээнд хяналт тавих зэргээр тодорхой зохицуулалтыг тусгаж өгсөн аж. Гэмт хэргийн тухай хуулийн төсөл батлагдсаны дараа хэрэгжүүлэхэд бэлтгэл шат 1-2 жил үргэлжилж, хуулийг нэг мөр, зөв ойлгож хэрэглэх боломж бүрдэх гэнэ.
Газрын тосны газрын дарга асан Д.Амарсайхан энэ сарын 13-ны өдөр хорих 461-р ангийн уулзалтын өрөөнд нас барсан. Баянгол дүүргийн цагдаагийн II хэлтэс Эрүүгийн Хуулийн 95 дугаар зүйлийн 95.1 дэх хэсэгт зааснаар энэ асуудалд эрүүгийн хэрэг үүсгэн шалгаж эхэлсэн байна. Одоогоор хэргийн мөрдөн байцаалтын ажиллагаа үргэлжилж байгаа аж. Үүнд дүүргийн II прокурорын газраас хяналт тавин ажиллаж байна. Д.Амарсайхан Засгийн газраас “Петро чайна дачин тамсаг” компанитай байгуулсан бүтээгдэхүүн хуваах гэрээний орлогоос нэг хувийг нь хувийн данс руугаа шилжүүлж байсан гэх хэрэгт сэжиглэгдэн тус газар хоригдож байсан юм. 
АНУ-ын Хөдөө аж ахуй, амьтан, ургамал, эрүүл мэндийн хяналтын газрын Бээжин дэх Элчин сайдын яамны атташе, хатагтай Синти Дуер тэргүүтэй төлөөлөгчид манай улсад ажиллаж байна. Тэд 2014-2015 онд хамтран ажиллах ажлын төлөвлөгөө, Санамж бичгийн төслийг хэлэлцэхээр Мэргэжлийн хяналтын ерөнхий газарт ажиллаж байгаа аж. Төлөөлөгчдийг Мэргэжлийн хяналтын ерөнхий газрын дарга Д.Батмөнх өнөөдөр хүлээн авч уулзлаа. Мэргэжлийн хяналтын байцаагч нарыг АНУ-д сургаж мэргэшүүлэх, зөвлөх багш урин сургалт зохион байгуулах талаар санал солилцжээ. Айлчлалын хүрээнд талууд мал, амьтан, ургамлын эрүүл мэнд, хорио цээр, хүнсний аюулгүй байдал болон бусад асуудлыг хэлэлцэх юм. Үүнээс гадна АНУ-ын APHIS FSIS байгууллагатай хамтран ажиллах Санамж бичгийн төслийг тохирон гарын үсэг зурахад бэлэн болгох ажээ.
Мэргэжлийн хяналтын газрын Эрүүл ахуй халдвар хамгааллын байцаагчид Нарантуул худалдааны төвд зарж байгаа хүүхдийн тоглоомнуудыг баталгаагүй, шаардлага хангаагүй гэсэн дүгнэлт гаргажээ. 0-3 настай хүүхэд тоглохыг хориглоно гэсэн тайлбартай шажигнадаг тоглоом, будгийн тогтворжилт муу тоглоом, хүүхдийн нүд рүү нь бууддаг гэх зэрэг аюулгүй байдлыг зөрчсөн тогтлоомнуудыг тус төвд худалдаалж байгаа аж. Мөн нярайн шажигнадаг тоглоомын дуу стандартаас чанга гэсэн зөрчил ч илэрсэн байна. Ийм чанга дуутай тоглоом хүүхдийн сонсголд нөлөөлдөг байна. 
Үндэсний үйлдвэрлэгчид Э.Бат-Үүл даргын Шведийн Элчин сайдтай уулзсан мэдээг үзвэл урам хугарахаар юм. Улаанбаатар хотын захирагч Э.Бат-Үүл Шведийн вант улсаас Бээжин хотод суугаа элчин сайд Ларс Петер Фреденийг хүлээн авч уулзахдаа Улаанбаатар хотын нийтийн тээвэрт хамтран ажиллах санал солилцсон байна. Уулзалтын үеэр Э.Бат-Үүл “Улаанбаатар хотын нийтийн тээвэрт Шведийн “Сканий” үйлдвэрийн автобусыг нийлүүлэх хүсэлтийг дэмжиж байгаа”-гаа илэрхийлжээ. Тэрээр нийслэлийн нийтийн тээвэр экологи, чанарын шаардлага хангасан 2500 автобусаар бүтэн парк шинэчлэлт хийх шаардлагатай байгаа бөгөөд ашиглалтын үйл ажиллагааг хариуцах, урт хугацааны худалдан авалт хийх хүсэлтэй байна. Мөн бүс нутгаа “Аялал жуулчлалын төв” болгон хөгжүүлэх зорилт тавин ажиллаж байгаа тул аялал жуулчлалын тээвэрт ч мөн ая тухтай автобус хэрэгтэй тул угсрах жижиг үйлдвэрийг Монголд барих саналтай байгаагаа хэлсэн аж. Түүгээр ч барахгүй санхүүжилтийг жил бүр батлагдсан төсвөөсөө төлөөд явах боломж байгаа эсэхийг лавласан байна. “Сканиа” компанийн Монгол дахь суурин төлөөлөгчийн газрын дарга Матиас Алин “Сканий” үйлдвэрийн автобус нь тав тухтай, дулаан, агааржуулалтын системийг шийдсэн, евро стандартыг хангасан үзүүлэлттэй гэж онцлоод, санхүүжилтийн хувьд Шведийн үндэсний бүтээгдэхүүний экспортыг дэмжиж, санхүүгийн дэмжлэг үзүүлэх зорилготой Засгийн газрын 2 байгууллага ажилладаг. Тэдгээр байгууллагуудаар дамжуулан урт хугацааны бага хүүтэй зээлээр автобус нийлүүлэх боломжтой” гэжээ. Монголд угсарч байгаа “Экобус” евро стандартын шаардлага хангасан, агаар бохирдуулдаггүй гэдгийг хотын дарга сонссон болов уу. Хотын дарга гадаад автобус балиашигладаг ч, үндэсний үйлдвэрлэлээ дэмжих байлгүй дээ.
АН-ын бүлгийн өчигдрийн хуралд Нийслэлийн удирдлагууд оролцож, мэдээлэл хийжээ. Тэд 2014 онд нийслэлд хийгдэх ажлуудын талаар дэлгэрэнгүй мэдээллийг АН-ын бүлгийн гишүүдэд өгсөн байна. АН-ын бүлгээс нийслэл хотод хийгдэж буй ажлуудыг эрчимтэй явагдаж байгааг сайшаагаад цаашид хийж гүйцэтгэх ажлуудад нь чиглэл өгсөн аж. 
Монголын Уул уурхайн Үндэсний Ассоциацийн Ерөнхийлөгч Д.Дамба удахгүй ажлаа өгөх нь. Энэ сарын 28-нд болох ассоциацийн бүх гишүүдийн ээлжит бус чуулганаар дараагийн ерөнхийлөгчийг сонгохоор товложээ. Хуралдааны үеэр ассоциацийн тэргүүн өнгөрсөн хугацаанд хийсэн ажлуудаа тайлагнана. Тайлангийн дараа шинэ Ерөнхийлөгчийг сонгох сонгууль болох нь. Ээлжит бус чуулган энэ сарын 28-нд “Блю Скай” цогцолборт болох юм байна.