Category: нийгэм

Зуны улирал эхэлж байгаатай холбогдуулан Туул голын ай сав газарт насанд хүрээгүй хүүхдүүд эцэг, эхийн хараа хяналтгүй гол устай газар зугаалах, иргэд усанд унах, осолдох, бэртэж гэмтэх, амь насаа алдах, архи согтууруулах ундаа хэрэглэснээс эд зүйлээ хулгайд алдах, дээрэм булаалтын гэмт хэрэгт өртөх явдал ихэсдэг. 

Нийслэлийн онцгой байдлын газар, Нийслэлийн цагдаагийн газар хамтран Баянзүрх, Хан-Уул, Сонгинохайрхан дүүргийн нутаг дэвсгэрээр дамжин урсаж байгаа Туул голын ай сав газраар ирэх есдүгээр саырн 10-ныг хүртэл завьт эргүүл ажиллуулж эхэлжээ. Туул голын Хар усан тохойгоос Биокомбинатын гүүр хүртэл Завьт эргүүл маршрутын дагуу ажиллаж байгаа юм.

 Түүнчлэн Нийслэлийн Цагдаагийн газрын мэдээлснээр голын ай сав газарт худалдаа үйлчилгээ эрхэлж байгаа аж ахуйн нэгж, иргэдийн архи согтууруулах ундааны худалдаанд хяналт тавих, илэрсэн зөрчлийг арилгах, хууль тогтоомжийн дагуу арга хэмжээ авах үйл ажиллагааг зохион байгуулах ажээ.

 Мөн голын сав газраас хайрга олборлох, мод бутыг сүйтгэх, ахуйн хэрэгцээнд бэлтгэж ашиглах, голын усанд авто тээврийн хэрэгсэл угаах зэрэг хууль бус үйл ажиллагааг таслан зогсоох зэрэг хэд хэдэн чиглэлээр ажиллаж байна.

Монголын залуучуудын холбоо “Спирт үү, спорт уу” аяныхаа хүрээнд залуусыг спортод элэгтэй болгох, чөлөөт цагийг нь зөв өнгөрөөх мөн залуучуудаа спортын дор нэгдэхийг уриалж 2012 оноос хойш олон үйл ажиллагаануудыг зохион байгуулж байна.

Өнгөрсөн хугацаанд “Баарлуу биш заалруу”, “И юу О юу”, 2014 оныг “Архитай биш тархитай” уриан дор бүхий л үйл ажиллагаагаа зохион байгуулж байгаа бөгөөд МЗХ-оос гарч байгаа бүх үйл ажиллагаа орон даяар тархан давалгаалж  байгаа юм.

Аймгууд “Спирт үү, спорт уу” аяныхаа нээлтийг хийж өглөө эрт гүйх, явган аялалд явах, олон төрөлт спортын тэмцээнийг сум орон нутагтаа зохион байгуулж байгаа юм.

Тэгвэл энэ удаад Улаанбаатар хот дахь Архангай аймгийн залуучуудын холбоо санаачлан “Хамт алхъя-2014” явган аяллыг зохион байгуулах гэж байна. Аялал Драмын театр- Төрхурахын ам- Богд Хан уулын оргил Цэцээ гүн- төрхурахын ам- Улаанбаатар хот Драмын театр гэсэн маршрутын дагуу болох бөгөөд 6-р сарын 28-ны өглөөний 08:00 цагт эхлэх юм байна.

Олон төрлийн тэмцээн уралдаан зохион байгуулагдах бөгөөд аялагч бүр өөрийн төрсөн нутгийнхаа талаар бусадтайгаа хуваалцаж нэгэн өдрийг цэвэр агаарт, спортоор хичээллэж өнгөрүүлэхийг урьж байна. 

Галдан Бошгот хааны 370 жилийн ойд зориулан “Галдан Бошгот хаан” дуулалт жүжгийг Ховд аймгийн Хөгжимт драмын театрын тайзнаа шавь сургалтын дор тавих гэж байна.

