Category: нийгэм

Монгол Улсаас Бүгд Найрамдах Солонгос Улсад суугаа Элчин сайд Б.Ганболд “Даян дэлхийн ногоон өсөлтийн байгууллага”-д (GGGI) Монгол Улс гишүүнээр элссэн хэлэлцээрийг баталсан тухай ноотыг тус байгууллагын Ерөнхий захирал Yvo De Boer-д энэ сарын 20-ны өдөр гардуулав.  

Ерөнхий захирал ноотыг хүлээж аваад Монгол Улс 2011 оноос хойш тус байгууллагатай идэвхтэй хамтран ажиллаж ирснийг тэмдэглэж цаашид тус байгууллагын үүрэг зорилтыг хэрэгжүүлэх, дэлхий дахины өмнө тулгарч байгаа уур амьсгалын өөрчлөлт, байгаль орчны асуудлыг шийдвэрлэх үйлсэд өөрийн гэсэн хувь нэмрээ оруулж  хамтран ажиллахыг хүслээ.

Элчин сайд Б.Ганболд үргэлжлүүлэн Ерөнхий захиралтай  тусгайлан уулзаж Монгол Улсын УИХ-аас “Ногоон хөгжлийн үзэл баримтлал, дунд хугацааны хөтөлбөр”-ийг баталсан тухай мэдээлж, цаашид тус байгууллагатай байгальд ээлтэй тээвэр, эрчим хүч, барилгын салбарт хамтарсан судалгаа хийх, төсөл хөтөлбөр хэрэгжүүлэх талаар үргэжлүүлэн хамтран ажиллах сонирхолтой байгаагаа илэрхийлэв.

Өнгөрсөн бямба гаригийн өглөөний 07.40 цагийн үед Төв аймгийн Эрдэнэ сумын нутаг, Баяндавааны адаг замд Сүхбаатар аймгаас Улаанбаатар хотын чиглэлд явсан хот хоорондын зорчигч тээврийн үйлчилгээний “Дайчин сүх” ХХК-ний Hyundai Bus маркийн 0522 СҮА дугаарын автобус замын хажуу руу онхолдсон ослын  улмаас 6 хүн нас барж 44 хүн гэмтсэн хэрэг гарсан.  Ослын шалтгааныг тогтоох, осолдсон хүмүүсийн нөхөн олговрыг хэрхэх зэрэг олон асуудлыг шийдэх үүрэгтэй ажлын хэсэг ажлаа эхэлжээ. Ажлын хэсгийг Зам тээврийн дэд сайд ахалж байна. Хэргийг шалгах явц, осолдсон иргэдийн асуудлыг шийдвэрлэхэд анхаарал хандуулан ажиллахаар Сүхбаатар аймгийн Засаг дарга, ИТХ-ын тэргүүлэгчдийн дарга тэргүүтэй төлөөлөгчид өчигдөр Улаанбаатарт онгоцоор иржээ. 

Улаанбаатар хотын өсөн нэмэгдэж буй дулаан, цахилгааны хэрэгцээг хангах   450 МВт-ын хүчин чадал бүхий “Дулааны V цахилгаан станц”-ын Концессын гэрээг өнгөрсөн баасан гарагт Эдийн засгийн хөгжийн сайд Н.Батбаяр болон төслийг хэрэгжүүлэхээр сонгогдсон “International Power Plc, Sojitz Corporation, Posco Energy, Newcom LLC” түншлэлийн байгуулсан Монгол Улсад бүртгэлтэй “Фифт Комбайнд Хийт Энд Пауэр Плант” ХХК-ийн гүйцэтгэх захирал Рибессе Беноут нар гарын үсэг зурж, баталгаажууллаа.

 “Дулааны V цахилгаан станц”-ын концесс олгох уралдаант шалгаруулалтыг 2011 оны есдүгээр сарын 28-ны өдөр зарласан бөгөөд шалгаруулалтад олон улсын нэр хүнд бүхий 34 компани оролцох сонирхлоо илэрхийлж, тэдгээрээс 11 консорциум нь саналаа ирүүлсэн байдаг. Улмаар удаах гурван шатны шалгаруулалт явуулсны дүнд “International Power Plc, Sojitz Corporation, Posco Energy, Newcom LLC” түншлэлийг хамгийн сайн нөхцөл санал болгосон оролцогч хэмээн шалгаруулж, 2013 оны наймдугаар сарын 26-ны өдөр төслийн гэрээ болон дагалдах бусад гэрээний нөхцөлийн талаар хэлэлцээ хийхийг зөвшөөрч, Эрчим хүчний яам, Эдийн засгийн хөгжлийн яам дээрх түншлэлтэй Санамж бичиг байгуулсан.

