Category: гадаад

Тайландад үүсээд буй улс төрийн тогтворгүй байдлын улмаас тус улсын арми 2014 оны 5 дугаар сарын 20-ны өдөр улс орон даяар цэрэг дайны онц байдал зарлажээ.
Иймд манай иргэд тус улсад зорчихдоо олон нийт цугласан газар очихоос зайлсхийх, туйлын сонор сэрэмжтэй байж, хууль сахиулах байгууллагуудын зөвлөмжийг чанд мөрдөхийг зөвлөж байна.
Шаардлагатай тохиолдолд Монгол Улсаас Тайландын Вант Улсад суугаа ЭСЯ-нд хандана уу.

ЭСЯ-ны утас: 66-2-381-1400, 02-392-1011,
Цахим шуудан: bangkok@mfa.gov.mn
Хаяг: Embassy of Mongolia, 100/3 Soi Ekkamai 22, Sukhumvit 63, Klongton Nua, Wattana, Bangkok 10110

Оросын “Газпром”, Хятадын CNPC компанид хий нийлүүлэхээр болж энэ тухай гэрээнд гарын үсэг зурлаа. Хоёр улсын төрийн тэргүүнүүд уг гэрээнд гарын үсэг зурах ёслолд оролцсон тухай Интерфакс уламжилсан байна. Оросын “Газпром” 30 жилийн хугацаанд 30 тэрбум куб метр хийг Хятадын CNPC-д хий нийлүүлэхээр боллоо. 

Уг гэрээ нь 400 тэрбум ам.доллараар үнэлэгдсэн бөгөөд “Газпром” компанийн түүхэн дэх хамгийн том гэрээ хэмээн тус компанийн тэргүүн А.Миллер мэдэгджээ.

Ю.ДЭЛГЭР

Нигерийн Джос хотод хоёр удаа хүчтэй дэлбэрэлт болсны улмаас доод тал нь 118 хүн нас барж, 50-иад хүнд гэмтэж бэртсэн тухай мэдээллээ. Эхний бөмбөг  захын хажууханд, хоёр дахь нь эмнэлгийн ойролцоо дэлбэрсэн байна. Орон нутгийн засаг захиргаанаас нас барагсдын дийлэнх нь эмэгтэйчүүд хэмээн мэдээлэв. Одоогоор хэргийн хариуцлагыг хэн ч хүлээгээгүй байна. Нигерийн эрх баригчдын үзэж байгаагаар энэ нь “Боко Харам” лалын бүлгийн зохион байгуулсан ажиллагаа аж. Тус хотод өмнө нь нэлээд хэдэн удаа лалын болон христосын шашинтнуудын хооронд мөргөлдөөн гарч байсан юм.

Ю.ДЭЛГЭР

Хятадын Хөбэй мужийн Маченг хотод нэгэн этгээд сургуулийн сурагчид руу хутга барин дайрсан хэрэг гарчээ. Үүний улмаас найман хүүхэд бэртсэн авсан тухай мэдээллээ. Бага ангийн сурагчдыг хичээлээ тараад явж байхад нь халдлага болсон байна. Хохирогсод нь нэг, хоёрдугаар ангийн хүүхдүүд аж. Энэ хэрэгт 35 настай Чэн Цуйхан гэгчийг сэжиглэж байгаа гэнэ. 

Ю.ДЭЛГЭР

БНХАУ–ын Шанхай хотноо өнөөдөр /V.20/ Азид хамтын ажиллагаа, итгэлцлийг бэхжүүлэх Бага хурлын /АХАИББХ/ Дээд хэмжээний дөрөвдүгээр уулзалт эхэлж байна. АХАИББХ нь бүс нутагт нүүрлэж буй аюул заналхийлэл, эдийн засаг, байгаль орчин, хүний эрхийн асуудалд анхаарал хандуулан авч хэлэлцэх юм байна. Дээд хэмжээний уулзалтын үеэр  олон улсын тулгамдсан асуудлуудаар АХАИББХ-ын гишүүн орнуудын байр суурийг илэрхийлсэн төгсгөлийн баримт бичиг-Тунхаглалыг батлан гаргах аж.  Тунхаглалын төсөлд манай улсын цөмийн зэвсэггүй статусыг бататган бэхжүүлэх, далайд гарцгүй хөгжиж буй орнуудын судалгааны төвийн тухай болон Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” санаачлагын тухай заалтууд тусгагдсан байна. Бага хурлын Дээд хэмжээний уулзалтанд манай улсын Ерөнхийлөгч Ц.Элбэгдорж, хөрш Хятад, ОХУ-ын төрийн тэргүүнүүд болон АХАИББХ-ын гишүүн 20 гаруй орны албаныхан оролцож байгаа юм. Ерөнхийлөгч Ц.Элбэгдорж өчигдөр Хятадын дарга Си Жинпинтэй уулзсан бол өнөөдөр ОХУ-ын Ерөнхийлөгч Владимир Путинтэй уулзана. 

Дэлхийн эрүүл мэндийн 67 дугаар ассамблей Швейцарийн Холбооны Улсын Женев хотноо өчигдөр эхэллээ.