“Галдан Бошгот хаан” дуулалт жүжгийн зохиолыг МЗЭ-ийн шагналт Н.Сүхдорж бичиж, хөгжмийн зохиолчоор Төрийн соёрхолт Б.Мөнхболд, ерөнхий найруулагчаар Ардын жүжигчин Б.Мөнхдорж, ерөнхий зураачаар МУСТА Ц.Энхтуяа, бүжиг дэглээчээр МУГЖ А.Даваахүү, удирдаачаар СТА Д.Түвшинсайхан нар ажиллаж байгаа юм.

Дуулалт жүжгийн дууг МУГЖ С.Жавхлан дуулж, клипийг “Hero” энтертайнмент бүтээж байгаа юм.  

Өөрөөр хэлбэл, энэ дуулалт жүжгийг мэргэжлийн чадварлаг уран бүтээлчдийн зөвлөх багаас бүрдсэн шавь сургалтын дор орон нутгийн театрын уран бүтээлчдийн ур чадварыг өсөн нэмэгдүүлэх, шинээр авьяастныг төрүүлэх, удирдлагын менежментийн шинэчлэлт хийхээр төлөвлөжээ.

Үүний зэрэгцээ Монгол түмнийхээ эв нэгдэл, тусгаар тогтнолын төлөө тууштай тэмцэгч, Зүүн гарын эзэнт гүрний хаан Галдан Бошготын үйл хэргийг үнэн мөнөөр нь таниулах, түүний алдар гавьяаг мөнхлөхөөр энэхүү бүтээлийг тавихаар болжээ.

Галдан Бошгот хааны 370 жилийн ойгоор зөвхөн дуулалт жүжиг тавихаас бус баруун бүсийн даншиг наадмыг хийх юм.

Мөн олон улсын хөөмийн гуравдугаар их наадам, “Галдан судлал” эрдэм шинжилгээний олон улсын бага хурал, Өв соёлын наадам гэхчилэн арга хэмжээнүүдийг зохион байгуулах юм. 

БНСУ-ын парламентийн гишүүн Чой Юль, Кан Ги Жун, Пак Ван Жоо, Шин Сун Вум, И Ван Шин тэргүүтэй төлөөлөгчид, Байгаль хамгаалах сангийн удирдлага, “Лотте” их дэлгүүрийн Монгол дахь салбарын захирлуудын хамт Сонгинохайрхан  дүүрэгт айлчиллаа. Тэд энэ үеэр дүүргийн ИТХ-ын дарга Х.Нямбаатартай уулзаж цаашдын харилцан ашигтай хамтын ажиллагаагаа хаашаа чиглүүлэх хийгээд аль аль салбарт хамтран ажиллах боломжтой талаараа ярилцлаа. Мөн дүүргийн тог цахилгаангүй нийт 617 айл өрхөд нарны зайн үүсгүүртэй гэрэл түгээлээ. 

Өнгөрсөн жил тус дүүрэгт БНСУ-ын “Жи Си Эс” төрийн бус байгууллагаас “Хүжийн гал” нэртэй төсөл хэрэгжүүлж эхэлсэн бөгөөд дээрх нарны зайн үүсгүүртэй гэрлийг амьжиргааны түвшин доогуур, гэрэл цахилгаанд холбогдоогүй, сургуулийн насны олон хүүхэдтэй айл өрхүүдэд тарааж эхэлсэн юм. 

Сонирхуулахад, Сонгинохайрхан дүүргийн ИТХ-ын дарга Х.Нямбаатар “Жи Си Эс” төрийн бус байгууллагын Монгол дахь салбарын зөвлөхөөр энэ оны гуравдугаар сараас ажиллаж байгаа юм. 

“Мэргэжилтний 20”, Улаанбаатар их дэлгүүрийн өмнөх автобусны буудлын ойролцоо М:13 – Шархад – III, IV хороолол чиглэлийн автобусанд 25 орчим насны эмэгтэй дайруулж газар дээрээ нас барсан осол гарлаа. Албан бус эх сурвалжийн мэдээлснээр жолооч нь зүүрмэглэсэн байж болзошгүй гэнэ. Ослын шалтгааныг тогтоохоор хуулийн байгууллагынхан ажиллаж байгаа аж.

