Category: гадаад

Бельгийн нийслэл Брюссельд Их долоогийн уулзалт өчигдөр эхэллээ. Сүүлийн 17 жилд анх удаа тус бүлгийнхэн чуулж байна. Оросын эрх баригчид Крымыг бүрэлдэхүүндээ  нэгтгэх болсноо мэдэгдсэн. Үүний дараа Их наймын гишүүн орнууд Оросыг гишүүнчлэлээсээ хасах тухай шийдвэр гаргаж байсан. Тодруулбал, өнгөрсөн гуравдугаар сарын 24-25-ны хооронд Гааг хотноо болсон цөмийн аюулгүй байдлын асуудлаар Их долоо хуралдахдаа ийн шийдсэн. Төлөвлөгөө ёсоор Их наймын уулзалт Сочи хотноо болох байсан ч Крым, Украины асуудлаас үүдэн дээд хэмжээний уулзалтыг Их долоо болгож Брюссельд явуулахаар болсон билээ. Хоёр өдөр үргэлжлэх дээд хэмжээний уулзалтад тэргүүлэгч орны төрийн тэргүүнүүд гадаад бодлого, эдийн засаг, худалдаа болон эрчим хүчний аюулгүй байдлын тухай асуудлаар хэлэлцэнэ. Гэвч энэ удаагийн гол асуудал нь Украины хямрал болон тус улс ОХУ-тай харилцах харилцааны тухай хөндөх аж. АНУ-ын Ерөнхийлөгч Б.Обама Европт хийх айлчлалаа Польшоос эхлүүлсэн. Тэрээр  Варшав хотноо Украины Ерөнхийлөгчийн сонгуульд ялалт байгуулсан П.Порошенкотой уулзсан байна.  Талууд Киевт үзүүлэх эдийн засгийн тусламжийн талаар хэлэлцжээ. Б.Обама, П.Порошенко нар Польшид коммунизм нурж унасны 25 жилийн ойн баярын арга хэмжээнд оролцох үедээ ийн уулзсан аж. Петр Порошенко ирэх ням гаригт Ерөнхийлөгчийн тангаргаа өргөх билээ. Уг ёслолд 20 гаруй орны Ерөнхийлөгч оролцох бөгөөд энэхүү арга хэмжээнд ОХУ-ын төрийн тэргүүнийг уриагүй байна.

Харин ОХУ-ын Ерөнхийлөгч В.Путин энэ долоо хоногт ХБНГУ-ын канцлер А.Меркель, Их Британийн Ерөнхий сайд Д.Кэмерон, Францын Ерөнхийлөгч Ф.Олланд нартай уулзах юм. Тэрээр өнөөдөр Парис хотыг зорих бөгөөд дараа нь Нормандид холбоотны цэрэг буусны 70 жилийн ойн арга хэмжээнд оролцох юм. Ажиглагчдын онцолж буйгаар энэхүү арга хэмжээний үеэр ганцаардаад буй Орос харилцан буулт хийсэн тохиолдолд буцан Их наймд нэгдэх боломжтой ажээ.

Өмнөд Солонгос “газар-агаар” ангиллын алсын тусгалтай “L-SAM” пуужинг бүтээх ажилдаа орсон талаар “Кореа Таймс” сонин өчигдөр мэдээллээ. Түүнийг бүтээхийн тулд дотооддоо ашигладаг “L-SAM” системийг үндэс болгох гэнэ. Тус техник нь  40 км-ээс дээш өндөр дэх пуужинг онох чадалтай байх гэнэ. Уг төсөлд долоон жил зарцуулах бөгөөд 2023 он гэхэд армийн хэрэгцээнд ашиглахаар төлөвлөж байгаа аж. 

Нигерт 200-аад охидыг хулгайлсан “Боко Харам” лалын бүлэг Борно мужийн нэгэн тосгонд хэдэн арван хүнийг буудан хороосон хэрэг гарчээ. Гэрчүүдийн ярьснаар цэргийн дүрэмд хувцастай хүн ирж оршин суугчдыг сүм дээр цугларахыг шаардсан байна. Цугларсаны дараа хүмүүс рүү гал нээхэд оршин суугчид “Боко Харам” бүлэгийнхэн гэдгийг мэджээ. Борно мужийн парламентын парламентын нэгэн гишүүний ярьснаар  тус бүлгийнхэн хөрш зэргэлдээ орших таван  тосгон руу дайрч хүний амь бүрэглгэсэн байна. “Боко Харам”-ийн хулгайлсан 200-аад охидыг одоо болтол олоогүй байгаа билээ.

