Category: гадаад

Умард Солонгосын удирдагч Ким Чен Уны  дотны нөхөр гэгддэг
Америкийн нэрт сагсан бөмбөгч Деннис Родман “DuJour” сэтгүүлд
ярилцлага өгчээ. Тэрбээр
ярилцлагадаа Ким Чен Ун хүргэн ах Чан Сун Тэкийг
цаазлаагүй гэсэн нь олныг
шуугиулаад байна. “Би Чан Сун Тэкийг нүдээр харсан. Тэр миний хажууд зогсч
байсан” гэжээ. Умард Солонгосын удирдагч Ким Чен Ун энэ оны нэгдүгээр
сард өөрийн авга эгчийн нөхөр Чан Сун Тэкийг хэрцгийгээр цаазалсан мэдээ олон
улсын хэвлэл мэдээллээр хэсэгтээ шуугиулсан билээ. Умардын Засгийн газрын мэдээллийн агентлаг ч эл мэдээллийг албан ёсоор зарласан.
Мөн түүнийг Засгийн газрын ордноос баривчлаад явж буй зургийг ч нийтэлж байсан.
Ким Чен Ун хүргэн ахаа 100 гаруй өлсгөлөн нохдод бариулсан гэдэг. Харин энэ
бүгдийг сагсан бөмбөгчин Д.Родман няцаажээ. Мөн үүний зэрэгцээ тэрээр Пхеньянд хамт очсон “NBA”-ийн тоглогчид  тус бүр
30,000-35,000 ам.долларыг Хойд Солонгост төлсөн гэдгийг ч мэдээлжээ.

Э.Номин 

Өнгөрсөн баасан гаригт Одесс хотын төв талбай дээр Украины эрх баригчдыг
дэмжигчид цуглаан зохион байгуулсан билээ. Гэтэл Оросыг дэмжигчид тэдэн рүү дайрахад
хөлбөмбөгийн “Черноморц”, “Металлист” багийн шүтэн бишрэгчид жагсагчдыг хамгаалан
халз тулсан байна. Ийнхүү хэдэн зуун хүн оролцсон мөргөлдөөн гарсан юм. Энэ үеэр
Оросын талыг дэмжигчдийн эзэлж авсан Үйлдвэрчний эвлэлийн байр руу тэсрэх бодис
шидсэнээс түймэр гарч, дотор нь байсан хүмүүс түлэгдэж нас баржээ. Одесст үүссэн
эмх замбараагүй байдлын улмаас нийтдээ 46 хүн нас барж, 200-гаад хүн шархадсан гэнэ.
Ийнхүү байдал нэлээд ээдрээтэй байгаа тул Украины парламентаас  Ерөнхий сайд А.Яценюкийг Одесс руу явуулж нөхцөл
байдалтай газар дээр нь танилцахыг үүрэг болгожээ.

Засгийн газрын тэргүүн уржигдар тус хотод хүрэлцэн очиж албаны хүмүүстэй
ярилцаж хэргийн байдалтай танилцав. Тэрээр ийм явдал болсонд хамгийн түрүүнд хүчний
байгууллагыг буруутгаад мөргөлдөөнийг таслан зогсоохын тулд ямар ч арга хэмжээ аваагүй
хэмээн шүүмжлэв.  Хамгийн гол нь Оросын талыг
дэмжигчид энэ бүхнийг өдөөн хатгасан гэдгийг ч онцолсон байна. Засгийн газрын тэргүүн
уг хэргийг шалгах тусгай ажлын хэсэг байгуулж, Одесс хотын хүчний байгууллага болон
Дотоод хэргийн газрын удирдлагуудыг ажил үүрэгтээ хариуцлагагүй хандсан хэмээн огцруулах
шийдвэр гаргажээ. Түүнээс гадна энэ бүхнийг зохион байгуулахад оролцсон  хүмүүсийг олж тогтоохыг үүрэг болгосон байна.

Украины эрх баригчид уг хэргийг шалгах ажлыг  эхлүүлчихээд байгаа юм.  Аюулгүй байдлын албанаас энэ хэрэгт холбогдсон
127 хүнийг баривчилсан байна. Гэтэл уржигдар тус хотын Цагдаагийн газрын үүдэнд
Оросыг дэмжигч болох хэдэн зуун хүн эсэргүүцлээ илэрхийлэхээр цугларчээ. Цагдаа
нар дахин эмх замбараагүй байдал үүсэхээс сэргийлэн баривчлагдсан 67 хүнийг сулласан
байна.   Хотын цагдаагийн газраас Прокурорын
газраас зөвшөөрсний дагуу эдгээр хүмүүсийг сулласан хэмээн мэдэгджээ. Гэвч Прокурорын
газраас ямар ч зөвшөөрөл олгоогүй гэсэн тайлбар өгсөн. Украины Дотоод хэргийн сайд
А.Аваков энэ бүхэнд Одесс хотын Прокурорын газрыг буруутгаж байгаа юм. Эрх баригчид
нөхцөл байдлыг хяналтдаа байлгахын тулд өчигдөр Одесс руу “Киев-1” тусгай ангийг
илгээсэн байна.

