Category: гадаад

АНУ-ын Ерөнхийлөгч асан эцэг Буш өнөөдөр 90 нас хүрлээ. Тэрээр төрсөн өдрийнхөө баярыг Мэн мужийн Кеннебанкпорт хот дахь харшдаа тэмдэглэх гэнэ. Америкийн 41 дэх Ерөнхийлөгчид баяр хүргэхээр 200-аад зочин хүрэлцэн очих гэнэ. Ж.Бушийн гэр бүлийн албан ёсны төлөөлөгч үүнтэй холбогдуулан мэдэгдэл хийхдээ  Ж.Буш ийм их зочид хүрэлцэн ирэх болсонд баяртай байгаа. Учир нь экс Ерөнхийлөгчийн зуны харш нэлээд хол байдаг аж. Өнгөрсөн ням гаригт Ж.Бушийн эхнэр Барбара Буш 89 насныхаа ойг тэмдэглэсэн юм.

Бээжин хотод төвтэй Олон нийтийн эрүүл ахуй, орчны өөрчлөлтийн судалгааны төв хүрээлэнгээс агаарын бохирдлыг хэмжиж, иргэдэд анхааруулга өгөх гар утасны апликэйшн бүтээсэн байна. Энэ нь БНХАУ-ын 190 орчим хотод “ажиллах” бөгөөд иргэдийн дунд агаарын чанарын талаар мэдээлэл солилцох гол хэрэгсэл болох гэнэ. Тус улс хамгийн бохир агаартай орны нэг бөгөөд агаарын бохирдолтой тэмцэхээр сүүлийн үед олон арга хэмжээ авч байгаа.

Автомашины тоог хязгаарлаж, сэргээгдэх эрчим хүчний салбарт ихээхэн хөрөнгө оруулж буй ч агаараа цэвэршүүлж чадахгүй байгаа нь Хятадын эрх баригчдыг өөр арга зам эрэлхийлэхэд хүргэж буй. Харин дээрх апликэйшн агаарын гол бохирдуулагч болох нүүрсний үйлдвэрүүдийн байршлыг хэлж өгөхөөс гадна нүүрстөрөгчийн хийг зөвшөөрөгдөх хэмжээнээс давж “үйлдвэрлэсэн” аж ахуй нэгж, үйлдвэрүүдийг “барьж өгөх” гэнэ. Мөн аль хэсэгт агаарын бохирдол их байгааг сануулж, тийш явахгүй байхыг сэрэмжлүүлэх, утаа угаартай газар очсон ч тэр нь эрүүл мэндэд сөрөг нөлөөтэй, үгүйг хэлж өгөх мэдрэгчтэй байх аж.

Украины Ерөнхийлөгч Петр Порошенко улс орныхоо эдийн засагт жаахан ч гэсэн нэмэр болох нэгэн шинэ саналыг дэвшүүлсэн байна. Тэрээр Ерөнхийлөгчийн сонгуулийн эхний шатанд ялалт байгуулснаар хоёр дахь шатны санал хураалт явуулах шаардлагагүй болсон. Тиймээс улсын төсвөөс нэлээд мөнгө хэмнэгдсэн юм. Тодруулбал ойролцоогоор 600 сая гривен хэмнэсэн байна. Тиймээс энэ мөнгийг зэвсэгт хүчин тодруулбал террористуудын эсрэг ажиллагаанд оролцож буй цэргүүдэд зарцуулах саналыг дэвшүүлжээ.   

Маргааш Бразилд хөлбөмбөгийн дэлхийн  аварга шалгаруулах тэмцээн эхлэнэ. Уг тэмцээний нээлтийн ажиллагаанд дээр Америкийн зуучин Женнифер Лопес, куба гаралтай Америкийн рэп дуучин Питбул, Бразилийн иргэн Клаудиа Лейта нар сүлд дууг дуулахаар болжээ.

Лондон хотноо зэвсэгт мөргөлдөөний үер гарч буй бэлгийн хүчирхийллийн асуудлаарх олон улсын чуулган болж байна. Уг арга хэмжээг Их Британийн Гадаад хэргийн сайд  Уильям Хейг, Холливудын нэрт жүжигчин, НҮБ-ын сайн санааны элч Анжелина Жоли нарын санаачлагаар зохион байгуулж байгаа юм. Тус чуулганыг нээж Анжелина Жоли үг хэлсэн бөгөөд дэлхийн 140 орны төлөөлөгч оролцсон байна.

