Category: нийгэм

“Өдрийн сонин”-ны Асуух эрхийн танхимд дөнгөж сая “Гоц авъяастай хүүхдийн” буюу 93 дугаар дунд сургуулийн 30 гаруй багш, ажилчид хэвлэлийн бага хурал хийлгэв. Тус сургуулийн багш ажилчдын мэдээлж буйгаар 2013 оны нэгдүгээр сарын 2-ны өдөр Т.Энхтүвшинг захирлын үүрэг гүйцэтгэгчээр томилжээ. Томилгоог Баянгол дүүргийн Засаг дарга Д.Оросоо хийсэн бөгөөд томилогдсон өдрөөсөө хойш Т.Энхтүвшин захирал зан харилцааны доголдлуудыг удаа дараа гаргах болсон гэнэ.

Тухайлбал, тус сургуулийн үйлдвэрчний хорооны гишүүн С.Алтанчулуун ийн өгүүллээ. Тэрээр “Т.Энхтүвшин багш захирлын сонгон шалгаруулалтад ороогүй, хууль, журмын наад захын шаардлага хангахгүй хүн. Гэнэт л дүүргийн Засаг даргын томилгоогоор үүрэг гүйцэтгэгчээр хүрээд ирсэн. Захирал болсноосоо хойш сургууль дотор цайны газар, спорт заал түрээслүүлэн ашиг хонжоо хайх болсон. Тэрчлэн сурагчдын хандивын мөнгийг өөрийн мэдлийн болгодог. Одоогийн байдлаар 20 гаруй сая төгрөгийг өөрийн болгосон. Энэ алдааг нь хэлэхээр багш ажилчдаа хална гэж сүрдүүлж, дарамталдаг болсон. Одоогийн байдлаар хоёр багшийг албан ёсоор, найман багшийг аман байдлаар халчихаад байна. Халагдсан хоёр багш маань шүүхээр заргалдаад захирлын буруу болсон. Тэгээд эргээд сургуульдаа иртэл саяхан дахиад л халчихлаа. Харин өөрөө дур мэдэн ямар ч шалгуургүйгээр гурван хүнийг шинээр ажилд аваад байгаа” хэмээн өгүүлсэн юм.   

 Харин тус сургуулийн Хөдөлмөрийн багш П.Хувьзаяа “Манай захирлын үүргийг гүйцэтгэгч Т.Энхтүвшин өөрийн хүүгээ өмөөрч гуравдугаар ангийн хоёр ч сурагчийг алгадаж, зодсон байна. Бичлэг нь сургуулийн хяналтын камерт үлдсэнийг бид баримт болгож аваад байгаа. Тиймээс бид ёс зүйн талаас нь Нийслэлийн болровсролын газар, Боловсрол, шинжлэх ухааны яам, Э.Бат-Үүл даргад хүртэл бичиг явуулаад  жил гаруйн хугацаанд ямар ч хариу ирсэнгүй” хэмээн мэдээллээ.

Тухайн багш нар хэвлэлийнхэнд хандах болсон нь ганцхан зорилготой гэнэ. Тэр нь нийт багш ажилчдаа ойлгодог, хувийн харилцааны соёлтой, хэн нэгнийг ялгаварлан гадуурхдаггүй байх аж. “Ийм хэм хэмжээний шалгуураар захирлын сонгон шалгаруулалтыг дахин явуулж өгөөч ээ” хэмээн хүсч байлаа. 

Багш П.Хувьзаяа

Багш С.Алтанчулуун

 “Гоц авьяастай хүүхдийн сургууль” буюу нийслэлийн 93 дугаар сургуулийн захирлын үүрэг гүйцэтгэгч Т.Энхтүвшин хүүхдээ өмөөрч сурагчдаа гар хүрсэн талаар олон нийтэд мэдээлэл хүрсэн. Тэрбээр ёс зүйгүй үйлдлээ удаа дараа гаргаж байгаа талаар 93 дугаар сургуулийн багш, ажилчид мэдээлэл хийхээр болсон юм. Тус сургуулийн 30 багш, ажилчин яг одоо “Өдрийн сонин”-ы “Асуух эрхийн танхим”-д мэдээлэл хийж байна. 