Ийнхүү тус улсын зүүн нутагт байдал ээдрээтэй хэвээр байна. Сүүлийн
өдрүүдэд зөвхөн Одесст төдийгүй хэд хэдэн хотод эмх замбараагүй байдал үүсээд байгаа.
Хамгийн сүүлд авсан мэдээллээр Славянск хотноо ойрын хэдэн цагт дахин цэргийн тусгай
ажиллагаа явуулж Оросын талын дэмжигчдээс цэвэрлэх гэнэ. 

Сенатын гишүүн Жон
Маккейн АНУ-аас Укрианд 100 сая ам.долларын тусламж үзүүлэхээр ажиллаж
байгаа тухай
мэдэгдсэн байна. АНУ-ын Сенатын гишүүн үүнтэй холбогдуулан тусгай хууль
боловсруулж өргөн барихаар ажиллаж байгаа гэнэ. 
Ийнхүү Украины батлан хамгаалах салбарыг дэмжих аж.  Ж.Маккейн энэ
талаар ярихдаа “Ингэснээр  ОХУ Украин зүүн эсвэл өмнөд нутгийг эзлэхийг
завдваас хариуг барих болно гэдгийг В.Путинд харуулах юм” гэжээ.

АНУ-ын Оклахома мужийн
газар нутагт нэлээд хэдэн газар ойн түймэр гарчээ. Үүний улмаас хэдэн арван
байшин шатаж нийтдээ 1.5 мянган га газарт шатаж байгаа гэнэ. Гатри хотын
ойролцоох ойн түймэр хүчтэй салхитай байгаагаас хурдтай тархаж байгаа тухай
мэдээллээ.

Ю.Дэлгэр

Өмнөд Солонгосын “Sewol”
хөлөг онгоцы осолдсоы улмаас нас барагсдын оо 242-т хүрээд байна.  Тус улсын Засгий газрын дэргэдэх шуурхай
штабаас мэдэгдсэнээр өчигдөр шумбагчид усан онгоц дотроос зургаас хүний цогцсыг
гаргаж ирсэн байна. Ийнхүү нас барагсдын тоо 242-т хүрлээ.

Ю.Дэлгэр

Украины өмнөд хэсгийн Одесс хотод орон нутгийн цагаар энэ сарын 2-ны өдөр Киевийг дэмжигчид болон Оросыг дэмжигч иргэдийн хооронд мөргөлдөөн гарч 40 гаруй хүн амиа алдсан тухай ОХУ-ын “ИТАР-ТАСС” агентлаг уламжлав. 

Энэ өдөр Украины Үндэсний үзэлт “Правийн сектор” бүлэглэлийн гишүүд Одесс хотын төвд Оросыг дэмжигч, салан тусгаарлах үзэлтэн иргэдийн байрлаж байсан “Үйлдвэрчний эвлэл”-ийн байрыг галдан шатаасны улмаас Оросыг дэмжигч 38 иргэн амиа алдсан байна. Тус улсын Дотоод хэргийн яам болон Одесс хотын захиргаанаас мэдээлж буйгаар 30 хүн утаанд хордож, найман хүн цонхоор үсрэн амь үрэгдсэн аж. Мөн цагдаагийн 50 гаруй ажилтан гэмтэж бэртэв. Цагдаа болон Дотоод хэргийн яамнаас амь үрэгдэгсдийн тоог харилцан зөрүүтэй мэдэгдэж байгаа юм. Засгийн газрыг дэмжигч иргэд “Үйлдвэрчний эвлэл”-ийн барилга руу шатамхай бодис бүхий лонх шидсэн нь гал гарах эх үүсвэр болсон гэж “ИТАР-ТАСС” агентлаг мэдээлж байна. Гал гарахаас өмнө буюу мөн өдрийн үд дунд Одесс хотын төвд Киевийн Засгийн газрыг дэмжигч болон Оросыг дэмжигч иргэдийн хооронд мөргөлдөөн болж дөрвөн хүн амиа алдаж 30 гаруй хүн шархадсан юм. Дөрвөн хүн амь үрэгдсэний гурав нь бууны суманд амиа алдсан аж.