“Форбес” сэтгүүлээс 2004 оноос эхлэн жил бүр дэлхийн хамгийн нөлөө бүхий 100 эмэгтэйн жагсаалтыг гаргаж ирсэн. Өнгөрсөн жил тэргүүн байрт жагсч байсан ХБНГУ-ын Канцлер Ангела Меркель энэ удаад ч байраа хадгалан үлджээ. Тэрбээр энэхүү жагсаалтыг гаргасан цагаас нийт есөн удаа нэр нь бичигдсэн бөгөөд наймд нь дандаа тэргүүлж байв.
2010 онд АНУ-ын тэргүүн хатагтай Мишель Обама түүний өмнө гарч байсан удаатай. Харин энэ удаагийн жагсаалтад М.Обама наймдугаарт бичигджээ. Форбес сэтгүүлийн жагсаалтаар хоёрдугаарт АНУ-ын Төв банкийг удирдаж байсан Ж.Йеллен орсон бол удаахь байранд “Майкрософт” компанийг үндэслэгч Билл Гейтсийн гэргий Мелинда Гейтс оржээ. Энэхүү жагсаалтад есөн төрийн тэргүүн, 28 корпорацийн удирдагч, мөн 81 тэрбум ам.доллараас дээш хөрөнгөтэй 13 тэрбумтан эмэгтэй багтсан байна. Хамгийн залуу нь Леди Гага (28 нас) 67 дугаарт бичигдсэн бол хамгийн өндөр настай нь Их Британийн хатан хаан Элизабета II. Өдгөө тэрбээр 88 настай бөгөөд жагсаалтын 35 дугаарт багтжээ. Нийт 250 нэр дэвшигчдээс найман шалгуураар шалгаруулдаг уламжлалтай юм байна. Ингэхдээ тухайн нэр дэвшигчийн хөрөнгө, хэвлэлд хэдэн удаа гарсан байдал болон өөрийн салбартаа хэр нөлөөтэй зэргийг гол шалгуураа болгодог байна.
Д.Цэрэндолгор
Африкт хүүхдийг гэрлүүлэх явдлыг таслан зогсоохоор нэлээд өргөн хүрээг хамарсан кампанит ажлыг өрнүүлээд байна. Африкин Холбооноос санаачлан зохион байгуулж буй ажлыг удирдах төв нь Эфиопийн нийслэл Аддис-Абебед байрлах гэнэ. Мэргэжилтнүүдийн хийсэн судалгаагаар Африкт насанд хүрээгүй гурван эмэгтэй хүүхдийн нэгийг нь албан хүчээр гэрлүүлдэг аж. Одоогийн байдлаар насанд хүрээгүй байж гэрлэсэн охидын тоо 17 саяд хүрээд байна. 
Өнөөдөр өглөө Хятадын өмнөд нутаг буюу Юнань мужийн Пинюань хэмээх газар Рихтерийн шаталбараар 5.9 магнитудын хүчтэй газар хөдлөлт болсон байна. Мьянмартай хил задгадаг тус нутаг нь 46 сая оршин суугчтай бөгөөд газар хөдлөлтийн төв нь 10 км-ийн гүнд байсан гэнэ. Чухам ямар хэмжээний хохирол учруулсан талаар тодорхой мэдээлэл одоогоор алга.
Орос Украин хоёр хийн өрийн хэсгийг барагдуулах талаар тохиролцсон гэнэ. Энэ талаар ОХУ-ын Эрчим хүчний сайд Александр Новак Берлинд хийгдсэн Орос, Украин Европын холбооны хэлэлцээрийн дүнгээр хийлгэсэн хэвлэлийн бага хурлын үеэр мэдэгджээ. 2.5 тэрбум долларын өр төлөгдөж магадгүй гэнэ. Оросын тал хийн өр төлөгдөж, үнийн талаар тохиролцож чадвал урьдчилсан төлбөрийн системийг Украинд хэрэглэхгүй байх боломжтой гэж салбарын сайд нь онцолжээ. Украины Эрчим хүчний сайд Юрий Проданын мэдэгдэж байгаагаар бол хэлэлцээр дээр тодорхой тохиролцоо хийгдээгүй аж. Украин мянган шоо метр хийг 268 доллараар авах хүсэлтэй байгаа гэнэ. Оросыг Стокгольмын даван заалдах шүүхэд өгнө гэсэн Украйны байр суурь хэвээрээ байгаа бололтой. Европын Эрчим хүчний комиссар Гюнтер Эттингерийн хувьд Украин тавдугаар сарын 29 ба зургадугаар сарын 7-нд хоёр шилжүүлэгээр хийн өрийн хэсгийг төлнө гэж үзэж байна. 
Тайландад цэргийнхэн улсын эрх мэдлийг гартаа аваад байгаа. Энэ хямралаас болж Тайландын эдийн засаг энэ оны эхний хагаст 2.1 хувиар буурсан үзүүлэлттэй гарчээ. Мөн энэ оны эхний дөрвөн сарын байдлаар Тайландаас 400 мянга орчим жуулчин дайжиж, цэргийн дэглэм тогтоосноос хойш визээ цуцлах үзэгдэл огцом нэмэгдсэн байна. Тайландын Аялал жуулчлалын яамнаас мэдээлснээр өнгөрсөн нэгээс дөрөвдүгээр сарын хооронд жуулчдын тоо таван хувиар буурсан аж. Цэргийн эргэлт гарснаар энэ тавдугаар сард жуулчдын тоо 10-12 хувиар буурах төлөвтэй байна. Аялал жуулчлалын салбар Тайландын дотоодын нийт бүтээгдэхүүний есөн хувийг бүрдүүлдэг юм. Өнгөрсөн онд гэхэл энэ салбараасаа 35 тэрбум орчим ам.долларын ашиг олсон гэнэ. Тайландад ирдэг жуулчдын дөрөвний нэгийг Хятад улсын иргэд эзэлдэг байна. Гэвч улс төрийн хямралаас нь болж хятадууд бусад орны жуулчдаас илүүтэй визээ цуцлах болж жуулчдын тоо 19 орчим хувиар буурчээ. 
26 жилийн өмнө Испанийн эртний эдлэлийн дэлгүүрээс олсон 200 ам.доллараар худалдаж авсан уран зураг Сальвадор Далийн бүтээл болохыг шинжээчид тогтоожээ. Энэ зураг алдарт зураачийн анхны сюрреалист бүтээл гэнэ. Уран зураг шинжээчид энэ зургийг анхнаас нь ингэж таамаглаж байсан ч батлах баримт олохгүй байж. Рентген туяагаар шинжилсэний үр дүнд алдарт зураачийнх гэдгийг эргэлзээгүй баталжээ. Зурган дээрх гарын үсэг нь зураачийн хориод онд ашиглаж байсан гарын үсэгтэй нь таарсан байна. 
