Category: гадаад

АНУ-ын Ерөнхийлөгч Барак Обама Эстон
улсад төрийн айлчлал хийхээсээ өмнө зарлиг гаргаж Иракийн хойд хэсэг рүү
350 цэргээ илгээсэн тухай “Ройтерс” агентлаг мэдээллээ.  Тэрбээр
“Washington post” сонины сэтгүүлч Стевен Сотлофф амиа алдсаны дараа
дээрх шийдвэрийг гаргасан хэмээн Цагаан ордны хэвлэлийн албаны дарга Жае
Карнеу ярьжээ. Обама дээрх үйл явдлын дараа “Халифын вант улс”
бүлэглэлийн эсрэг явуулж буй гэнэтийн ажиллагааныхаа цар хүрээг
өргөжүүлэхээр болсон байна. Мөн  ойрын болон дунд тусгалын хэд хэдэн
пуужинг Иракт байрлаж буй АНУ-ын цэргийн баазад хүлээлгэн өгөх шийдвэрт
гарын үсэг зуржээ.

Обама ямар ч аргаар хамаагүй тус алан
хядах бүлэглэлтэй тэмцэж, тэргүүн Бакар аль-Багдадыг дарангуйлагч Саддам
Хусейн шиг хороохоо мэдэгджээ. 2003 оны сүүлээр АНУ болон Их Британийн
армийн цэргүүд Иракт гэнэтийн ажиллагаа явуулж 2005 оны долоодугаар сард
Саддам Хусейныг баривчилсан юм. Түүнийг 2006 оны арваннэгдүгээр сарын
5-ны өдөр “Хүн төрөлхтөний эсрэг алан хядах ажиллагаа явуулж, олон
мянган хүний амь насанд хүрсэн” гэж дүүжлэн хороосон билээ.

Ерөнхий сайд Шинзо Абэгийн шаардлагаар Японы Засгийн газрын танхим
бүрэн бүрэлдэхүүнээрээ огцорлоо. Ерөнхий сайд танхимын яаралтай
хуралдаанаар өөрөө сайд нараас огцрох өргөдлийг нь хүлээн авсан байна.

Засгийн газар бүрэн бүрэлдэхүүнээр огцрох нь ердийн хэрэг бөгөөд үүгээр
сайд нараа сольдог. Огцорсон Засгийн газар үд хүртэл үүргээ гүйцэтгэх
ба ерөнхий сайд үдээс хойш шинэ Засгийн газраа зарлан 11 сайдаа өөрчлөх
гэнэ. Шинэчлэгдсэн Засгийн газарт  таван эмэгтэй сайд нар гарч ирэх
бөгөөд тэр нь эмэгтэйчүүдийн үүргийг  улс төрд идэвхжүүлэх гэсэн Абэгийн
өөрийнх нь санаачлага юм.

Батлан хамгаалахын сайдаар өмнөх сайдын шууд удирдлага дор ажиллаж
байсан яамны гол хүмүүсийн нэг Акинори Это  томилогдож магадгүй. Хуучин
ерөнхий сайд байсан Кейзо Обутийн охин Юко Обути сайд  болно. Харин ямар
тушаалд гэдэг нь тодорхойгүй.

Сангийн сайд Таро Асо, Гадаад хэргийн сайд Фумио Кишида, Боловсрол,
спорт, шинжлэх ухаан, технологийн сайд Симомура Хакүбүн, сайд нарын
танхимын ерөнхий нарийн бичгийн дарга Ёшихидэ Шүга, Эдийн засгийг
сэргээх сайд Акира Амари нар албан тушаалдаа үлдэх бололтой.

Өнөөдөр огцорч байгаа энэ танхим нь тус улсын дайнаас хойших түүхэнд
“хамгийн урт насласан  Засгийн газар” болж байна. 2012 оны
арванхоёрдугаар сард байгуулагдсанаасаа хойш танхим огт өөрчлөлтгүй
ажиллажээ.

Баруун
Африкийн таван оронд дэгдсэн Эбола вирус хүрээгээ тэлсээр Европын зарим оронд
дэгдэх магадлалтай гэж ДЭМБ-аас мэдээлжээ. Халдвар
авсан 3000 гаруй хүний 12 нь АНУ, Британи, Канадын иргэд билээ. ДЭМБ-аас
мэдээлсэнээр “Онцгой бүсэд ажиллаж буй эмч болон сайн дурынхан халдвар авсан
тохиолдолд Герман, Франц, АНУ зэрэг орнуудад байрлах эмчилгээний лабораторид
хэвтэн эмчлүүлж буй. Тэдний биеийн байдал Либер, Гвиней, Нигер, Сьерро-Леон,
Гана улсад халдвар авсан иргэдтэй адилхан байгаа. Тиймээс Европын орнуудад
хүргэгдэж ирсэн хүмүүс халдвар тараах эрсдэл өндөр байна” гэжээ.