Хэнтий аймгийн Чингэс хотод “Олимп” цогцолборын шавыг тавьжээ. Орон нутгийн хөгжлийн сангийн хөрөнгөөр баригдах “Олимп” цогцолборт хөл бөмбөг, хоккей, гар болон сагсан бөмбөгийн талбайнуудыг дэлхийн стандартын дагуу иж бүрнээр барьж байгуулах аж. Цогцолборын зураг төслийг “Тоонто гранд” ХХК хийсэн бол гүйцэтгэгчээр “Тулга констракшн” шалгаран ажлаа эхлүүлсэн аж.

Б.УРАНЧИМЭГ

Хэнтий аймгийн төв Чингэс хотод “Жижиг эрдэнэ” нэртэй бетон зуурмагийн үйлдвэр нээлтээ хийжээ. “Юна”, “Жижиг эрдэнэ”, “Элбэг баян говь” компаниуд хамтран байгуулсан “Жижиг эрдэнэ” компани нь М100-М350 маркийн бетон зуурмаг үйлдвэрлэх юм байна.  Нэг шоо метр зуурмаг 142-182 мянган төгрөгийн үнэтэй байх гэнэ. Тус үйлдвэр хоногт 1200 м3 бетон зуурмаг үйлдвэрлэх хүчин чадалтай аж. Тус үйлдвэр үүд хаалгаа нааснаар ажилгүй байсан  орон нутгийн 30 гаруй залуусыг ажлын байраар хангажээ.

Тус компаниуд цаашдаа хамтран төмөр бетон хийцийн үйлдвэр байгуулахаас гадна төрөл бүрийн блок үйлдвэрлэхээр төлөвлөж байгаа аж.

Э.ЭРДЭНЭ

Хан-Уул дүүргийн Засаг дарга Ж.Ганхуягийн санаачилгаар өнгөрсөн долоо хоногоос эхлэн тус дүүрэгт зуны цэцэрлэгүүд ажиллаж эхэлжээ. Одоогоор хороо бүрт нэг цэцэрлэг буюу нийт 18 цэцэрлэг үйл ажиллагаа явуулж байна. Хүүхдийн насны ангилал харгалзахгүй, нэг цэцэрлэгт нэг л бүлэг ажиллаж байгаа аж.  Цэцэрлэгүүд наадам  хүртэл ажиллах бөгөөд дараа дараагийн жилүүдэд илүү удаан хугацаатай ажиллуулахаар төлөвлөж байгаа гэнэ.  Гэхдээ зуны цэцэрлэгт өвөл цэцэрлэгт хамрагдаж чадаагүй, аав ээж нь хөгжлийн бэрхшээлтэй, өөрсдөө ярьж, сонсож чадахгүй зорилтот бүлгийн хүүхдүүд хамрагджээ. Одоогийн байдлаар Хан-Уул дүүргийн нийт 3000 гаруй хүүхэд зуны цэцэрлэгт явж байна. Энэхүү ажил нь  дүүргийн иргэдийн сайшаалыг ихээхэн хүлээж байгаа бөгөөд бүх төсвийг ХУД-ийн Засаг дарга гаргаж байгаа аж. Энэ талаар ХУД-ийн Боловсролын хэлтсийн ажилтан Ц.Батбаяр мэдээллээ. 

Э.НОМИН

Мэргэжлийн хяналтын байцаагчид элсэлтийн ерөнхий шалгалтад хяналт тавин ажиллажээ.

Нийслэлийн Мэргэжлийн хяналтын газрын Боловсролын хяналтын улсын байцаагчид нийслэлийн 6 дүүрэгт ерөнхий шалгалтын монгол хэл, бичгийн хичээлийн үйл ажиллагаанд хөндлөнгийн хяналт тавин ажилласан байна.

Шалгалтаар ерөнхий шалгалтын зохион байгуулалтын үйл ажиллагаанд байгаа  хэд хэдэн зөрчлүүдийг  илрүүлжээ. Тухайлбал Энх-Орчлон дээд сургууль дээр шалгалтыг сургалтын зориулалтын бус цайны газрын зааланд авч байсан бол, Политехник коллеж дээр шалгалтын үед хүүхдийн дээрээс салхивч унаж, шил нь хагарч  хүүхдийн гар зүссэн байна.

УБ-Эрдэм дээд сургууль дээр 2 материал дутуу ирсэн, ХААИС дээр шалгалтын материал тогтоол, протокол, лацгүй ирсэн, А вариант хэвлэлийн алдаатай ирсэн, мөн энэ сургууль дээр нэг сурагч ахыгаа өөрийнхөө оронд оруулж байгаад баригдсан зэрэг зөрчлүүд гарсан байна.