Иргэнд өмчлүүлэх газрын 52 байршлаас 20 байршлын
хаягийн зургийг баталлаа

НИТХ-ын Тэргүүлэгчид 6 дугаар сарын 26-нд хуралдаж гэр бүлийн
хэрэгцээний зориулалтаар иргэнд өмчлүүлэх 52 байршлаас 20 байршил болон
зуслангийн батлагдсан ерөнхий төлөвлөгөөний дагуу хийсэн эхний таван амны
газрын хаягийн зургийг баталлаа.

Нийслэлийн Иргэдийн Төлөөлөгчдийн хурлын 2013 оны 05 сарын 30
өдрийн 10/39 дугаар тогтоолоор “Гэр бүлийн хэрэгцээний зориулалтаар иргэнд
өмчлүүлэх газрын байршил, хэмжээг тогтоосон бөгөөд эдгээр байршлуудад газар
өмчлөх эрхийг цахимаар олгох шийдвэр өнгөрсөн сард гарсан юм. Нийслэлийн
Ерөнхий төлөвлөгөөний газраас эдгээр байршлуудаас 20 байршилд хаягийн зураг
гаргажээ.  Иргэнд гэр бүлийн хэрэгцээний зориулалтаар өмчлүүлэх газруудад
хаягын зураг гаргаснаар таны өмчлөх газар тодорхой хаягтай болж байгаа юм.

Хаягийн зургийг гаргахдаа УИХ-аас баталсан Хаягжуулалтын тухай
хуулийн дагуу Засгийн газраас гаргасан журмыг үндэслэсэн байна. Журамд хаягжуулахдаа
гудамжны нүүрэн талдаа байршлыг тухайн гудамжны баруун зүүн гар талд сондгой,
тэгш гэсэн дараалсан хувьсах дугаарлалтын аргаар харъяалах газар зүйн нэршил
дотроо дахин давтагдахгүйгээр дугаарлана, гудамжны нүүрэн талдаа бус байршилтай
үл хөдлөх эд хөрөнгийг тухайн орц буюу хаалга нь харсан талын гудамжинд
хамааруулна, хаягжуулсан үл хөдлөх эд хөрөнгийн бүх нэрийг хаалт, хашилтгүй
бичнэ гэх зэргээр стандартуудыг нарийн тусгасан байдаг байна.

Ийнхүү НИТХ-ын Тэргүүлэгчдийн хуралдаанаар гэр бүлийн хэрэгцээний
зориулалтаар иргэнд өмчлүүлэх газрын байршлын хаягийн зураг болон зуслангийн
газрын хаягийн зургийг баталлаа. Батлагдсан хаягийн зургийн дагуу гэр бүлийн
хэрэгцээний зориулалтаар газар өмчлүүлэх 8 дугаар сараас эхлэн зохион байгуулна
гэж Нийслэлийн өмчийн харилцааны газрын дарга Ш.Төмөрбаатар хэллээ. НИТХ-ын
Тэргүүлэгчдийн тогтоолоор баталсан Гэр бүлийн хэрэгцээний зориулалтаар иргэнд
өмчлүүлэх газрын байршлын хаягийн зураг болон  Зуслангийн батлагдсан
ерөнхий төлөвлөгөөний дагуу хийгдсэн эхний 5 амны хаягийн зургийг дэлгэрэнгүй
танилцуулж байна гэж Нийслэлийн Хэвлэл мэдээлэл, олон нийттэй
харилцах хэлтсээс мэдээллээ.

Гэр бүлийн хэрэгцээний зориулалтаар иргэнд
өмчлүүлэх газрын байршлын хаягийн зураг

·        
Баянзүрх дүүргийн 20
дугаар хороонд Их цуурайн ам, 71 га

·        
Баянзүрх дүүргийн 20
дугаар хороонд Бага цуурайн ам, 49 га

·        
Баянзүрх дүүргийн 9, 24
дүгээр хороонд Баруун цагаан давааны урд ам, 25 га

·        
Баянзүрх дүүргийн 20
дугаар хороонд Хадатын ам, 87 га

·        
Хан-Уул дүүргийн 12, 13
дугаар хороонд Эрдэнэтолгой, 155 га

·        
Сонгинохайрхан дүүргийн
32 дугаар хороонд Эмээлт уулын баруун хоолой, 565 га