Канад
улсын Эрүүл мэндийн сайд Рона Амбросе энэ асуудлаар санаа зовж буйгаа илэрхийлж
туршилтаар гаргаж авсан “Замак” эм үр дүнгээ өгч чадахгүй байгааг онцолжээ.
Тэрбээр “Европын орнууд Эбола вирусын халдвараас сэргийлж, онц байдал зарлах
хэрэгтэй. Мөн олон хүн үйлчлүүлдэг газруудад цаг тутам ариутгал хийх хэрэгтэй”
хэмээв.

1997
онд Сьерро-Леон улсад анх удаагаа бүртгэгдэж байсан Эбола вирусын улмаас хагас
сая хүн амиа алджээ. НҮБ-ын дэргэдэх Эрүүл мэндийн хүрээлэнгээс “Эбола вирус
анх цусаар дамжиж халдвар тараадаг байсан бол 2005 оноос эхлэн ахуйн хэрэглэл
болон хөлс, нулимс зэргээр халдвар тараадаг шинэ төрлийнх бүртгэгдсэн” гэсэн байна.

Баруун Африкийн Либери улсын эмнэлэгт ажиллаж байсан америк эмч эбола вирусын халдвар авчээ. Улмаар Америкийн гурав дахь иргэн эбола вирусын халдвар авсан нь тогтоогдоод байна. 

Тодруулбал, Либерийн нийслэл Монрови хотын ELWA эмнэлэгийн эх барих тасагт ажиллаж байсан америк эмч уг вирусын халдвар авсан нь тогтоогджээ Одоогийн байдлаар түүний овог, нэрийг нь нууцалж байна. Өмнө нь мөн энэ эмнэлэгт ажиллаж байгаад вирусын халдвар авсан Кент Брэнтли, Нанси Райтбол нар америк руугаа буцсан юм. 

Тэндээ  эмнэлэгт хэвтэн эмчлүүлж байгаад биеийн байдал нь дээрдэж, улмаар эмнэлэгээс гарсан тухай албаны эх сурвалжууд мэдээлсэн. Харин энэ удаа шинээр халдвар авсан эмч эбола цусархаг халууралт өвчинтэй хүмүүстэй харьцдаггүй бөгөөд чухам ямар замаар халдвар авсан нь тодорхой бус байгаа аж.  Дэлхийн эрүүл мэндийн байгууллагын хамгийн сүүлийн мэдээгээр Баруун Африкт өнгөрсөн зургаан сарын хугацаанд нийт 3062 хүн эбола цусархаг халууралт өвчнөөр өвчилсөний 1552 нь амиа алджээ.

БНСУ-ын “Ёнхап” агентлаг “Энэ сарын 1-ний өдөр БНАСАУ Солонгосын хойгийн зүүн нутгийн тэнгисийн усан хил рүү богино зайн тусгалтай пуужин харвасан” гэж албаны хүний үгээс иш татан мэдээлжээ. БНСУ-ын цэргийн нэгдсэн штабын газрын төлөөлөгчийн мэдээлснээр, орон нутгийн цагаар энэ сарын 1-ний өдрийн 10.30 цагт БНАСАУ мэдэгдэлгүйгээр хориотой бүст Солонгосын хойгийн зүүн нутгийн тэнгисийн усан хил рүү богино зайн тусгалтай пуужин харвасан байна.

Нислэгийн байдлаас үзэхэд, шинэ хэлбэрийн дайны пуужин буюу тохируулга хийсний дараах пуужин байж болзошгүй. Зайн тусгалт нь 220 км бөгөөд пуужин далайд унасан гэж БНСУ үзжээ. Одоогоор БНСУ-ын цэргийн тал БНАСАУ-ын харвасан пуужингийн төрөл болон зорилгыг судалж байгаа бөгөөд БНАСАУ-д тавих хяналтаа улам эрчимжүүлж буй юм байна.

НАТО-д багтдаг долоон орон “Украины хэрэгт Орос хөндлөнгөөс оролцож байгаагийн” хариуд батлан хамгаалах хүчээ зузаатгах төлөвлөгөөний хүрээнд түргэн тусгаж, шуурхай ажиллах хүчин байгуулна.

“Financial Times” сонинд бичсэнийг иш татан Ройтерс агентлаг ингэж мэдээлсэн байна. Тус сонинд дурдсанаар, шинэ бүтэц нь наанадаж 10 мянган цэрэгтэй байх ажээ.

Энэ хүчин нь шуурхай ажиллаж, тогтмол сургуулилт хийх зорилгоор явуулын хамтарсан ангиуд байгуулах зорилготой юм. Британийн удирдлагад ажиллах бөгөөд агаарын цэргийн болон тэнгисийн цэргийн анги салбар, түүнчлэн хуурай замын цэрэгтэй байна гэж сонинд бичжээ.

Төсөлд Дани, Латви, Эстон, Литва, Норвеги, Нидерланд зэрэг улсууд оролцоно. Үүнээс гадна, Канад улс оролцох хүсэлтэй байгаагаа илэрхийлсэн байна.