Мөн сургууль, эцэг эхийн зүгээс хайхрамжгүй хандаж шалгалт өгөх дээд сургуулийн байрыг сайн хэлж, автобус унааг зааж, өгөөгүйгээс хүүхдүүд төөрч будилах, элсэлтийн ерөнхий шалгалтын материалуудаа дутуу бүрдүүлж ирснээс  шалгалтаасаа хоцрох үзэгдэл их гарсан байна. Ерөнхий шалгалтын монгол хэл, бичгийн хичээлийн шалгалтад нийслэлийн 6 дүүргээс 400 гаруй төгсөгчид шалгалтандаа шалтгаангүйгээр ирээгүй байна.

Цаашид Боловсролын үнэлгээний төвөөс шалгалтыг  хүүхдийн эрхийг дээдэлж, сургалтын зориулалтын гэрэлтүүлэг, агааржуулагчтай, эрүүл, аюулгүй байдлыг хангасан байранд зохион байгуулах шаардлагатайг шалгалтын үр дүн харууллаа гэж Нийслэлийн Мэргэжлийн хяналтын газраас мэдээллээ.

Өнөөдөр “Цөлжилттэй тэмцэх дэлхийн өдөр” тохиож байна. Энэ өдөр дэлхий нийтийн анхаарлыг байгаль орчны эмзэг сэдэв болсон цөлжилт рүү анхааруулж, олон оронд цөлжилтийн эсрэг аян явуулдаг билээ.  Ялангуяа ганд нэрвэгдсэн, цөлжилт идэвхтэй явагдаж буй улс, бүс нутагт Цөлжилтийг устгах НҮБ-ын конвенцийг хэрэгжүүлэн ажилладаг. Өнөөдөр дэлхийн хуурай газрын 40 хувь нь ямар нэгэн байдлаар цөлжилтийн аюулд өртөөд байна. Эдгээр улсын тоонд манайх ч дээгүүр жагсдаг аж. 

Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Эрхийн бичгээр урамшуулах тухай” А/480 дугаар захирамж гаргалаа. Захирамжаар амьжиргааны баталгаажих түвшингээс доогуур орлоготой өрхийн  болон хүнд нөхцөлд амьдарч буй, хөгжлийн бэрхшээлтэй хүүхдүүдийг зусланд амруулахад дэмжлэг үзүүлэх зорилгоор нийт 266 хүүхдийг нийслэлийн ногоон бүсийн хүүхдийн зусланд амраах эрхийн бичгээр урамшуулахаар боллоо. Хүүхдүүдийг зусланд амраахад шаардагдах 40.000.000 төгрөгийг Тамгын газрын холбогдох зардлаас гаргахыг Ё.Гэрэлчулуунд үүрэг болголоо. Зусланд амраах хүүхдүүдийн судалгааг гаргаж, зохион байгуулалтын арга хэмжээг авч ажиллахыг Нийслэлийн Засаг даргын Тамгын газрын Нийгмийн хөгжлийн бодлогын хэлтэст даалгалаа гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

МУИС-ийн нийт төгсөгчдийн хонхны баярын үйл ажиллагаа өнөөдөр Хавдар судлалын үндэсний төвд болох гэнэ. МУИС-ийн Хууль зүйн сургуулийг “Эрх зүйч”, “Олон улсын эрх зүйч” мэргэжлээр төгсөж байгаа нийт 120 орчим оюутнууд хонхны баярын үйл ажиллагаанд зарцуулагддаг үргүй зардлыг хэмнэн мөнгө хуримтуулж, мөн бусад хуулийн фирмүүдээс дэмжлэг авч тодорхой хэмжээний хөрөнгө цуглуулж чадсаны үр дүнд Хавдар судлалын үндэсний төвийн Туяа эмчилгээний тасагт 9.3 сая төгрөгийн өртөгтэй өвчтөнд яаралтай тусламж үзүүлэхэд хэрэглэгддэг “зүрхний дефибириллятор” төхөөрөмж хандивлах боломжтой болсон байна.

Нээлтийн үеэр “зүрхний дефибириллятор” төхөөрөмжийг гардуулах бөгөөд мөн хүүхдэд зориулсан номын сан байгуулахад зориулж ном хандивлах арга хэмжээ болох аж.