Олон улсын хөлбөмбөгийн холбоо /ФИФА/-ны Ерөнхийлөгч Зепп Блаттер 2014 оны ДАШТ-ий үеэр дэлхий нийтээр дайны галаа зогсоохыг уриаллаа.

Тэрээр өчигдөр хэвлэлийн хурал зарлан “Олон улсын хөлбөмбөгийн холбооны төлөөлөгчид, бүх хөлбөмбөгчдийн нэрийн өмнөөс хамгийн агуу баяр цэнгэл ДАШТ-ий үеэр дэлхийн өнцөг булан бүрт дайны галыг зогсоохыг уриалж байна. Спортын хаан хөлбөмбөг хүмүүсийг нэгтгэдэг. Мянга, мянган хөгжөөн дэмжигч Бразиль улсад зочилж, ДАШТ хэмээх түүхэн баярыг нүдээр үзэх болно. Мөн хүн төрөлхтөн зөвхөн ДАШТ-ий үйл явдал, өрнөл, тоглолтыг чих тавин анхаарах болно…  Тиймээс дэлхий нийтээр дайны галаа зогсоохыг уриалж байна” гэжээ.

Өнгөрсөн тавдугаар сарын 17-нд Тайландад болсон “Ертөнцийн гоо бүсгүй-2014” тэмцээний ялагч 22 настай Велури Дитсаябут титмээсээ сайн дураараа татгалзжээ. Хоёр долоо хоногийн өмнө “Facebook”-ээр улс орондоо болж буй үйл явдлын талаар үзэл бодлоо илэрхийлсэн нь олны бухимдлыг төрүүлснээс ийм шийдвэр гаргасан гэнэ. “ВВС”-ийн мэдээлснээр  В.Дитсаябут огцорсон Засгийн газрыг дэмжигч улаан цамцтануудын үйлдлийг буруушаан, тэднээс залхаж байна гээд цаазлах хэрэгтэй гэж бичсэн нь хэл ам дагуулаад буй. Үүнд бухимдсан интернэт хэрэглэгчид түүнийг элдвээр доромжлон, бүр амь насанд нь хэд хэдэн удаа халдахыг оролдсон гэнэ. Үүнтэй холбогдуулан В.Дитсаябут хэвлэлийн бага хурал зарлажээ. Тэрээр болчимгүй үйлдлээсээ болж сэтгэл зүйн хүнд дарамтад орж, шөнө унтаж чадахаа больсон гэжээ. Мөн Ертөнцийн миссийн титмээсээ татгалзаж буйгаа мэдэгдсэн байна. Мөн тэрээр “Ертөнцийн гоо бүсгүй-2014” тэмцээний үеэр өөрийг нь сонгож дэмжсэн шүүгчид болон үзэгчдэд талархлаа илэрхийлжээ.

ОХУ  гурав дахь эмэгтэй сансрын нисгэгчээр Елена Серова шалгарчээ. Тэрбээр  есдүгээр сарын 25-нд “Союз ТМА-14 М” хөлгөөр хөөрөх бөгөөд бэлтгэл ажлаа хангаж байгаа аж. Тэрээр Оросын нисгэгч Александр Самкутяев, Америкийн Барби Уилмор нартай хамт нисэх гэнэ. Хатагтай Елена Серовагийн орлон нисгэгчээр Анна Кикиня сонгогдоод байгаа юм байна. Сануулахад, Е.Серова нь Сочигийн өвлийн олимпод Оросын далбааг өргөж явах таван сансрын нисгэгчийн нэгээр сонгогдож байжээ. 

2001 онд Билл Клинтон АНУ-ын Ерөнхийлөгчийн ажлаа өгсөн билээ. Хиллари Клинтон энэ тухайгаа дурсан ярихдаа  “Манайх Цагаан ордонд ирэхэд ямар ч мөнгөгүй байсан. Тиймээс барьцааны мөнгөө төлөх,  охиныхоо сургалтын төлбөр гээд нэлээд хэцүү байсан. Харин Цагаан ордноос  явахад мөнгөгүй төдийгүй өрөнд орсон ” гэжээ. Тиймээс ч төрийн тэргүүний ажлаа өгснөөсөө хойш Б.Клинтон төлбөртэй лекц унших болсон. Түүнээс хойш өнөөдрийг хүртэлх  Билл Клинтон 106 сая ам.долларын ашиг олжээ. Хиллари Клинтон ч Төрийн нарийн бичгийн бичгийн даргын ажлаа өгсөнөөсөө хойш санхүүгийн байдал нь илт сайжирсан аж. 

Ю.Дэлгэр