Египетийн сонгуулийн төв комисс нь тус улсад болж өнгөрсөн Ерөнхийлөгчийн сонгуульд генерал Абдель Фаттах Сади ялсан тухай албан ёсоор мэдэгдлээ. Санал хураалтын дүнгээс үзэхэд генерал 96.9 хувийн санал авч тэргүүлжээ. Түүний өрсөлдөгч Хамдин Сабахи 2.9 хувийн санал авсан байна. Сонгуулийн төв комиссоос мэдээлсэнээр сонгогчдийн оролцоо 47.3 хувьтай байсан гэнэ. Санал хураалт хоёр хоног үргэлжлэх ёстой байсан боловч сонгогчдийн идэвхи маш муу байсан тул нэг хоногоор сунгажээ. 

Ю.ДЭЛГЭР

Хятадын бизнесмэн Чен гэх залуугийн 4 настай хүү аавынхаа гадаад паспорт дээр зураг зурж, цээж зургийг нь танихын аргагүй болгосноос болж тэрээр Өмнөд Солонгост саатжээ. Чен хүүгийнхээ “уран бүтээлийг” хилийн шалган дээр л олж мэдсэн байна. Өмнөд Солонгосын гаалийн ажилтнууд түүнийг хил нэвтрүүлэхээс татгалзсан бөгөөд одоо тэрээр маш хэцүү байдалд ороод байгаа юм. “Уурлах ч хэцүү, инээх ч хэцүү байдалд орчихлоо. Гэхдээ хүү минь намайг учирч болзошгүй аюулаас сэргийлсэн гэдэгт би итгэж байна” гэж Чен хэлжээ.

 “Тайм” сэтгүүлээс нэгэн сонирхолтой жагсаалтыг гаргажээ. Тус сэтгүүлээс энэ удаад цахим ертөнц дэх хамгийн нэр хүндтэй, эрэлттэй 20 мянган эрхэмийг сонгон авч эрэмбэлсэн байна. Цахим ертөнцийн “шар ном” гэгддэг “Википедиа” хуудсыг ашиглан гаргасан жагсаалтыг АНУ-ын Ерөнхийлөгч асан Жорж Буш тэргүүлсэн бол өдгөөгийн төрийн тэргүүн Барак Обама хоёрдугаарт орсон байна. Харин манай хойд хөршийн Ерөнхийлөгч Владимир Путин, АНУ-ын сенатчаар ажиллаж байсан Жон Маккейн болон сагсан бөмбөгч Шакил О’нил нарын ард буюу 27 дугаарт жагсчээ. Сонирхолтой нь, дэлхийн нөлөө бүхий 20 мянган эрхмийг сонгож оролцуулсан жагсаалтын 715-д Ерөнхийлөгч Ц.Элбэгдорж орсон байна. Мөн жагсаалтын 5430-д мэргэжлийн сүмогийн их аварга Асашёорюү Д.Дагвадорж, 11456 дугаарт Хакүхо М.Даваажаргал нар эрэмбэлэгджээ. Харин БНХАУ-ын дарга Си Жинпинь жагсаалтын 3507-д орсон бол Японы Ерөнхий сайд Шинзо Абэ 2763 дугаар байрт шалгарсан байна.

Анх 1972 онд НҮБ-ын Ерөнхий Ассeмблейн хурлаас жил бүрийн зургаадугаар сарын тавныг “Дэлхийн байгаль орчны өдөр” болгон тэмдэглэж байхаар тунхаглан зарлажээ. Үүнээс хойш НҮБ-ын гишүүн орнууд байгаль орчныг хамгаалах талаар дэлхий дахинд зориулсан сурталчилгааны томоохон үйл ажиллагааг жил бүр өөр өөр уриан дор зохион байгуулсаар байна.

Энэ жил манай улсад дэлхийн ногоон өдрийг “Зөв сонгож, хэмнэлттэй хэрэглэе” уриан дор тэмдэглэн өнгөрүүлэхээр болжээ. Мөн энэ өдөр  Монголын их, дээд сургууль, МСҮТ, Коллежийн оюутан суралцагчдын дунд “Flash mob” уралдааныг зохион байгуулахаар удирдамж түгээгээд байна. 

