Нигерт дэх “Боко-Харам” лалын бүлгийнхэн дахин эмэгтэйчүүд хулгайлсан тухай мэдээллээ. Тус улсын хойд нутагт орших Чибок хотын ойролцоох газраас 20 бүсгүйг хүчээр авч явжээ. Гэрчийн ярьснаар цэргийн хувцастай зэвсэглэсэн хүмүүс буу тулган эмэгтэйчүүдийг хүчээр машинд суулгасан гэнэ.
“Боко-Харам” нь үүний өмнө 200 гаруй сургуулийн сурагчийг хулгайлсан. Тэднийг чухам хаана барьцаалж байгааг одоо болтол тогтоож чадаагүй байна.
Ю.Дэлгэр
Оросууд гурав дахь эмэгтэй сансрын нисэгчээ ирэх есдүгээр сарын 25-нд
“Союз ТМА-14 М” хөлөгөөр хөөргөхөөр бэлтгэж байна. Энэ бүсгүй бол Елена
Серова юм. Түүнтэй хамт Александр Самкутяев, Америкийн Барби Уилмор нар
нисэхээр болжээ. Елена Серовагийн орлон нисэгчээр Анна Кикиня сонгогдсон
байна. Серова нь Сочигийн өвлийн олимпод Оросын далбааг өргөж явах
таван сансрын нисэгчийн нэгээр сонгогдож байжээ.
АНУ-д 111 насандаа химич, сэтгэл судлаач Александр Имич хорвоогийн мөнх бусыг үзүүлсэн байна. Түүнийг өнгөрсөн дөрөвдүгээр сард манай дэлхийн хамгийн өндөр настай эрэгтэй хэмээн Гиннесийн номонд бүртгэсэн юм. Тэрээр 1903 онд тухайн үеийн Оросын эзэнт гүрний Ченстохова хотод төрж, 1950-аад оны эхээр гэр бүлийнхээ хамт АНУ-руу цагаачилжээ.
АНУ-ын Лас-Вегас хотноо өчигдөр өглөө цагдаагийн хоёр ажилтанг буудсан хэрэг гарсан байна. Гэмт этгээдүүд пиццаны газраас гарч ирээд гэнэт гал нээжээ. Дараа нь “Wal-Mart” худалдааны төвд орж нуудагдахдаа бас нэгэн хүнийг буудаж амийг нь хороогоодп хоёр хүнийг шархдуулсан байна. Гэмт этгээдүүдийг барьж авч чадаагүй бөгөөд яагаад ингэх болсон нь тодорхойгүй аж.
Украйны ерөнхийлөгчөөр сонгогдсон Порошенко энэ сарын 7-ны өдөр нийслэл Киевт тангараг өргөн ажилдаа орлоо. Тангараг өргөх ёслол Украйны Парламентийн байранд болж, ерөнхийлөгчийн үүргийг түр гүйцэтгэж байсан Украйны Парламентийн дарга Турчинов ёслолыг удирдлаа. Ёслолоор ерөнхийлөгчийн үнэмлэх болон ерөнхийлөгчийн бэлэг тэмдэг болох очирт таяг, тамга, медаль зэргийг гардуулан өгчээ. Украйны Ерөнхийлөгчийн сонгууль орон нутгийн цагаар тавдугаар сарын 25-ны өдрийн 08:00-20:00 цаг хүртэл үргэлжилсэн юм. Сонгуульд 21 нэр дэвшигч өрсөлдсөн бөгөөд улсын хэмжээнд нийт 33 мянга 600 гаруй санал авах цэг ажиллажээ.
Иран ирэх долоо хоногт Америк болон Оростой өөрийн орны цөмийн асуудлаар хэлэлцээ хийнэ. Учир нь Ираны төлөөлөгч энэ сарын 9-10-ны өдрүүдэд Америкийн төлөөлөгчтэй Женевт дэд сайдын хэмжээний хэлэлцээ хийж, 11-12-ны өдрүүдэд Ромд Оросын төлөөлөгчтэй мөн ийм хэлэлцээ хийх аж.