Гишүүн 194 улсын төлөөлөгч нараас гадна НҮБ-ын бусад төрөлжсөн агентлагууд, олон улсын төрийн бус байгууллагууд болон ажиглагчдаас бүрдсэн 3000 гаруй төлөөлөгчид энэ удаагийн ассамблейд оролцож байгаа ажээ. Энэ жилийн хувьд нэгдсэн чуулганы хэлэлцүүлэг “Уур амьсгал ба эрүүл мэнд” гэсэн үндсэн сэдэвтэй байх бөгөөд улс орнуудын төлөөлөгчдийн тэргүүн нар эл сэдвээр үг хэлэх аж.

 Ассамблей дэгийн дагуу Ерөнхийлөгч, Дэд ерөнхийлөгч нарыг сонгосноор эхэлсэн байна. Энэ жилийн 67 дугаар ассамблейн Ерөнхийлөгчөөр Кубын Нийгмийн эрүүл мэндийн сайд Др.Роберто Моралес Охедаг сонгосон бол үлдсэн таван бүсийн төлөөлөл болох Фижи, Бахрейн, Литви, Конго, Шри Ланка улсаас тус тус Дэд ерөнхийлөгч нарыг сонгосон байна. Харин ассамблейн А хорооны даргаар Австрали улс, Б хорооны даргаар Уганда улсын төлөөлөгч сонгогджээ.

 Дэлхийн эрүүл мэндийн 67 дугаар ассамблей тавдугаар сарын 24-ний өдрийг дуустал үргэлжлэх ба дээрх чуулганд Монгол Улсын Засгийн газрыг төлөөлж Эрүүл мэндийн сайд Др. Н.Удвал, Эрүүл мэндийн яамны Хяналт-шинжилгээ, үнэлгээ, дотоод аудитын газрын дарга С.Төгсдэлгэр нар оролцож байна.

Тайландад хэдэн сарын турш улс төрийн эмх замбараагүй байдал үргэлжилж байгаа. Үүний хариу болгож тус улсын арми дайны онц байдал зарлав.  Армийн удирдлагууд дайны онц байдал зарласнаа  “Улс оронд эмх журам тогтоох зорилготой. Бид төрийн эргэлт хийгээгүй” гэж  тайлбарлаж байна. Армийн удирдлагууд дайны онц байдал зарлахаа Засгийн газарт мэдэгдээгүй гэж тус улсын удирдлагууд мэдэгджээ. Армийн хэвлэлийн төлөөлөгч “Бүх юм урьдын хэвээр байгаа бөгөөд Арми зөвхөн улс орны аюулгүй байдлын асуудлыг хяналтандаа авсан. Засгийн газар төрийн эрхийг хэвээр барьж байгаа” гэж мэдэгджээ. Цэргүүд телевизүүдийг хяналтандаа авсан байна. 

Дэлхийн хамгийн олон хэрэглэгчтэй нийгмийн сүлжээний фейсбүүк БНХАУ-д борлуулалтын салбараа нээхээр төлөвлөж байгаа аж.  Фейсбүүк БНХАУ-д хязгаарлагдмал байдлаар ашиглагддаг юм. Гэвч  орон нутгийн зар сурталчилгааны байгууллагуудтай хамтран ажиллахын тулд тус компанийн зүгээс ийм шийдвэр гаргахаар болжээ. 

 Фейсбүүкийн борлуулалтын салбар энэ оны сүүлчээр Бээжингийн бизнесийн дүүрэгт нээгдэж магадгүй гэсэн мэдээлэл ч байнаэ. 

 Тус компани БНХАУ дахь үйл ажиллагаагаа илүү нээлттэй болгох хүрээнд өнгөрсөн есдүгээр сард тус улсын Засгийн газрын төлөөлөлтэй хоригийн талаар ярилцжээ.

Фейсбүүкийн хувь нийлүүлэгчдийн нэгдлийн дэд тэргүүн Воган Смит  “Бид Хятадад нэвтрэх боломжуудыг судалж байна. Гэхдээ яг хэзээ салбараа нээх талаар тодорхойгүй байгаа” хэмээн “Ройтерс”-т ярилцлага өгөхдөө онцолжээ. 

Бүгд Найрамдах Турк Гадаад хэргийн сайд Ахмет Давутолу Монгол Улсад айлчлахаар болсон байв.  Гэтэл энэ сарын 13-нд Сома хотын далд уурхайд дэлбэрэлт болсон учраас тэрээр айлчлалаа хойшлуулжээ.
Энэхүү дэлбэрэлтийн улмаас одоогийн байдлаар 301 хүн амь насаа алджээ. Үүнээс гадна  газар дор аврал эрсэн 400-гаад иргэн байгаа юм байна. Иймээс тус улс осол болсноос хойш гурван  өдрийн турш Турк улсад гашуудал  зарлаж төрийн дээд албан тушаалтнууд гадаад дахь айлчлалаа цуцлаад байгаа аж.

М.Ундрам

ОХУ-ын Эрхүү мужид ойн түймэр гарсаны улмаас онц байдал тогтоожээ. Тус мужийн  захирагч С.Ерошенко ийм шийдвэр гаргасан тухайгаа мэдэгдлээ. Эрхүүгийн Железногорске-Илимск, Дальний Нижнеилимске газруудад түймэр гарснаас хот, тосгодыг  тэр чигээр нь үгүй хийх аюултай байгаа гэнэ. Тиймээс оршин суугчдийг нь яаралтай нүүлгэж шилжүүлсэн байна.