 Нэгэн зорилго, хүсэл дор хамгийн олон залуусыг нэгтгэж чаддаг “Flash mob” чөлөөт бүжгийн уралдааныг дэлхийн дулаарал болон цөлжилтийн эсрэг байгаль орчноо хамгаалах, ногоон хөгжлийг бий болгоход оруулах хувь нэмэр, хүсэл зориг, хүчин чармайлтыг урлагаар дамжуулан  илэрхийлэх зорилгоор БОНХЯ, Монголын оюутны холбоо хамтран зохион байгуулж байгаа аж.

 “Flash mob” уралдаанд оролцох баг 50-иас дээш оюутантай байх бөгөөд нэг сургуулиас хэдэн ч баг оролцож болох ажээ. “Flash mob”-т оролцогч багуудыг 1-3 байр эзлүүлэн, 2-4 сая төгрөгөөр шагнаж урамшуулах юм байна. 

Насанд хүрэгчид согтууруулах ундаа болон мансууруулах бодист донтдог шиг хүүхдүүд илчлэг ихтэй хүнсэнд /”junk food”-тэжээллэг чанар бага, тос, сахар, давс зэргийн агууламж өндөр хоол хүнс/ донтох боломжтой гэж АНУ-ын судлаач мэдэгдлээ.
АНУ-ын Мичиганы их сургуулийн судлаач Эшли Жеархардтын үзэж буйгаар, өндөр хэмжээнд боловсруулсан бүтээгдэхүүн иддэг хүүхдүүдэд хяналтаа алдах, тэвчээргүй болох зэрэг донтолтын сонгодог шинж тэмдгүүд ажиглагдаж болзошгүй.
Тархинд нь өдөөгч хянагч бий болоогүй байдаг учраас насанд хүрсэн хүмүүсээс илүү нярай хүүхдүүд донтолтод илүү өртөмтгий байж магадгүй гэж тэрбээр тайлбарлалаа. Хүүхдүүдийг эрүүл байлгах хамгийн зөв арга бол “junk food” идүүлэхгүй байж, жимс, хүнсний ногоо түлхүү хэрэглүүлэх гэж Жеархардт зөвлөв.

АНУ-ын баруун болон өмнөд нутгийн долоон муж улсад сүүлийн хэдэн жил үргэлжилсэн гангийн улмаас усны хомсдолд орсон гэж “USA Today” сонин мэдээлэв.
Калифорни, Невада, Аризона, Нью-Мексик, Канзас, Техас, Оклахома муж улсад усны хомсдол үүсээд байгаа аж. АНУ-ын Газар тариалангийн департаментын ган гачиг тандалтын төвөөс танилцуулсан материалаас харвал, Калифорни, Оклахома муж улсын гангийн байдал хамгийн хүнд түвшинд очжээ. Түүнчлэн гангийн улмаас үүссэн усны дутагдал тус улсын газар тариаланд хүнд дарамт болж байна. Тухайлбал, Техас, Оклахома, Канзас муж улсын нутгаар үргэлжилсэн тал газар нь АНУ-ын газар тариалан, үйлдвэрлэлийн 40 хувийг эзэлдэг байна. Дээрх долоон муж улсын цэвэр усны нөөц олон жилийн дунджийн 1/3 хувь хүртэл буураад байгаа юм. Цэвэр, ундны усны нөөц хомсдож байгаатай холбогдуулан Калифорни муж улсад далайн улсыг нэрж давсгүйжүүлэх байгууламж байгуулах урт хугацааны хөтөлбөр хэрэгжүүлж эхлээд байна.

Японы амттан үйлдвэрлэдэг компани хөхний хэмжээг томруулдаг жигнэмэг үйлдвэрлэжээ. ”F Cup” жигнэмэгийн найрлагад “Pueraria Mirifica” гэдэг ургамал орсон байна. Тайландад ургадаг энэ ургамалд хөхний хэмжээнд нөлөөлдөг эстроген даавартай адил “Miroestrol” молекул байдаг аж.
Тус компанийн мэдэгдсэнээр, эмэгтэйчүүд энэ жигнэмэгээс өдөрт нэгээс хоёрыг идвэл хөхний хэмжээ нь аяндаа томрох боломжтой гэнэ.
Гэхдээ эстроген болон хөхний хэмжээ хоорондоо холбоотой болох нь тогтоогдсон ч “Pueraria Mirifica” агуулсан ямар нэг зүйл  идвэл хөхний хэмжээ адил томорно гэсэн баталгаа байхгүй аж.