·        
Сонгинохайрхан дүүргийн
32 дугаар хороонд Эмээлтийн дөрөлж, 180 га

·        
Сонгинохайрхан дүүргийн
32 дугаар хороонд Шар хөв, 76 га

·        
Сонгинохайрхан дүүргийн
32 дугаар хороонд Түрүүний хөндий, 227 га

·        
Сонгинохайрхан дүүргийн
22 дугаар хороонд Тахилтын хөндий, 184 га

·        
Сонгинохайрхан дүүргийн
21 дүгээр хороонд Долоон худгийн хөндий, 71 га

·        
Сонгинохайрхан дүүргийн
21 дүгээр хороонд Соёондын ам, 517 га

·        
Сонгинохайрхан дүүргийн
21 дүгээр хороонд Өндөр хаан уул, 69 га

·        
Сонгинохайрхан дүүргийн
21 дүгээр хороонд Цагаан чулуут, 576 га

·        
Баянзүрх дүүргийн 20
дугаар хороонд Хожуулын ам, 166 га

·        
Сүхбаатар дүүргийн 16
дугаар хороонд Тоосгоны 1-р хэсэг, 64 га

·        
Сүхбаатар дүүргийн 16
дугаар хороонд Тоосгоны 2-р хэсэг, 64 га

·        
Багануур дүүргийн 4
дүгээр хороонд Тариан булгийн 1-р хэсэг, 526 га

·        
Багануур дүүргийн 4
дүгээр хороонд Тариан булгийн 2-р хэсэг, 376 га

·        
Багахангай дүүргийн 2
дугаар хороонд Бор үзүүр,160 га  

Зуслангийн батлагдсан ерөнхий төлөвлөгөөний
дагуу хийсэн эхний 5 амны хаягийн зураг

·        
Сүхбаатар дүүргийн 15
дугаар хорооны Ар хустай,

·        
Сүхбаатар дүүргийн 20
дугаар хорооны Цолмон,

·        
Сүхбаатар дүүргийн 20
дугаар хороо Цээнэ,

·        
Чингэлтэй дүүргийн 19
дүгээр хорооны Жигжид,

·        
Чингэлтэй дүүргийн 19
дүгээр хорооны Яргайт,

Урт нэртэй хуулийг хэрэгжүүлэхийг шаардан галт зэвсэг, тэсрэх бөмбөгтэй жагсаал зохион байгуулсан гэх “Гал үндэстэн” холбооны гишүүдийн хэргийг өнөөдөр Улсын дээд шүүхэд хэлэлцэн шийдээ гаргалаа. Нийслэлийн давж заалдах шатны шүүхээс “Гал үндэстэн” холбооны тэргүүн Ц.Мөнхбаярт долоон жил, Г.Болдбаатарт 6.11 жил, Д.Төмөрбаатарт 10.6 жил, Ж.Ганболдод нэг жилийн хорих ял, н.Дашцэрэн хоёр жилийн хорих ял тус тус оноосон байсан бөгөөд Улсын дээд шүүхээс ийн ногдуулсан ялыг хэвээр үлдээх нь зүйтэй хэмээн шийдвэрлэсэн байна.

Долдугаар Манзушир хутагт Данзанжамъяндорж төрөлх аймагтаа 2014 оны 06 сарын 28-нд морилон  ирж төрөлх нутгийн сүсэгтэн олондоо адис жанлаваа хайрлахаар болжээ.

Үүнтэй холбогдуулан аймгийн Засаг даргын 323 дугаар захирамжийн дагуу байгуулагдсан ажлын хэсэг 06 сарын 24-ны мягмар гарагт хуралдсан юм. Хуралдаанаар түүнийг хүлээн авах бэлтгэл ажил, сүсэгтэн олонтой уулзаж адис жанлав хайрлах хөтөлбөрийн тухай ярилцжээ. Данзанжамяндорж хутагт хамгийн эхлээд Дашчойнхорлон хийдийг зорих гэнэ. Үүний дараагаар Манзуширын ам руу очих юм байна. Ингээд Спортын ордонд  11 цагийн үед сүсэгтэн олныг  хүлээн авч уулзаад  зон олныхоо буян заяаг ерөөж ном унших ажээ.