Эх сурвалжийн мэдээлж байгаагаар энэ сарын 16-ны өдөр Ираны асуудлаар Америк, Англи, Франц, Орос, Хятад, Герман зэрэг зургаан орон Венад шинэ хэлэлцээр хийсний дараа Иран эдгээр зургаан оронтой хэлэлцээ хийх юм байна.
Иран өнгөрсөн жилийн 11 дүгээр сард Ираны асуудлаар эдгээр зургаан оронтой Женевт хамтын ажиллагааны төлөвлөгөөгөө тохиролцсон юм. Төлөвлөгөө ёсоор зургаан сарын хугацаанд Иран цөмийн зарим үйл ажиллагаагаа зогсоох, Өрнөдийн орнууд тавьсан хоригоо цуцлах ёстой ажээ.
АНУ-аас Украинд нэмж 48 сая ам.долларын тусламж олгохоор болсон тухай мэдэгдлээ. Энэ тухай Цагаан ордоноос мэдэгдсэн байна. Энэ тусламжийг Украины Засгийн газарт хамгийн гол болох шинэчлэлийн ажлуудыг хэрэгжүүлэхэд зориулан олгохоор болжээ. Өөрөөр хэлбэл хууль сахиулах байгууллагыг бэхжүүлж, Украины бүрэн бүтэн байдлыг хадгалахад зарцуулах юм байна.
Холливудын нэрт жүжигчид болох Антонио Бандерас, Мелани Гриффит нар 18 жил цуг амьдарсны эцэст салахаар шийджээ. Жүжигчин М.Гриффит Лос-Анжелес хотын Дээд шүүхэд гэр бүлийг нь цуцалж өгөх хүсэлт гаргахдаа үзэл бодол нийлэхгүй байгаагийн улмаас хэмээн дурдсан байна. Тэд чухам яагаад салах болсон тухайгаа ярихдаа “Бид маш удаан бодсоны эцэст ийм шийдвэр гаргасан. Бид бие биеэ болон гэр бүл, найз нар, цугтаа амьдарсан тэр сайхан үеэ хүндэтгэдэг” гэжээ.
Нэртэй хоёр жүжигчид маань 17 настай охинтой. Мелани Гриффит А.Бандерасоос охиноо асран хүмүүжүүлэхэд зориулах тэтгэмж төлөхийг шаардсан байна. Түүнээс гадна хөрөнгөө хуваах юм. Тэд АНУ болон Испанид нэлээд хөдлөшгүй хөрөнгөтэй билээ.
АНУ-ын Ерөнхийлөгч агсан Рональд Рейганы таалал төгссөний 10 жилийн ой өнөөдөр тохиож байгаа юм. Энэ ой болж байгаатай холбогдуулан талийгаачийн эхнэр Нэнси Рейган түүний оршуулсан газар нь очиж цэцэг өргөсөн байна. Өдгөө 93 настай Нэнси Рейган нөхрийнх нь дурсгалыг хүндэтгэл ёслолд оролцохдоо одоо болтол түүнтэй зүүдэндээ уулздаг хэмээн ярьсан нь цугларсан хүмүүсийн сэтгэлийг ихэд хөдөлгөжээ.
Ю.ДЭЛГЭР
АНУ-ын Төрийн Департаментаас ард иргэддээ хандан Украин ялангуяа тус улсын зүүн нутаг руу явахгүй байхыг анхааруулга гаргасан байна. Уг мэдэгдэлд бичсэнээр Украины цэрэг болон Оросын талыг дэмжигчдын хооронд Луганск, Донецк мужуудад зэвсэгт мөргөлдөөн гарсаар байгааг дурджээ. Украины зүүн нутгийн оршин суугчдын дунд Америкийг үзэн ядсан үзэл нэлээд байгаа нь АНУ-ын эрх баригчдын санааг ихэд зовоож байгаа тухай ч уг мэдэгдэлд онцолсон байна.
Ю.ДЭЛГЭР