Төслийн хэлэлцээг манай талаас ЭХЯ, ЭЗХЯ, Эрчим хүчний зохицуулах хорооны Хамтарсан ажлын хэсэг тус түншлэлтэй хийж, төслийг эцсийн байдлаар боловсруулан 2014 оны зургадугаар сарын 12-ны өдрийн Засгийн газрын хуралдаанаар хэлэлцүүлж, батлуулсан ба хуралдаанаас “Дулааны V цахилгаан станц төсөл”-ийн Концессын гэрээнд гарын үсэг зурах зөвшөөрлийг Эдийн засгийн хөгжлийн сайд Н.Батбаярт олгосны дагуу өнөөдөр ийнхүү баталгаажуулж байна.

“International Power Plc, Sojitz Corporation, Posco Energy, Newcom LLC” түншлэлийн байгуулсан Монгол Улсад бүртгэлтэй “Фифт Комбайнд Хийт Энд Пауэр Плант” ХХК буюу концесс эзэмшигч нь энэ өдрөөс эхлэн нэг жилийн хугацаанд хөрөнгө оруулалтаа шийдвэрлэн, Цахилгаан эрчим хүч худалдах, худалдан авах гэрээ, Газар ашиглах гэрээ, Ус ашиглах гэрээг Монгол Улсын төрийн захиргааны холбогдох байгууллагуудтай тус тус хийснээр Концессын уг гэрээ хүчин төгөлдөр болж, станцын барилга угсралтын ажил эхлэх юм. 

Гэрээг төр-хувийн хэвшлийн түншлэл буюу концессын БАРИХ-АШИГЛАХ-ШИЛЖҮҮЛЭХ нөхцөлөөр байгуулж буй бөгөөд концесс эзэмшигч нь “Дулааны V цахилгаан станц”-ыг 4 жилийн хугацаанд барьж, удаах 25 жилд нь ашигласны дараа Монгол Улсын төрд үнэ төлбөргүй шилжүүлэх үүрэг хүлээнэ.Станцын хүчин чадлын хувьд цахилгаанд 450 МВт, дулаанд 587 МВт байна. CFB (circulating fluidized bed) технологийн бойлер ашиглах бөгөөд энэ нь байгаль орчинд үзүүлэх сөрөг нөлөө хамгийн бага хийгээд гэр хорооллын хүн амыг нэгдсэн халаалт бүхий орон сууцны хороололд шилжүүлэн суурьшуулах боломж бүрдэх юм байна.

Төслийг хэрэгжүүлэхэд 648 ажлын байр шинээр бий болно гэж урьчилсан байдлаар төлөвлөж байгаа ажээ.

Нийслэлийн Засаг даргын захирамжаар иргэдийн газрыг үнэлж, нөхөн олговор олгохоор боллоо. Тодруулбал, Хувьсгалчдын гудамж,Зурагтын шинэ эцсээс Баянхошууны тойруугийн уулзвар хүртэлх  4,6 км авто  зам, Их тойруу 110 квт-ын цахилгаан дамжуулах агаарын шугамын хамгаалалтын зурваст орсон иргэдийн өмчлөл, эзэмшлийн газар болон үл хөдлөх эд хөрөнгийн нөхөх олговрын төсвийг баталсан байна.

Ингээд арван иргэнд олгох 547 130 006  төгрөгийн нөхөх олговрыг олгож гэрээнд заасан хугацаанд 2014 оны газар чөлөөлөх нүүлгэн шилжүүлэхэд зориулан батлагдсан хөрөнгөнөөс гаргахыг Тамгын газрын Санхүү, төрийн сангийн хэлтэст даалгалаа.

