ОХУ-ын ерөнхийлөгч Владимир Путин Крымд хоёр өдрийн айлчлалаа өнөөдөр эхлүүлэх бөгөөд энэ үеэр тус хойгт улсын томоохон албан тушаалтнууд, Төрийн Думын гишүүд цугларах гэнэ.
Кремлийн хэвлэлийн албанаас мэдээлж буйгаар Холбооны Аюулгүйн зөвлөлийн гишүүдийн шуурхай хурал Севастопольд болох юм байна.
Маргааш Владимир Путин Крымд Төрийн Думын депутатуудтай уулзаж, улс орны өмнө тулгамдаж буй цаг үеийн асуудлаар парламентад нээлттэй яриа өрнүүлэх юм. Тус уулзалтанд ОХУ-ын Ерөнхий сайд Дмитрий Медведев, Думын дарга Сергей Нарышкин, Дум дахь бүх фракцийн удирдагчид, бүх сайд оролцох юм.
Энэ удаагийн айлчлал Путины хоёр дахь айлчлал болж байна. Крым өнгөрсөн гуравдугаар сард Украинаас салж, ОХУ-ын бүрэлдэхүүнд нэгдсэнээс хойш Ерөнхийлөгч Владимир Путин Крымийн хойг руу анхны айлчлалаа Ялалтын баяраар хийсэн. Тэрээр Ялалтын баярын 69 жилийн ойг тохиолдуулан дэлхийн II дайны “Баатар хот” Севастопольд очсон юм.
Францын Ерөнхийлөгч Франсуа Оланда 60 нас хүрлээ. Тэрээр төрсөн өдрөө гэр бүл, ойр дотныхонтойгоо тэмдэглэсэн байна. Францын зарим хэвлэлд бичсэнээр төрийн тэргүүний хувьд энэ өдөр тийм ч таатай байгаагүй гэнэ. Учир нь Ф.Оландагийн нэр хүнд сүүлийн үед эрс унасан аж. Саяхан явуулсан санал асуулгын дүнгээс үзэхэд францчуудын ердөө 20 хувь нь түүнийг дэмжиж байгаагаа илэрхийлсэн байна.
Өнгөрсөн амралтын өдрүүдэд Японд Халонг хар сахи нүүрлэсэн тухай мэдээлж байсан билээ. Үүний улмаас есөн хүн амь үрэгдэж хоёр хүн сураггүй болжээ. Мөн 80-аад хүн гэмтэж 342 хүн орох оронгүй болсон байна. Японы Гал сөнөөх газраас 1 сая 600 мянган хүнийг нүүлгэн шилжүүлсэн тухай мэдэгдсэн юм. 
АНУ-ын Луизиана мужид буудалцаан болж хоёр хүн нас барж таван хүн шархадсан байна. Орон нутгийн цагаар өглөөний найман цагт хар өнгийн машинтай хүмүүс гудамжинд байсан хүмүүс рүү гал нээжээ. Үүний улмаас хоёр хүн газар дээрээ амьсгал хураасан байна. Мөн таван хүн шархдаж эмнэлэгт хүргэгдсэн бөгөөд хоёрынх нь бие нэлээд хүнд байгаа тухай Шинэ Орлеаны Цагдаагийн газраас мэдээлжээ.
ДЭМБ-аас эбола вирус хурдацтай тархаж байгаа нь дэлхий нийтэд аюул учруулж магадгүй хэмээн анхааруулжээ. Уг өвчний халдвар тархсан Африкийн орнуудын байдал хүнд байна. Канадын “Tekmira Pharmaceuticas” компани эболагийн эсрэг вакциныг сармагчин дээр туршсан нь амжилттай болжээ. Тиймээс АНУ-ын засгийн газар энэ ажлыг дэмжиж, 140 сая ам.долларын тусламж үзүүлсэн байна. Гэхдээ тус улс энэ өвчний эсрэг вакциныг олон хүн дээр туршиж болохгүйг анхааруулжээ.
Израилийн Батлан хамгаалах хүчин твиттертээ исламын ХАМАС бүлэглэлийн босогчид Газын зурвасаас Израилийн газар нутаг руу хоёр пуужин харвасан хэмээн мэдэгджээ. Азаар тус хорлон сүйтгэх ажиллагааны улмаас хүний амь эрсэдсэн мэдээлэл байхгүй байгаа аж. Өмнө нь Израилийн ерөнхий сайд Биньямин Нетаньяху, Батлан хамгаалах яамны сайд Моше Яалон нар Газын зурвасаас илгээсэн пуужинд “хариу цохилт” өгөх ёстой гэж мэдэгдэж байв. Израилийн Батлан хамгаалах хүчний хэвлэлийн албаны мэдээгээр, эвлэрлийн 72 цаг дууссанаас хойш Газын зурвасаас ойролцоогоор 25 пуужин харважээ.
Иракийн хэт даврагч “Халифын вант улс” бүлэглэл хяналтаас гарч буйг АНУ-ын Ерөнхийлөгч Барак Обама буруутгаж, агаараас довтлохоо өнгөрсөн баасан гаригт мэдэгдсэн юм. Тэгвэл АНУ-ын нисэх хүчин тус бүлэглэлд эзлэгдээд буй Курд үндэстний Ирбил хот руу нисэгчгүй онгоцоор гал нээсэн тухай “Ройтерс” агентлаг мэдээллээ. Иракийн Засгийн газраас мэдэгдсэнээр тус дайралтын улмаас хамгийн багадаа 10 мянган иргэн дүрвэсэн гэв. АНУ 2011 оны сүүлээр цэргээ татсанаас хойш анх удаа Ирак руу довтолж байгаа юм.
Эбола вирусын улмаас Африкийн орнуудад аялал, жуулчлал, албан болон хувийн ажлаар зорчихгүй байхыг ДЭМБ-аас сануулсан тухай “ВВС” агентлаг мэдээллээ. Гвиней улсын Эрүүл мэндийн яам Эбола вирусээр 151 иргэн халдварлаж нэг долоо хоногийн дотор 99 хүн амиа алдсан гэв. Нас барсан иргэдийн найм нь тус яамны ажилтан байжээ.