Их Британийн ерөнхий сайд Дэвид Кэмерон есдүгээр сарын 4-5-нд НАТО-гийн дээд хэмжээний уулзалт болох Уэльст ийм хүчин байгуулах тухай зарлах төлөвтэй байна. Энэ уулзалтаар тус эвслийн зүүн хил хязгаарыг бэхжүүлэх урт хугацааны төлөвлөгөө хэрэгжүүлэхээр төр, засгийн тэргүүн нар тохиролцох бодолтой байгаа ажээ. Оросын дипломатчдыг энэ арга хэмжээнд уриагүй байна.

Украинд болж буй хэрэг явдалтай холбогдуулан Зүүн Европт шинэ цэргийн баазууд байгуулахаар төлөвлөж байгаа тухай НАТО-гийн ерөнхий нарийн бичгийн дарга Андерс Фог Расмуссен лхагва гаригт мэдэгдсэн юм.

Эвслийн тэргүүн энэ алхамыг Балти орчмын нутгийг Оросын ерөнхийлөгч Владимир Путинээс хамгаалах оролдлого хэмээн тодорхойлжээ. Үүнээс гадна, НАТО Оросын аюулыг сөрөн зогсоход нь зэвсэгт хүчнээ шинэчлэхэд Украинд туслахаар амласан байна.

Холливуудын хамгийн сайхан хос гэгддэг жүжигчин Брэд Питт, Анжелина Жоли нар албан ёсоор хуримынхаа зургийг “People” сэтгүүлд анх нийтэлжээ. Хосууд хоёр долоо хоногийн өмнө Францын жижигхэн тосгонд нууцаар хуримласан талаар гадаадын сайтуудад бичиж байсан юм.  Өчигдөр худалдаанд гарсан “People” сэтгүүлийн нүүрийг Анжелина Жоли хуримын даашинзтай зургаараа чимсэн байна. 

6Дашрамд дурдахад, Брэд Пит сүйт бүсгүйдээ 500 мянган ам.долларын үнэтэй 16 каратын алмаазан шигтгээтэй бөгж бэлэглэсэн гэнэ.

БНХАУ-ын Хубэй мужийн Шиян хотод сурагчид руу халдсан хэрэг
гарчээ. Тусхотын нэгэн дунд сургууль руу үл таних этгээд халдсан байсан. Гартаа
хутга барьсан гэмт этгээд сурагчдад халдсаны улмаас гурван хүүхэд нас баржээ.
Мөн найман сурагч, нэг багш нэлээд хүнд гэмтэл авсан тухай мэдээллээ. Гэмт
этгээд үүний дараа сургуулийн цонхноос үсэрч амиа хорложээ. Зарим эх сурвалжын
мэдээлж байгаагаар гэмт этгээд нь сурагчдийн нэгнийг нь аав байсан бололтой.

Өөрийгөө зарлан тунхагласан Донецкийн бүгд найрамдах улсын цэрэг Украины талд 220 олзны цэргийг шилжүүлэн өгсөн тухай мэдээлжээ. Украины зүүн хэсэгт орших Донецк мужийн Старобрешево хотын ойролцоо болсон тулалдааны үеэр салан тусгаарлагчид Украины үндэсний гвардийн хоёр танк, хоёр хуягт тэрэг устгаж, 198 цэргийн албан хаагчийн зэвсгийг хураасан байна. Салан тусгаарлагчид сүүлийн хэд хоногт өрнүүлсэн давшилтын ажиллагааны үеэр Донецкийн мужийн Ореховка, Шелковая, Протока суурингуудыг эргүүлэн чөлөөлж, Фабричное, Петро-Николаевка суурингийн захад бэхлэлт хийж амжсан тухай “РИА-Новости” агентлаг мэдээлэв.

Украины арми болон өөрийгөө зарлан тунхагласан Донецкийн болон Луганскийн бүгд найрамдах улсын салан тусгаарлагчдын хооронд өнгөрсөн дөрөвдүгээр сараас эхэлсэн зэвсэгт мөргөлдөөний улмаас 2.5 мянган хүн амь үрэгдэж, зургаан мянга гаруй хүн шархдаад байгаа юм.

Өнгөрсөн тавдугаар сарын 31-ны өдөр Солонгосын нийслэл Сөүл хотноо”Miss Asia Pacific World-2014” тэмцээн болж тэмцээнд 47 орны гоо бүсгүйчүүд оролцсноос Мьянмар Улсын мисс “May myat noe” түрүүлж 200 сая воны үнэ бүхий миссийн титмээр шагнуулсан билээ. Ингээд зохион байгуулагчид түүнийг дэлхийн хэмжээний од болгох энтертаймент гэрээ байгуулж зайлшгүй хийх ёстой гоо сайхны мэс засалд оруулах гэтэл гоо бүсгүй 200 сая вонны үнэ бүхий титмээ аваад ээжийнхээ хамтаар ор сураггүй алга болсон мэдээлэл багагүй дуулиан дэгдээгээд байна. Зохион байгуулагчид түүний энэхүү үйлдэлд эгдүүцэж миссийн титмээ буцааж авах шийдвэр гарган хайж байгаа аж.