ЗУРАГТЫН ШИНЭ ЭЦСИЙН БУУДЛААС БАЯНХОШУУ ЧИГЛЭЛИЙН 4.6 КМ

АВТО ЗАМЫН ӨРГӨТГӨЛ ШИНЭЧЛЭЛТИЙН АЖЛЫН ТРАССТ ОРСОН ИРГЭДИЙН

ҮЛ ХӨДЛӨХ ЭД  ХӨРӨНГИЙН НӨХӨХ ОЛГОВРЫН ТӨСӨВ        

ИХ ТОЙРУУ 110 КВТ-ЫН ЦАХИЛГААН ДАМЖУУЛАХ АГААРЫН ШУГАМЫН

ХАМГААЛАЛТЫН ЗУРВАСТ ОРСОН ИРГЭНИЙ ҮЛ ХӨДЛӨХ ЭД 

ХӨРӨНГИЙН НӨХӨХ ОЛГОВРЫН ТӨСӨВ

Монгол суу ухааны Манукол академийн ерөнхийлөгч, Физикч, философич, монгол судлаач, доктор З.Бат-Отгоны “Мөнх тэнгэр ба шинжлэх ухаан”   номын нээлт энэ сарын 25-нд Интер номын дэлгүүрт болохоор товлогджээ. Зохиолч өөрийн удаан  хайсан эрлээ мухарласнаа  “Мөнх тэнгэр ба шинжлэх ухаан” ном болгон бичиж эгэл түмэнтэйгээ хуваалцахаар шийдсэн гэнэ.  Тэрээр “Газрын нэг үндэснээс өвс ургамал ургадагчлан Мөнх тэнгэр гэдэг тэнгэрийн нэг үндсээс орчлонгийн бүх үзэгдэл юмс соёолон дэлгэрч, салаалж мөчирлөж, цэцэглэн дэлгэрдэг. Тиймээс Мөнх тэнгэр бол орчлонгийн бүх зүйлсийг өөрөөсөө үүсгэсэн, эргээд орчлонгийн бүх зүйлийг өөртөө хураан нэгтгэдэг. Энэ бол супер нэгдэл. Шинжлэх ухааны сүүлчийн тулгуур онол нь супер нэгдлийн онол хэмээн хүүрнэсэн түүний уран бүтээл өвөг дээдсийн маань орчлонг бүхлээр нь танин мэдсэн  агуу мэдлэг өнөөгийн монголчууд төдийгүй дэлхийн танин мэдэхүй ялангуяа, шинжлэх ухааны танин мэдэхүйд нэн чухал үүрэг гүйцэтгэнэ гэх итгэл үнэмшил дээр миний ном  үндэслэгдсэн” хэмээн ярьжээ. 

Чингэлтэй дүүргийн 16 дугаар хороо, Согоотын 17 дугаар гудамжинд нүхэнд хүн унасан байна гэсэн дуудлагыг 01:35 цагт өгснөөр Аврах, шуурхай салбарын тасгийг гаргахад хоёр метр гүн нүхэнд иргэн 44 настай согтуу эрэгтэй унаж хөнгөн гэмтсэн байсныг эмнэлгийн анхан шатны тусламж үзүүлэн ар гэрийнхэнд нь хүлээлгэн өгсөн.

Төв аймгийн Мөнгөнморьт сумын нутаг, “Юдэгийн гол”-д Тоёото Ланд круйзер-100” маркийн автомашинтайгаа бага насны 2 хүүхдийн хамт /1, 3 настай/ усанд суусан тухай дуудлагыг 10:36 цагт өгснөөр нийслэлийн Багануур дүүргийн Онцгой байдлын хэлтсийн Аврах гал унтраах 64 дүгээр ангийн албан хаагч нар аварч аюулгүй болгожээ.

Нийслэлийн Иргэдийн Төлөөлөгчдийн Хурлын 2012 оны 6/27 дугаар тогтоолоор баталсан төсөл арга хэмжээний жагсаалтад тусгагдсан “Цахилгаан суудлын автомашин угсрах ажил”-ын гэрээний дагуу угсарч гүйцэтгэсэн таван ширхэг цахилгаан суудлын машиныг “Монгол наадам” ОНӨААТҮГ-т хүлээлгэн өгөх арга хэмжээ 11.00 цагаас “Цахилгаан тээвэр” ОНӨААТҮГ-т болно.

Нийслэлийн Засаг даргын А/ 508 захирамжын дагуу ажлын хэсэг байгуулагдан хүлээлгэн өгөх арга хэмжээг зохион байгуулан ажиллаж байна. Эдгээр цахилгаан машинууд нь наадмын үеэр хүй Долоон худагт үйлчлэх бөгөөд наадмын дараа хоёр ширхэг машиныг “Үндэсний цэцэрлэгт хүрээлэн” НӨҮГазарт шилжүүлэн өгөхөөр төлөвлөсөн байна.

НҮБ-ын 2003 оны нэгдүгээр сард Ерөнхий Ассамблей хуралдаж жил бүрийн зургадугаар сарын 23-ны өдрийг олон улсын төрийн үйлчилгээний өдөр болгон зарлажээ. Ардчилсан, эрх чөлөөт нийгмийг бий болгохын тулд төрийн олон нийтэд хүргэж байгаа үйлчилгээ хүнд сурталгүй, авилгагүй, ил тод байх нь хамгийн чухал бөгөөд тухайн улс, гүрэн төрийн үйлчилгээг хэр зэрэг үзүүлж байгаагаас засаглалын хэлбэр харагдах тул энэхүү өдрийг тэмдэглэж байхаар болсон юм.