Дашчойнхорлон хийдийн бага гэсгүй Д.Дашням Манзушир хутагтын тухай хэлэхдээ, ”Дээрхийн Гэгээнтэн есдүгээр Богд: Зургадугаар Манзушир хутагт Цэрэндорж ламтны бодитой хувилгаан дүр нь Манзушир хутагт Данзанжамъяандорж эндүүрэлгүй мөн болно” гэсэн утга бүхий батламж бичгийг айлдсанаар түүнд дээдийн олон ном буулгасан юм. Улмаар 2010 онд Энэтхэг орныг зорьж бурханы ном заалгах болсон хэмээв. Хутагтыг хүлээж авах ажлын хэсгийн ахлагч С.Цогбаяр,  Данзанжамъяндорж хутагтад аймаг орон нутгийнхаа хөгжил дэвшил, ард иргэдийнхээ ахуй амьдралыг даатгах тул сүсэгтэн олныг өргөнөөр хүрэлцэн ирэхийг уриаллаа.

Уран уургач, бугуйлч, эмнэг булгиулалтын 2014 оны Монгол Улсын аварга шалгаруулах тэмцээн наймдугаар сарын 1-3-нд Увс аймагт болно.

Залуу үеийнхэн мал аж ахуйгаас хөндийрөх, уламжлалт ахуй, соёлоо гээх хандлага гарах болсон 1980-аад оноос адууг уургалах, бугуйлдах, эмнэг хангал бугуйлдах, хазаар, ногт, эмээл, түүний хэрэгсэл, уурга, бугуйлаа бэлтгэж уралдаан, тэмцээний төрөлд оруулах хөдөлгөөн өрнөж байсан юм. Энэ үед сум, аймаг, хот, улсын аварга шалгаруулах тэмцээнийг зохион байгуулах шийдвэрийг Батлан хамгаалах туслах нийгэмлэгийн төв зөвлөл /БХТНТЗ/-ийн анх санаачилж уг тэмцээнийг Булган аймгийн Могод суманд 1989 онд зохион байгуулж байсан түүхтэй.

Уран уургач, бугуйлч, эмнэг булгиулалтын тамирчид 1989 оноос жил бүр улсын аварга шалгаруулах тэмцээнд оролцож байна. УАШТ-нд түрүүлсэн тамирчдад алт, мөнгө, хүрэл медаль, улсын уран уургач, бугуйлч, шилдэг булгиулагч цол олгож ирсэн. Одоогийн байдлаар уургач, бугуйлч, эмнэг булгиулалтын төрлөөр спортын мастер 25, дэд мастер 10 тамирчин хүртээд байна.

Монгол Улсын “Баянгол” эмнэлэг үр шилжүүлэн суулгах лабораториор 2011 оноос хойш 16 эхээс 19 хүүхдийг амжилттай төрүүлсэн бол одоо 20 гаруй эмэгтэй ээж болох бэлтгэлээ базааж байна.

Манай улсад үр шилжүүлэн суулгах оношилгоо, эмчилгээ хийдэг хувийн хэвшлийн “Баянгол”, “Анухай” гэсэн хоёр эмнэлэг байгаа юм. Тэд үр шилжүүлэн суулгах шаардлагатай хүмүүсийн 20 хувьд  хүрч үйлчилж байна. Харин цөөнгүй эмэгтэйчүүд БНСУ, Тайландад үр шилжүүлэн суулгуулж байгаа юм. “Баянгол” эмнэлэгт үр шилжүүлэн суулгуулсан нэгэн эх энэ сарын 22-нд Сэлэнгэ аймгийн Нэгдсэн эмнэлэгт эсэн мэнд амаржлаа. Хорвоод дөнгөж мэндэлсэн хүүгийн биеийн байдал сайн, 3.8 килограмм жинтэй төржээ. Харин эх орондоо үр шилжүүлэн суулгах аргаар төрсөн 19 хүүхдийн дунд эмэгтэй эрэгтэй хоёр ихэр нэг, гурван ихэр нэг байна.