Далай ламыг Норвеги улсад зочлоход тус улсын Засгийн газрын төлөөлөгчид хүлээн авч уулзаагүй талаар Ерөнхий сайд нь тайлбар хийв.
Ерөнхий сайд Эрна Солберг энэ сарын 9-ний өдөр орон нутгийн “NRK” телевизэд ярилцлага өгөх үеэрээ, “Бид өнгөрсөн дөрвөн жилийн турш Хятад улстай улс төрийн ямар нэг харилцаагүй байж ирсэн. Улмаар байгаль, цаг уурын өөрчлөлт, хүний эрхийн зэрэг асуудлаар тус улстай яриа хэлцээ хийх боломжгүй байна” гэж хэлэв. Тиймээс Хятадтай харилцах, ярилцах асуудал чухал байгааг тус улсад харуулахын тулд зайлшгүй золиос гаргах хэрэгтэй байсан гэж тэрээр тайлбарлав. Далай лам энэ сарын 7-9-ний өдрүүдэд Норвеги улсад зочлох үед түүнтэй тус улсын улс төрийн ямар ч төлөөлөгч уулзаагүй аж. Далай ламыг өмнө нь 2000 онд Норвеги улсад айлчлахад тус улсын эзэн хаан, ерөнхий сайд нар хүлээн авч уулзаж байсан ба 2005 онд мөн Ерөнхий сайд хүлээн авч уулзаж байсан юм. Харин Хятад улс 2010 онд хүний эрхийн төлөө тэмцэгч Лю Сяобог Нобелийн шагналд нэр дэвшүүлснээс хойш Норвеги улстай улс төрийн дээд хэмжээний харилцаагаа зогсоож, Норвегиос загас импортлохоо зогсоох зэрэг хориг арга хэмжээ авч эхэлсэн юм. Түүнчлэн Хятад улс хоёр улсын харилцааг сэргээхийн тулд тус улсын дотоод тогтолцооны эсрэг хүмүүст Нобелийн шагнал өгөхгүй байхыг шаардаад байсан билээ. Нобелийн шагналын комисс нь хэдийгээр улс төрөөс хамааралгүй байгууллага боловч комиссын таван гишүүнийг Норвегийн парламентаас томилдог байна.
Нигер дахь “Боко Харам” хэмээх лалын бүлгийнхэн 200 охидыг хулгайлсан хэрэг өнгөрсөн дөрөвдүгээр сарын 14-нд гарсан билээ. Тэднийг хаана барьцаалсан тухай тодорхой мэдээлэл одоо болтол байхгүй байгаа. Нигерийн Борно мужийн захирагч охидуудын байгаа талаар мэдээлэл авсан хэмээн ВВС-д мэдээлжээ. Тиймээс үүнийг шалгуулахаар цэргийнхэнд мэдэгдсэн байна. Ямар ч байсан барьцаалагсад нь Нигерт байгаа гэдэг нь тодорхой аж. 
Украины Донецк, Луганск мужуудад тус бүс нутаг нь цаашид бүгд найрамдах улс болох эсэх талаар өчигдөр бүх нийтийн санал асуулга явуулсан байна. Донецк мужийн Сонгуулийн төв хорооны тэргүүний мэдэгдсэнээр саналын хуудсыг харьцангуй тоолсон аж. Санал хураалтанд оролцогсдын 89.7 хувь нь тусгаар улс байгуулах хүсэлтэйгээ илэрхийлжээ. Харин Луганск мужид болсон санал хураалтын дүнг өнөөдөр тус мужийн нийслэлд болох цуглаан дээр зарлах гэнэ.
Кантри дуучин Тэйлор Свифт “Teen Vogue” сэтгүүлд 15-21 насны охидад зориулсан хувцасны шинэ брэнд гаргахаар болсон тухайгаа ярьжээ. Дуучин бүсгүй ярилцлагынхаа үеэр Леди Гага, Кейти Перри, Рианна болон Майли Сайрусын хувцаслалтыг өсвөр үеийнхэнд буруу үлгэр дуурайлал үзүүлж, хэтэрхий задгай хувцсыг сурталчилж байна хэмээн буруутгасан тухай “Hollywood.com” мэдээллээ.
Ирэх зургадугаар сарын 6-нд холбоотны цэргүүд Францын Нормандад буусны 70 жилийн ой тохионо. Дэлхийн II дайны үеэр баруун фронтыг нээж, баруун Европыг фашист Германаас чөлөөлөх тулаан болсон энэ өдрийг жил бүр тэмдэглэдэг уламжлалтай. Түүхэн ойн арга хэмжээнд олон орны төр засгийн тэргүүнүүдийг урьж оролцуулдаг. Сүүлийн үед Украины асуудлаас АНУ болон барууныхан ОХУ-тай түнжин хагараад буй. Харин дээрх арга хэмжээ нь уг харилцаанд нааштай хандлагыг оруулах бололтой. ОХУ-ын Ерөнхийлөгч В.Путин Францын Ерөнхийлөгчийн урилгыг хүлээн авсан талаар хэвлэлийн төлөөлөгч нь мэдээлжээ. Мөн тус арга хэмжээнд АНУ-ын Ерөнхийлөгч Б.Обама оролцохоо мэдэгдсэн ч Оросын төрийн тэргүүнтэй тусгайлан уулзахгүй гэдгээ онцолжээ. Ямартай ч Оросын хувьд Украины асуудлаас хойш барууны түншүүдтэйгээ нүүр тулах анхны уулзалт болох юм. Крымийг Орост нэгтгэх тухай санал асуулгаар нутгийн оршин суугчид ОХУ-ын бүрэлдэхүүнд орох хүсэлтэйгээ илэрхийлж байсан. Украины зүүн нутагт байдал тогтворгүй байгаа бөгөөд Оросыг дэмжигчид болон эсэргүүцэгчдийн хооронд мөргөлдөөн үргэлжилсээр байна. Мөн АНУ болон Европын холбооны зүгээс ОХУ-ын зарим хариуцлагатай ажилтныг хар жагсаалтад оруулан гадаад дахь дансыг нь хаасан юм. Түүхийг сөхвөл 1944 оны зургадугаар сарын 6-нд АНУ, Их Британи, Канадын 156 мянган цэрэг генерал Д.Эйзенхауэрийн удирдлага дор Францын баруун хойд хэсэгт орших Нормандад буусан нь түүхэндээ хамгийн олон цэргийг ийн буулгасан хэмээн тэмдэглэн үлджээ. 