Мөнхүү энэ өдрөөс эхлэн сайн засаглал болоод төрийн үйлчилгээгээр тэргүүлдэг улс, гүрнүүдийг тодруулж, шагнаж байхаар болсон бөгөөд хамгийн сүүлд 2006 онд нэр бүхий 15 улсыг шагнан урамшуулжээ. 2006 оноос эхлэн сайн засаглал болоод нийтийн үйлчилгээний индексийг гаргаж эхэлсэн бөгөөд 2013 онд Монгол Улсын төрийн үйлчилгээ дундаас дээгүүр гэсэн үнэлгээг авч байсан юм. Хэдийгээр Монгол Улс энэ өдрийг албан ёсоор тэмдэглэн өнгөрүүлдэггүй ч НҮБ-ын сайн засаглалыг дэмжих хөтөлбөрт гишүүнээр элссэн.

 Хан-Уул дүүргийн 10 дугаар хороо, Нисэхээс Төв аймаг явах автозам дагуу шинээр III Амаржих төв барьж байгаа билээ. Тэгвэл тус барилдга дээр ажиллаж байсан  хүн хавтанд дарагдаж амиа алдсан гэнэ. Дуудлагаар нийслэлийн Аврах ангийн Аврах шуурхай салбарын тасгийг гаргахад барилгын ажилчин 20 настай эрэгтэй цутгалтын хавтанд дарагдсан байсан аж. Улмаар тухайн байгууллагын ажилчид гаргасан, биеийн байдал хүнд байсан тул эмнэлгийн анхан шатны тусламж үзүүлэн ГССҮТ-рүү авч явах замд нас баржээ. 

Нийслэлийн удирдлагууд өнгөрсөн баасан гаригт наадмын бэлтгэл ажилтай танилцжээ. Энэ жилийн наадмын нэг онцлог нь төмөр замын автобусыг Хүй долоон худаг руу явуулж байгаа аж.  Хүй долоон худаг руу явах иргэд “Дүнжингарав”, Дунд голын буудлаас төмөр замын автобусанд сууж, Давааны өртөөнд хүрэх юм байна. Давааны өртөөнд буусан иргэд морь барих газар руу эко автобусаар үнэгүй явах гэнэ.  Тиймээс иргэд наадмын талбай руу  заавал машинтай явах шаардлагагүй аж.  Хүй долоон худаг дахь үйлчилгээний талбай, авто зогсоол хооронд дотоодод үйлдвэрлэсэн бага оврын эко таван автобус явуулж, иргэдэд үнэгүй үйлчлэхээр болсон байна. Уг автобусыг нийслэлийн ЗДТГ-ын захиалгаар “Цахилгаан тээвэр” компанид үйлдвэрлэсэн. J-800 EV маркийн уг автобус 4.6 метр урт, 1.45 метр өргөн, хоёр метр өндөртэй, 12 хүний суудалтай, цагт 80-100 км-ийн хурдтай явах чадалтай юм байна.  Хүй долоон худагт өнгөрсөн онд 5300 машины зогсоол барьсан бол энэ жил 500-г нэмэхээр болж.  Мөн 3000 сандал нэмж, шороон замуудыг асфальт болгохоор  барилгын ажил эхэлжээ. Бие засах газрыг долоогоор нэмж, 31 болгожээ. Төв цэнгэлдэх хүрээлэнд 13.600 сандал шинээр тавьж байгаа гэнэ. 

Хүй долоон худаг хүртэлх 2.4 км, худалдаа, үйлчилгээний талбайнуудыг холбосон 2.7 км автозам тавьж, 500 автомашины зогсоолыг эко хавтангаар хучиж байгаа аж. 

Мөн “Монгол наадам” цогцолборын бүтээн байгуулалттай холбоотойгоор нийслэлийн төсвөөс дөрөв орчим тэрбум төгрөг гаргаж байгаа юм байна.  Наадмын төсөв өнгөрсөн жил 1.5 тэрбум төгрөг байсан бол энэ жил 2.2 тэрбум болсон. Долдугаар сарын 11-ний үдэш Чингисийн талбайд Улаанбаатарын үдэш цэнгүүн зохион байгуулахад Японы компанитай хамтран шинэ технологийн шоу зохион байгуулах өртөг нэмэгдсэн учраас ийм дүн гарчээ. Валютын ханшийн өсөлт ч нөлөөлсөн гэнэ.  

Ч.МӨНХЗУЛ